ស្ត្រីជាប់ចោទម្នាក់ត្រូវបាន តុលាការផ្តន្ទាទោស ដាក់គុក ៣០ឆ្នាំ ពាក់ព័ន្ធនឹងការ ជួញដូរគ្រឿងញៀនជិត១ គីឡូក្រាម

ភ្នំពេញ៖ សាលាដំបូងរាជធានីភ្នំពេញ កាលពីព្រឹក ថ្ងៃទី ១១ ខែ តុលា ឆ្នាំ ២០២២ នេះ បានប្រកាសសាលក្រម និង សម្រេចកាត់ទោស ស្រ្តីជាប់ចោទម្នាក់ ដាក់គុក កំណត់ ៣០ ឆ្នាំ និង ពិន័យ ជាប្រាក់ចំនួន ១០ លានរៀល សម្រាប់បង់​ចូល​ថវិកា​រដ្ឋ​ ជាប់ពាក់ព័ន្ធការជួញដូរគ្រឿងញៀន ជិត ១ គីឡូក្រាម ប្រព្រឹត្ត នៅ​តាម​បណ្ដោយ​ផ្លូវ​វេង​ស្រេង ភូមិ​ជ្រៃ​កោង សង្កាត់​ចោមចៅ​ទី ២ ខណ្ឌ​ពោធិ៍​សែន​ជ័យ រាជធានី​ភ្នំពេញ កាលពីអំឡុងខែ មីនា ឆ្នាំ ២០២២។

លោក រស់ ពិសិដ្ឋ ជាប្រធាន​ក្រុមប្រឹក្សា​ជំនុំជម្រះ​ នៃ សាលាដំបូងរាជធានីភ្នំពេញ បានឲ្យថ្លែងឱ្យដឹងថា: ស្រ្តីជាប់ចោទ រូបនេះ មានឈ្មោះ អ៊ូច សុខនី ភេទ​ស្រី អាយុ ២៩ ឆ្នាំ មានមុខរបរ មិនពិតប្រាកដ។

ស្រ្តីជាប់ចោទរូបនេះ ត្រូវបានជាប់ចោទពីបទ: រក្សាទុកក ដឹកជញ្ជូន​ដោយ​ខុសច្បាប់​នូវ​សារធាតុ​ញៀន តាមមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន និង ត្រូវចាប់ខ្លួន កាលពីថ្ងៃទី ២៣ ខែមីនា ឆ្នាំ ២០២២ នៅភូមិ​ជ្រៃ​កោង សង្កាត់​ចោមចៅ​ទី ២ ខណ្ឌ​ពោធិ៍​សែន​ជ័យ រាជធានី​ភ្នំពេញ ។

សមត្ថកិច្ចនគរបាលប្រឆាំងគ្រឿងញៀន ដកហូតបានគ្រឿងញៀនប្រភេទម៉ាទឹកកក ចំនួន ជិត ១ គីឡូក្រាម  ពីនាង ៕

ដោយ: លីហ្សា