ព័ត៌មានជាតិ

ព្រះមហាក្សត្រកម្ពុជា រាជានុញ្ញាតថ្វាយព្រះចៅស៊ុលតង់ នៃប្រទេសព្រុយណេ និងជូនប្រធានាធិបតី នាយករដ្ឋមន្ត្រី នៃបណ្តាប្រទេស ជាសមាជិកអាស៊ាន ចូលក្រាបថ្វាយបង្គំគាល់

ភ្នំពេញ ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យ ព្រះបរមរាជានុញ្ញាតថ្វាយព្រះចៅស៊ុលតង់ នៃប្រទេសព្រុយណេ ដារូសាឡឹម និងជូនប្រធានាធិបតី នាយករដ្ឋមន្ត្រីនៃបណ្តាប្រទេសជាសមាជិកអាស៊ានចូលក្រាបថ្វាយបង្គំគាល់ ថ្វាយព្រះពរ នៅថ្ងៃទី១០ ខែវិច្ឆិកា ឆ្នាំ២០២២ នៅព្រះទីនាំងទេវាវិនិច្ឆ័យក្នុងព្រះបរមរាជវាំង។ នេះបើយោងតាមការចេញផ្សាយរបស់ទូរទស្សន៍ជាតិកម្ពុជា។

អញ្ជើញចូលរួម ក្នុងព្រះរាជសវនាការដ៏ឧត្តុងឧត្តមនេះ មានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា, សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង, ឯកឧត្តម គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រីទទួលបន្ទុកកិច្ចការទូទៅ អមក្រសួងព្រះបរមរាជវាំង៕

To Top