ក្រុមហ៊ុន ជីប ម៉ុង ប្រគល់ភេសជ្ជៈជិត៨ពាន់កេស ជូនរដ្ឋបាលរាជធានី សម្រាប់ឧបត្ថម្ភកងកម្លាំង ចូលរួមរក្សាសន្តិសុខសណ្តាប់ធ្នាប់ កិច្ចប្រជុំកំពូលអាស៊ាន

ភ្នំពេញ៖ ភេសជ្ជៈ ចំនួន ៧៨០០កេស ត្រូវបានក្រុមហ៊ុន ជីប ម៉ុង គ្រុប​ ប្រគល់ជូនរដ្ឋបាលរាជធានីភ្នំពេញ សម្រាប់ឧបត្ថម្ភជូនដល់កងកម្លាំងគ្រប់ប្រភេទ ដែលបានចូលរួមបំពេញ បេសកកម្ម ក្នុងការរក្សាសន្តិសុខ សណ្តាប់ធ្នាប់ នាកិច្ចប្រជុំកំពូលអាស៊ាន លើកទី៤០ និងទី៤១ និងកិច្ចប្រជុំពាក់ព័ន្ធ នៅព្រះរាជាណាចក្រកម្ពុជា នាពេលកន្លងទៅថ្មីៗនេះ។

ពិធីប្រគល់ ទទួលនេះបានធ្វើឡើង​ នារសៀលថ្ងៃទី១៦ វិច្ឆិកា​ ឆ្នាំ២០២២ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ និងអ្នកឧកញ៉ា លាង ឃុន ប្រធានក្រុមប្រឹក្សាភិបាល ក្រុមហ៊ុន ជីប ម៉ុង គ្រុប នៅសាលារាជធានីភ្នំពេញ។

ក្នុងឱកាសនោះ លោកឃួង ស្រេង បានថ្លែងអំណរគុណយ៉ាងជ្រាលជ្រៅ ចំពោះ អ្នកឧកញ៉ា ប្រធានក្រុមប្រឹក្សាភិបាល ដែលបានផ្តល់ភេសជ្ជៈសម្រាប់ជាការលើកទឹកចិត្តដ៏ធំធេង ដល់កងកម្លាំងទាំងអស់យបដែលបាន​ប្ដេជ្ញា​យ៉ាង មោះមុតក្នុងការបំពេញភារកិច្ច ជូនរាជរដ្ឋាភិបាលកម្ពុជា ដែលមាន សម្ដេចតេជោ ហ៊ុន សែន ជា អគ្គមគ្គុទ្ទេសក៍ដ៏ឧត្តុង្គឧត្តម ក្នុងការសម្រេចបាននូវសមិទ្ធផលថ្មីៗ ថែមទៀតជូនជាតិមាតុភូមិ៕