ព័ត៌មានជាតិ

សម្តេចតេជោថា ទណ្ឌិត សម រង្ស៊ី នឹងស្លាប់ចោលឆ្អឹង នៅក្រៅប្រទេស

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃ​កម្ពុជា ​បានគូសបញ្ជាក់យ៉ាងធ្ងន់ៗ ជាសាធារណៈថាទណ្ឌិត​ សម​ រង្ស៊ី​ នឹងស្លាប់ចោលឆ្អឹង នៅក្រៅប្រទេសជាមិនខាន ដោយមិនអាចចូលមក ក្នុងប្រទេសបានទេ។

ក្នុង​ឱកាស​អញ្ជើញទៅប្តូរព័ត៌មានថ្ងៃខែឆ្នាំ កំណើតក្នុងបញ្ជីឈ្មោះបោះឆ្នោត នៅសាលាសង្កាត់ក្រុងតាខ្មៅ ខេត្តកណ្តាល នាព្រឹកថ្ងៃទី២០ តុលា សម្តេចតេជោ ហ៊ុន សែន បានលើកឡើងថា សម រង្ស៊ី គ្មានផ្លូវអាចចូល មកក្នុងប្រទេសបានទេ នឹងស្លាប់ចោលឆ្អឹង នៅក្រៅប្រទេសជាមិនខាន។

សម្តេចបញ្ជាក់ថា «No Way , អត់មានផ្លូវទេ ខ្ញុំបានលើកលែងឲ្យ ជនក្បត់ជាតិចំនួន ២ដងមកហើយ តែជនក្បត់ជាតិនេះមិនត្រឹមតែ មិនធ្វើការកែប្រែទេ ក៏ប៉ុន្តែពួកគេនៅតែបន្តបំផ្លិច បំផ្លាញកម្ពុជា ដូច្នេះខ្ញុំមិនត្រឹមតែមិនលើកដៃ ចុះហត្ថលេខាលើកលែងទោសឲ្យជនក្បត់ នេះទេប៉ុណ្ណោះទេ ផ្ទុយទៅវិញខ្ញុំកំពុងតែបំផុសចលនា កម្ចាត់ចោលនៃមនោគមន៍វិជ្ជាជ្រុលនិយម នៃជនក្បត់៣ជំនាន់ នេះ»។

សម្តេចបានលើកឡើងថា ប៉ុន្មានថ្ងៃមកនេះមានការគាំទ្រខ្លាំង ក្នុងនោះក៏មានទាំងសម្តេចសង្ឃ​ បួរ គ្រី ក៏បានគាំទ្រផងដែរ ក្នុងការកម្ចាត់ចោលនយោបាយ ជ្រុលនិយមនេះនៅក្នុងប្រទេ សកម្ពុជា។ កម្ពុជាដើម្បីធានាសន្តិភាពនិងស្ថេរភាព គឺចាំបាច់ត្រូវបំផ្លាញចោល នូវមនោគមន៍វិជ្ជាជ្រុលនិយមនេះ។

សម្តេចនាយករដ្ឋមន្ត្រី បានគូសបញ្ជាក់យ៉ាងដូច្នេះថា «ខ្ញុំសន្មតថា មនុស្សនេះ (ទណ្ឌិតសម រង្ស៊ី) ចោលឆ្អឹងក្រៅស្រុក ដូច្នេះសូមកុំសង្ឃឹម ! ពិតណាស់ខ្ញុំធ្លាប់ នៅទីនេះមិនឆ្ងាយប៉ុន្មានទេពីផ្ទះខ្ញុំ ! ខៀវ សំផន នួនជា អៀង សារី និងអ្នកដទៃទៀត ធ្លាប់មកបាយជាមួយខ្ញុំ វ៉ៃគ្នាសឹងតែពាក់កណ្តាលជីវិត ចុងក្រោយមកទទួលទានបាយជា មួយគ្នានៅផ្ទះ។ ប៉ុន្តែអាមួយនេះ «រង្ស៊ី» គ្មានផ្លូវ ហើយសូមបញ្ចប់ និងចប់ត្រឹមហ្នឹង»។

ជាមួយគ្នានោះដែរសម្តេចតេជោ បានលើកឡើងថា សម្តេចនឹងធ្វើចលនា ដូចដែលសម្តេចធ្លាប់ធ្វើចលនា រំលាយចោលអង្គការចាត់តាំងរបស់ ខ្មែរក្រហមកន្លងមកទទួលបានជោគជ័យ។ ការធ្វើនេះគឺតាមរយៈអំពាវនាវ ដល់ប្រជាពលរដ្ឋដែលយល់ខុស ពីជនក្បត់ជាតិ ឲ្យងាកចេញ ហើយយន្តការផ្លូវច្បាប់ក៏ត្រូវធ្វើ។

សម្តេចធ្លាប់បានបញ្ជាក់ថា គណបក្សនយោបាយណា ដែលផ្សាភ្ជាប់នឹងជនក្បត់មូយនេះ ក្រុមនេះត្រូវប្តឹងទៅតុលាការ ដើម្បីរំលាយចោលតែម្តង ដែលចំណុចនេះ មានចែងក្នុងច្បាប់។

សម្តេចក៏បានរំលឹកថា «បើខ្ញុំចុះហត្ថលេខាលើកលែងទោស ខ្ញុំនឹងកាត់ដៃគ្រវាត់ចោល តើខ្ញុំសុខចិត្តទេ? ខ្ញុំមិនសុខចិត្តទេ! អីញ្ចឹងសូមកុំសង្ឃឹមរង់ចាំទៅ ហើយអ្វីដែលចង់ផ្តួលរំលំនៅឆ្នាំ២០២៣ សូមធ្វើទៅ ខ្ញុំកំដរដល់ទីបញ្ចប់។ បងប្អូនដែលជាប់ពាក់ព័ន្ធ គឺទទួលបាបកម្មទៅវិញ ដូច្នេះសូមដកខ្លួនទៅឲ្យឆ្ងាយពីជននេះ» ៕

To Top