ភ្នំពេញ៖ ឯកឧត្តម Joseph R. Biden, Jr., ប្រធានាធិបតីសហរដ្ឋអាមេរិក បានបញ្ជាក់ពីដំណើរទស្សនកិច្ច របស់ឯកឧត្តមមកកាន់ព្រះរាជាណាចក្រកម្ពុជា ដើម្បីចូលរួមកិច្ចប្រជុំកំពូលអាមេរិក-អាស៊ាន និងកិច្ចប្រជុំកំពូលអាស៊ីបូព៌ា។
យោងតាមសារព័ត៌មានកម្ពុជា AKP ចេញផ្សាយនៅថ្ងៃទី២៩ ខែតុលា ឆ្នាំ២០២២ បានឱ្យដឹងដោយយោងតាមសេចក្តីប្រកាសព័ត៌មានរបស់សេតវិមានចុះថ្ងៃទី ២៨ ខែតុលាថា ប្រធានាធិបតីសហរដ្ឋអាមេរិក នឹងមករាជធានីភ្នំពេញនៅថ្ងៃទី ១២-១៣ ខែវិច្ឆិកា សម្រាប់កិច្ចប្រជុំកំពូលប្រចាំឆ្នាំចំនួនពីរ។
នៅកម្ពុជា ប្រភពដដែលបានចង្អុលបង្ហាញថា ឯកឧត្តម Joe Biden នឹងបញ្ជាក់ឡើងវិញនូវ ការប្តេជ្ញាចិត្តយូរអង្វែងរបស់សហរដ្ឋអាមេរិកចំពោះអាស៊ីអាគ្នេយ៍ និងតំបន់កណ្តាលអាស៊ាន ដោយកសាងភាពជោគជ័យ នៃកិច្ចប្រជុំកំពូលពិសេសអាមេរិក-អាស៊ាន ជាប្រវត្តិសាស្ត្រ នៅទីក្រុងវ៉ាស៊ីនតោនឌីស៊ី។
សេចក្តីថ្លែងការណ៍បានបន្ថែមថា ឯកឧត្តមប្រធានាធិបតីនឹងបញ្ជាក់ពីសារៈសំខាន់ នៃកិច្ចសហប្រតិបត្តិការរវាងសហរដ្ឋអាមេរិក និងអាស៊ាន ក្នុងការធានាសន្តិសុខ និងវិបុលភាពនៅក្នុងតំបន់ និងសុខុមាលភាពនៃ ប្រជាជនរួមមួយពាន់លាននាក់របស់ពួកគេ។
ក្នុងនាមជាប្រធានអាស៊ាន សម្រាប់ឆ្នាំ២០២២ កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ាន លើកទី៤០ និងទី៤១ និងកិច្ចប្រជុំកំពូលពាក់ព័ន្ធ ចាប់ពីថ្ងៃទី៨ដល់១៣ ខែវិច្ឆិកា៕
