ភ្នំពេញ៖ លោក ខូយ រីដា អភិបាលខេត្តពោធិ៍សាត់ និងជាប្រធានគណៈបញ្ជាការឯកភាពខេត្ត បានដាស់តឿន ដល់គណៈបញ្ជាការឯកភាពស្រុក ក្រុង ឃុំ សង្កាត់ មន្ទីរ និងអង្គភាពត្រូវប្រើប្រាស់ភ្នែក ឱ្យបានច្រើនជាងត្រចៀក ទើបអនុវត្តន៍ការងារ ទៅទទួលបានលទ្ធផលជោគជ័យ និងចំគោលដៅ បើមិនដូច្នោះទេ នឹងប៉ះពាល់សតិអារម្មណ៍របស់ប្រជាពលរដ្ឋ និងមានការថ្នាំងថ្នាក់ដល់ថ្នាក់ដឹកនាំ ជាពិសេសប្រមុខរាជរដ្ឋាភិបាលកម្ពុជា។ នេះបើយោងតាម រដ្ឋបាលខេត្តពោធិ៍សាត់។
លោក ខូយ រីដា មានប្រសាសន៍ក្រើនរំលឹកបែបនេះ នៅសាលប្រជុំសាលាខេត្ត ក្នុងឱកាសដឹកនាំប្រជុំគណៈបញ្ជាការឯកភាពខេត្ត ប្រចាំខែធ្នូ ឆ្នាំ២០២២ និងលើកទិសដៅអនុវត្តបន្ត សម្រាប់ខែមករា ឆ្នាំ២០២៣ ដោយមានការចូលរួមពីគណៈ បញ្ជាការឯកភាពស្រុក ក្រុងទាំង៧ ថ្នាក់ដឹកនាំបណ្តាមន្ទីរ កងកម្លាំងប្រដាប់អាវុធគ្រប់កងឯកភាព។
បន្ទាប់ពីគណៈបញ្ជាការឯកភាពស្រុក ក្រុង និងបណ្តាមន្ទីរអង្គភាពមួយចំនួន បានលើកឡើង ពីបញ្ហាប្រឈមនៅក្នុងមូលដ្ឋាន ដែលបង្កឡើងដោយសកម្មជនដីធ្លី មករុករាន កាប់ឆ្កាដីព្រៃរបស់រដ្ឋ និងដីព្រៃសហគមន៍ ធ្វើជាកម្មសិទ្ធិនៅក្នុងស្រុកវាលវែង និងស្រុកភ្នំក្រវាញនោះរួចមក, លោក ខូយ រីដា បានដាក់ចំណាត់ការយ៉ាងម៉ឺងម៉ាត់ ចំពោះបទល្មើសព្រៃឈើ ជលផល ដែលសកម្ម ភាពទាំងអស់នេះ តែងតែកើតមានដដែលៗ ហេតុនេះសូមឱ្យអាជ្ញាធរដែនដី មន្ត្រីជំនាញ និងស្ថាប័នដែលមានការពាក់ព័ន្ធ ត្រូវប្រើប្រាស់ភ្នែកឱ្យបានច្រើនជាងត្រចៀក ត្រូវរួមសហការគ្នាចុះបង្ការបង្ក្រាប និងរកឱ្យឃើញសកម្មជនដីធ្លីចំណាកស្រុក ដែលចូលមកកាប់បំផ្លាញព្រៃឈើ និងនេសាទដោយខុសច្បាប់ ត្រូវមានវិធានការ ទៅតាមផ្លូវច្បាប់។ កន្លងមកមានសមត្ថកិច្ចមួយចំនួន ក្នុងនោះក៏មានអ្នកសារព័ត៌មានផងដែរ បានចុះមកធ្វើសកម្មភាពទាំងនៅបឹងទន្លេសាប និងនៅស្រុកវាលវែង ស្រុកភ្នំក្រវាញ ពុំមានលិខិតបេសកកម្ម និងមិនបានឆ្លងកាត់មូលដ្ឋាន ធ្វើឱ្យប្រជាជនមានការថ្នាំងថ្នាក់ មិនពេញចិត្តមន្ត្រីទាំងនោះ ហេតុនេះសូមឱ្យមន្ត្រីមន្ទីរជំនាញ ដែលមានការពាក់ព័ន្ធ ត្រូវចាត់វិធានការបង្ការទប់ស្កាត់។
ដើម្បីឱ្យការអនុវត្ត សម្រាប់ខែមករា ឆ្នាំ២០២៣ កាន់តែប្រសើរថែមទៀតនោះ លោក ខូយ រីដា បានដាក់ចេញផែនការសកម្មភាព គឺត្រូវយកចិត្តទុកដាក់ អនុវត្តរក្សាការពារសន្តិសុខ សណ្តាប់ធ្នាប់សាធារណៈ ជាពិសេសគោលនយោបាយ ភូមិ ឃុំ សង្កាត់ មានសុវត្ថិភាព លុបបំបាត់ល្បែងស៊ីសង គ្រឿងញៀន ថែរក្សាសោភ័ណភាពអនាម័យគ្រប់មន្ទីរ អង្គភាព និងទីប្រជុំត្រូវតែស្អាត គ្មានសំរាម បង្កលក្ខណៈសប្បាយ ក្នុងឱកាសថ្ងៃឆ្លងឆ្នាំសកល និងខួបលើកទី៤៤ ថ្ងៃជ័យជំនះ ៧ មករា, ពង្រឹងការផ្តល់សេវាជូនប្រជាពលរដ្ឋឱ្យបានទាន់ពេលវេលា, គ្រប់គ្រងមន្ត្រីរាជការ ត្រូវលើកទឹកចិត្តមន្ត្រីសកម្ម ពង្រឹងតួនាទី ភារកិច្ច សាមគ្គីផ្ទៃក្នុងល្អ និងចូលរួមសហការបង្ការបង្ក្រាបបទល្មើសធនធានធម្មជាតិ ព្រៃឈើ និងជលផល ឱ្យខាងតែបាន៕
