ភ្នំពេញ៖ ផ្ដើមចេញពីការលេង ប្រណាំងទូកត្នោត ក្នុងភូមិព្រៃស្នួល កាលពីឆ្នាំ២០២១ កន្លងទៅ ឥឡូវនេះត្រូវបានឈានដល់កំរិត ថ្នាក់ឃុំ ហើយ ដោយមានការចូលរូម ពីសំណាក់រដ្ឋបាលឃុំរវៀង ព្រមទាំងក្រុមការងារគណបក្សប្រជាជនកម្ពុជា ចុះជួយឃុំរវៀង ផងដែរ។
តាមរយៈនៃការចូលរួមនេះ ជំនួសមុខឱ្យអ្នកភូមិព្រៃស្នួល បានថ្លែងអំណរគុណដល់ ឧត្តមសេនីយ៍ឯក មុំ សោភ័ណ តំណាងក្រុមការងារជួយឃុំរវៀង និង លោក កឹម ពន្លក មេឃុំរវៀង ព្រមទាំងថ្នាក់ដឹកនាំឃុំ ដែលបាននាំយក អំណោយរបស់ឃុំ ដែលប្រជាពលរដ្ឋទូទាំងឃុំនិងសាលា បានជួយឧបត្ថម្ភ មានទឹកភេសជ្ជៈ ថវិកា ជិត៣លានរៀល មករួមចំណែកពិធីបុណ្យអុំទូក អកអំបុក សំពះព្រះខែ លយប្រទីប នៅភូមិព្រៃស្នួល។
នាឱកាសនោះ លោក សយ សុភាព បានជម្រាបប្រាប់ថ្នាក់ដឹកនាំឃុំថា ពិធីបុណ្យអុំទូកនេះបាន ឈានដល់កំរិតថ្នាក់ឃុំហើយ ហើយលោក អរគុណចំពោះប្រជាពលរដ្ឋទូទាំងឃុំរវៀង ដែលបានរួមគ្នាគាំទ្រពិធីបុណ្យអុំទូក។ ជាពិសេសក្រុមការងារថ្នាក់ឃុំ បានផ្សារភ្ជាប់ជាមួយថ្នាក់ដឹកនាំភូមិ សហគមន៏ ដែលធ្វើឱ្យដំណើររៀបចំពិធី បានតាមការគិតគូរ ទុកជាមុន។
ឆ្លៀតក្នុងឱកាសនេះ លោក សយ សុភាព ក៏បានអរគុណដល់ថ្នាក់ដឹកនាំ ស្រុកសំរោង ដែលបានស្តារប្រឡាយព្រៃស្នួល ឱ្យជ្រៅដែលបានផ្តល់អំណោយផល សម្រាប់អ្នកភូមិ បង្ករបង្កើនផល និងប្រារព្ធពិធីបុណ្យអុំទូក ហើយថែមទាំង បានជួយគាំទ្រ ការអភិវឌ្ឍន៍បន្តរបស់ភូមិ ឃុំ ។
ក្រៅពីប្រណាំងទូកនាពេលថ្ងៃ ក៏មានការរៀបចំ បាញ់កាំជ្រួច បង្ហោះគោម នៅពេលរាត្រីផងដែរ៕
សូមបញ្ជាក់ថា ភូមិព្រៃស្នួលបាននឹងកំពុងត្រៀម រៀបចំឱ្យមានការលេងប្រណាំងទូក ជាលើកទី២ ដែលគ្រោងនឹងប្រព្រឹត្តិទៅ ចាប់ពីថ្ងៃទី៧ដល់ថ្ងៃទី៩ ខែវិច្ឆិកា ឆ្នាំ២០២២ខាងមុខនេះ។
ភូមិព្រៃស្នួលបានប្រែមុខមាត់ថ្មី ក្រោមការជួយឧបត្ថមគាំទ្រផ្ទាល់ ពីសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា តាមរយៈការកែលំអ ផ្លូវថ្នល់ បំពាក់អំពូលភ្លើងសូឡា ក៏ដូចជាការស្ដារហេដ្ឋារចនាសម្ព័ន្ធ ប្រឡាយទឹក សម្រាប់ប្រជាពលរដ្ឋ ធ្វើស្រែប្រាំង ជាពិសេសរៀបចំឱ្យព្រឹត្តិការណ៍ សប្បាយរីករាយ ជាប់ជាប្រចាំផងដែរ ក្នុងឱកាសពិធីបុណ្យប្រពៃណីជាតិខ្មែរ ដូចជាពិធីបុណ្យអុំទូក នេះជាដើម។
កម្មពីធីប្រណាំងទូកស្មាច់លើកទី២ នៅភូមិព្រៃស្នួល នាឆ្នាំនេះ ក៏មានការអញ្ជើញចូលរួមជាអធិបតីភាព ពីសំណាក់ លោក អ៊ួច ភា អភិបាលខេត្តតាកែវផងដែរ។
ជាមួយនឹងការត្រៀមរៀបចំ ឱ្យការប្រណាំងទូកស្មាច់លើកទី២នេះ លោក សយ សុភាព តំណាងឱ្យអ្នកភូមិព្រៃស្នួល បានអំពាវនាវដល់ប្រជាពលរដ្ឋ ព្រមទាំងមន្រ្តីអាជ្ញាធរ ជិតឆ្ងាយទាំងអស់ អញ្ជើញចូលរួម និងជូយឧបត្ថម្ភ តាមការគួរ ដើម្បីឱ្យពិធីបុណ្យប្រណាំងទូក សប្បាយរីករាយបន្ថែមទៀត៕
