ព័ត៌មានជាតិ

រាជរដ្ឋាភិបាល ផ្តល់អាទិភាពខ្ពស់លើការងារគ្រប់គ្រងគ្រោះមហន្តរាយ បន្ទាប់ពីកម្ពុជា ស្ទើរជារៀងរាល់ឆ្នាំ ទទួលរងផលប៉ះពាល់គ្រោះមហន្ដរាយផ្សេងៗ

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានថ្លែងឲ្យដឹងថា នៅកម្ពុជា ស្ទើរតែជារៀង រាល់ឆ្នាំ ទទួលរងប៉ះពាល់ពីទឹកជំនន់ រាំងស្ងួត ខ្យល់កន្ដ្រាក់ រន្ទះបាញ់ បាក់ច្រាំងទន្លេ និងគ្រោះមហន្ដរាយផ្សេងៗទៀត ហើយរាជរដ្ឋាភិបាល យកចិត្តទុកដាក់ខ្ពស់បំផុតចំពោះបញ្ហាទាំងនេះ។

តាមរយៈសារលិខិតរបស់សម្ដេចតេជោ ក្នុងឱកាសទិវាជាតិគ្រប់គ្រងគ្រោះមហន្ដរាយ នាថ្ងៃទី១៣ ខែតុលា ឆ្នាំ២០២២ បានបញ្ជាក់ថា រហូតមកទល់ពេលនេះ ពិភពលោកកំពុងទទួលឥទ្ធិពល នៃការប្រែប្រួលអាកាសធាតុបណ្តាលឲ្យកើតមានគ្រោះមហន្តរាយធំៗជាច្រើន បង្កផលប៉ះពាល់ដល់អាយុជីវិត ទ្រព្យសម្បត្តិ និងសេដ្ឋកិច្ចសង្គមធ្ងន់ធ្ងរបន្ថែមលើឱនភាពសកល ដែលបានកើតឡើងដោយសារមូលហេតុផ្សេងៗ និងភាពផុយស្រួយ នៃការងើបឡើងវិញរបស់សេដ្ឋកិច្ចសកលពីជំងឺកូវីដ-១៩។

សម្ដេចតេជោបញ្ជាក់ថា «សម្រាប់កម្ពុជា ស្ទើរជារៀង រាល់ឆ្នាំ បានរងផលប៉ះពាល់ពីទឹកជំនន់ រាំងស្ងួត ខ្យល់កន្ត្រាក់ រន្ទះបាញ់ បាក់ច្រាំងទន្លេ និងគ្រោះមហន្តរាយផ្សេងៗទៀត។ ទោះជាយ៉ាងណារាជរដ្ឋាភិបាលកម្ពុជា បានផ្តល់ អាទិភាពខ្ពស់លើការងារគ្រប់គ្រងគ្រោះមហន្តរាយ ដោយបានពុះពារគ្រប់ឧបសគ្គ ប្រយុទ្ធលើគ្រប់សមរភូមិ ម្ចាស់ការបានលើគ្រប់ទិដ្ឋភាព និងគ្រប់កាលៈទេសៈ»។

សម្ដេចតេជោបន្ដថា ដោយមានគណៈកម្មាធិការជាតិគ្រប់គ្រងគ្រោះ មហន្តរាយជាសេនាធិការរាជរដ្ឋាភិបាលកម្ពុជា អនុវត្តការងារគ្រប់គ្រងគ្រោះមហន្តរាយ ដោយការវិនិយោគ ជារួមទៅលើកំណើនសេដ្ឋកិច្ចដែលជាឆ្អឹងខ្នងនៃសមត្ថភាពជាតិក្នុងការគ្រប់គ្រង និងការកាត់បន្ថយហានិភ័យគ្រោះមហន្តរាយ រួមនឹងការវិនិយោគដោយផ្ទាល់ទៅលើវិស័យជួរមុខ រួមមាន ៖ វិស័យកសិកម្ម ធនធានទឹក ហេដ្ឋារចនាសម្ព័ន្ធដឹកជញ្ជូន បរិស្ថាន សន្តិសុខ និងការពារជាតិ ជាដើម។

សម្ដេចតេជោបន្ថែមថា ជាមួយគ្នានេះ ក៏បានបញ្ជ្រាប និងធ្វើសមាហរណកម្មតាមបែបរូបវន្ត និងអរូបវន្តនៃសកម្មភាពគ្រប់គ្រងគ្រោះមហន្តរាយទៅក្នុងការវិនិយោគ និងផែនការអភិវឌ្ឍតាមវិស័យ ក្នុងចំណោមក្រសួង ស្ថាប័ន រាជរដ្ឋាភិបាល ទាំងនៅថ្នាក់ជាតិនិងថ្នាក់ក្រោមជាតិ សំដៅធានាឲ្យការងារគ្រប់គ្រងគ្រោះមហន្តរាយ ក្លាយជាចលករ ជាធាតុចូល និងជាមូលដ្ឋានគ្រឹះ នៃការអភិវឌ្ឍប្រទេសជាតិប្រកបដោយនិរន្តរភាព៕

To Top