ភ្នំពេញ ៖ ជាមួយគុណតម្លៃ និងទឹកចិត្ត ក្នុងការចូលរួមទ្រទ្រង់ ដល់ដំណើរការប្រចាំថ្ងៃ របស់មន្ទីរពេទ្យកុមារអង្គរ ក្រុមហ៊ុនមីជាតិ បានបន្តចូលរួម ឧបត្ថម្ភធំ នៅក្នុងព្រឹត្តិការណ៍សប្បុរសធម៌ “ជិះកង់ដើម្បីបរិស្ថាន និងសុខភាពកុមារ ឆ្នាំទី៨” ដែលបានប្រព្រឹត្តឡើង នៅក្រុងសៀមរាប កាលពីថ្ងៃទី១៤ ខែសីហា ឆ្នាំ២០២២ សហការរៀបចំ ដោយគណៈកម្មការរៀបចំ ព្រឹត្តិការណ៍ជិះកង់ (CFC) និងមន្ទីរពេទ្យកុមារអង្គរ ដោយមានការ ចូលរួមប្រមាណ ១០០០នាក់ ។
![](https://dap-news.com/wp-content/uploads/2022/08/photo_2022-08-15_14-26-01-1-1024x682.jpg)
ព្រឹត្តិការណ៍នេះ ត្រូវបានរៀបចំឡើង ក្នុងគោលបំណង រៃអង្គាសថវិកា ពីសាធារណជន វិស័យឯកជន និងស្ថាប័ននានា ដើម្បីទ្រទ្រង់ដល់ដំណើរ ការរបស់មន្ទីរពេទ្យកុមារអង្គរ ដែលមានបេសកកម្មព្យាបាល និងជួយសង្រ្គោះអាយុជីវិត របស់កុមារកម្ពុជា ប្រកបដោយគុណភាព ក្តីមេត្តាករុណា និងមិនគិតកម្រៃ ។ មន្ទីរពេទ្យកុមារអង្គរ គឺពឹងផ្អែកទៅលើជំនួយសប្បុរសធម៌ទាំងក្នុង និង ក្រៅប្រទេស ដែលបានបើកបំរើសេវា សុខភាព ជូនកុមារកម្ពុជា អស់រយៈពេល ជាង២០ឆ្នាំមកហើយ ។ ទោះបីជាមានបញ្ហាកង្វះថវិកា នៅក្នុងដំណើរការប្រតិបត្តិ យ៉ាងណាក៏ដោយ មន្ទីរពេទ្យមួយនេះ មិនដែលរួញរា នឹងសង្រ្កោះអាយុជីវិតកុមារ ណាម្នាក់នោះឡើង ។
![](https://dap-news.com/wp-content/uploads/2022/08/photo_2022-08-15_14-25-00-1-1024x575.jpg)
លោក សោមនស្ស វិបុល ប្រធានជាន់ខ្ពស់ផ្នែកពាណិជ្ជកម្ម បានមានប្រសាសន៍ថា “មីជាតិ ពិតជាមាន សេចក្តីរីករាយ ដែលបានបន្តចូលរួម ឧបត្ថម្ភគាំទ្រ ក្នុងព្រឹត្តិការណ៍ជិះកង់នេះ ជាថ្មីម្តងទៀត ។ ព្រឹត្តិការណ៍ឆ្នាំទី៨នេះ នឹងនៅបន្តជានិមិត្តរូប នៃស្មារតីសាមគ្គី ការរួបរួមគ្នា និងការបង្ហាញ ក្តីស្រលាញ់ របស់ប្រជាជាតិខ្មែរ ។ ខ្ញុំសង្ឃឹមថា បងប្អូនប្រជាពលរដ្ឋ នឹងបន្តចូលរួមគាំទ្រព្រឹត្តិការណ៍ដ៏ធំមួយនេះ ដើម្បីបុព្ធហេតុកុមារកម្ពុជា ។ បន្ថែមពីនេះខ្ញុំសូមអំពាវនាវ ដល់ប្រជាពលរដ្ឋទាំងអស់ សូមបន្តផ្តល់ការគាំទ្រ និងប្រើប្រាស់ផលិតផលមីជាតិ ដែលមានច្រើនជម្រើស និងរសជាតិ ក៏ដូចជាផលិតផលខ្មែរដទៃទៀត ដែលនេះបានបង្ហាញពីស្មារតី នៃការគាំទ្រផលិតផលក្នុងស្រុក និងរួមចំណែកលើកកម្ពស់ ការអភិវឌ្ឍន៍សេដ្ឋកិច្ចជាតិ ក៏ដូចជាមោទនភាព របស់ជាតិយើង ។”
![](https://dap-news.com/wp-content/uploads/2022/08/photo_2022-08-15_14-25-09-1-1024x890.jpg)
លោកវេជ្ជបណ្ឌិត ងួន ច័ន្ទភក្រ្តា នាយកមន្ទីរពេទ្យកុមារអង្គរ បានបញ្ជាក់ថា ព្រឹត្តិការណ៍ ជិះកង់នាពេលនេះ គឺជាសកម្មភាពមនុស្សធម៌ ដ៏ពិសេស មួយ របស់ប្រជាពលរដ្ឋទូទៅ ក្នុងការចូលរួម ថែរក្សាបរិស្ថាន និងសុខភាព ជាពិសេស គឺការចូលរួមចំណែក ក្នុងការបរិច្ចាគនូវថវិកា ជូនមន្ទីរពេទ្យកុមារអង្គរ ដើម្បីជួយសង្គ្រោះអាយុជីវិត កុមារកម្ពុជា ។ លោក បន្តថា បច្ចុប្បន្នមន្ទីរពេទ្យកុមារអង្គរ កំពុងមានភាពមមាញឹកក្នុងការជួយសង្គ្រោះ និងព្យាបាលជំងឺ ដល់កុមារ ដែលកំពុងមានការកើនឡើងឥតឈប់ឈរ ហើយក្នុងនោះមានតម្រូវការព្យាបាល ដោយឯកទេសជំនាញ មានចំនួនកាន់តែច្រើន ដែលជំងឺទាំងនោះមានដូចជា ជំងឺមហារីក តម្រងនោម ប្រព័ន្ធប្រសាទ ជំងឺទារក និងជំងឺមួយចំនួនទៀត ។
![](https://dap-news.com/wp-content/uploads/2022/08/photo_2022-08-15_14-25-12-1-1024x682.jpg)
គួរបញ្ជាក់ផងដែរថា ព្រឹត្តិការណ៍នាឆ្នាំនេះ ទទួលបានការចូលរួមពីសាធារណជន ក្រុមហ៊ុនឯកជន និងសា្ថប័ននានា ប្រមាណ ១០០០នាក់ ដែលការជិះកង់នេះ ចាប់ផ្តើមចេញពី គ្រឹះស្ថានអង្គរ (នៅផ្លូវ៦០ ម៉ែត្រ) ឆ្ពោះទៅឧទ្យានព្រៃអង្គរ ជាមួយការឆ្លងកាត់ ប្រាសាទបាយ័ន លានជល់ដំរី សំដៅទៅសាលាបឋមសិក្សានគរក្រៅ ដែលជាទីតាំង បញ្ចប់កម្មវិធី បន្ថែមពីនេះ មីជាតិក៏បានចូលរួមផ្តល់ ជាកញ្ចប់អំណោយដល់សិស្សានុសិស្ស នៅសាលាបឋមសិក្សានគរក្រៅផងដែរ ។
![](https://dap-news.com/wp-content/uploads/2022/08/photo_2022-08-15_14-26-06-1-1024x682.jpg)
ក្នុងនាមជាផលិតផលជាតិ មីជាតិ សូមអំពាវនាវដល់ប្រជាពលរដ្ឋខ្មែរទាំងអស់ ចូលរួមគាំទ្រសកម្មភាព សប្បុរសធម៌នានា ក៏ដូចជាផលិត ផលជាតិ ដើម្បីរួមចំណែកលើកកម្ពស់ និងអភិវឌ្ឍន៍សេដ្ឋកិច្ចជាតិ ។ ឆ្លើយតបនឹងការគាំទ្រពីសំណាក់ប្រជាពលរដ្ឋកម្ពុជា មីជាតិប្តេជ្ញាចិត្ត បន្តចូលរួមចំណែកក្នុងសកម្មភាពសង្គម និងសប្បុរសធម៌នានា បន្ថែមទៀត ៕
![](https://dap-news.com/wp-content/uploads/2022/08/photo_2022-08-15_14-25-16-1-1024x683.jpg)
![](https://dap-news.com/wp-content/uploads/2022/08/photo_2022-08-15_14-25-21-1-1024x576.jpg)
![](https://dap-news.com/wp-content/uploads/2022/08/photo_2022-08-15_14-25-26-1-1024x575.jpg)
![](https://dap-news.com/wp-content/uploads/2022/08/photo_2022-08-15_14-25-30-1-1024x576.jpg)
![](https://dap-news.com/wp-content/uploads/2022/08/photo_2022-08-15_14-25-34-1-1024x682.jpg)
![](https://dap-news.com/wp-content/uploads/2022/08/photo_2022-08-15_14-25-40-1-1024x575.jpg)
![](https://dap-news.com/wp-content/uploads/2022/08/photo_2022-08-15_14-25-44-2-1024x576.jpg)
![](https://dap-news.com/wp-content/uploads/2022/08/photo_2022-08-15_14-25-49-1-1024x768.jpg)
![](https://dap-news.com/wp-content/uploads/2022/08/photo_2022-08-15_14-25-57-1-1024x768.jpg)
![](https://dap-news.com/wp-content/uploads/2020/08/1-1.png)