ភ្នំពេញ៖ នៅក្នុងជំនួបទ្វេភាគី ជាមួយឧត្តមសេនីយ៍ឯក ថេត ផូន (Thet Pone) មេបញ្ជាការ ការិយាល័យប្រតិបត្តិការ ពិសេសលេខ៥ នៃកងទ័ពជើងគោក មីយ៉ាន់ម៉ា ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោកបានលើកឡើងថា កម្ពុជាចង់ឃើញមីយ៉ាន់ម៉ា អាចដោះស្រាយបាននូវបញ្ហាចំពោះមុខ នឹងឆាប់វិលទៅរកប្រក្រតីភាពទ្បើងវិញ។
![](https://dap-news.com/wp-content/uploads/2022/11/photo_2022-11-10_09-24-02-1024x682.jpg)
ការលើកឡេីងនេះ ធ្វើឡើងក្នុងឱកាស មេទ័ពនៃប្រទេសទាំងពីរ អញ្ជើញចូលរួម កិច្ចប្រជុំពហុភាគី មេបញ្ជាការកងទ័ពជើងគោក អាស៊ាន លើកទី២៣ ដែលប្រព្រឹត្តទៅ នៅរដ្ឋធានីហាណូយ នៃសាធារណរដ្ឋសង្គមនិយមវៀតណាម ។
![](https://dap-news.com/wp-content/uploads/2022/11/photo_2022-11-10_09-24-06-778x1024.jpg)
ក្នុងជំនួបនោះ ឧត្តមសេនីយ៍ឯក ថេត ផូន បានថ្លែងអរគុណរាជរដ្ឋាភិបាលកម្ពុជា ដែលបានជួយជ្រោមជ្រែង ដល់ប្រទេសមីយ៉ាន់ម៉ា ទាំងក្នុងការ ឧបត្ថម្ភសម្ភារបរិក្ខារ ក្នុងការប្រយុទ្ធប្រឆាំងនឹង ជំងឺកូវីដ-១៩ និងការជួយដោះស្រាយ នូវបញ្ហាចំពោះមុខនានា ក្នុងនាមជាប្រធានអាស៊ាន។
![](https://dap-news.com/wp-content/uploads/2022/11/photo_2022-11-10_09-24-13-1024x683.jpg)
លោក ថេត ផូន បានសម្តែងនូវការជឿជាក់ថា ប្រទេសទាំងពីរកម្ពុជា-មីយ៉ាន់ម៉ា នឹងបន្តចំណងកិច្ចសហប្រតិបត្តិការដ៏ល្អ ឮតទៅ ទៀតទាំងក្នុងក្របខ័ណ្ឌទ្វេភាគី និងក្របខ័ណ្ឌតំបន់។
![](https://dap-news.com/wp-content/uploads/2022/11/photo_2022-11-10_09-24-19-1024x683.jpg)
ជាការឆ្លើយតប ឧត្តមសេនីយ៍ឯក ហ៊ុន ម៉ាណែត បានលើកទ្បើងថា «កម្ពុជាចង់ឃើញមីយ៉ាន់ម៉ា អាចដោះស្រាយបាននូវបញ្ហាចំពោះមុខ នឹងឆាប់វិលទៅប្រក្រតីភាពទ្បើងវិញ»។
![](https://dap-news.com/wp-content/uploads/2022/11/photo_2022-11-10_09-24-23-1024x683.jpg)
ឧត្តមសេនីយ៍ឯក ហ៊ុន ម៉ាណែត បន្ថែមថា ចំពោះកងទ័ពជើងគោក នៃកងយោធពលខេមរភូមិន្ទ បានត្រៀមខ្លួនជាស្រេចក្នុងការគាំទ្រ ចំពោះទិសដៅទៅមុខរបស់រដ្ឋាភិបាល និងក្រសួងការពារជាតិ នៃប្រទេសទាំងពីរ ក្នុងការជំរុញនូវទំនាក់ទំនង កិច្ចសហប្រតិបត្តិការលើវិស័យសន្តិសុខ និងការពារជាតិ ដែលជាកិច្ចសហប្រតិបត្តិការ បែបយុទ្ធសាស្ត្រដ៏សំខាន់៕
![](https://dap-news.com/wp-content/uploads/2020/08/1-1.png)