ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានចាត់ទុកឧបទ្ទវហេតុឆេះអគារកាស៊ីណូ នៅក្រុងប៉ោយប៉ែត ខេត្តបន្ទាយមានជ័យ គឺជាសោកនាកម្មយ៉ាងខ្លាំង ដែលបានកើតឡើងចុង ឆ្នាំ២០២២នេះ ខណៈតាមការប៉ានស្មានមានមនុស្សស្លាប់ ១៦នាក់ និងរងរបួសរាប់សិបនាក់ផងដែរ។
នាឱកាសអញ្ជើញបើកការដ្ឋានគម្រោងស្តារ និងលើកកម្រិតគុណភាពផ្លូវជាតិលេខ៣១ និងផ្លូវជាតិលេខ៣៣ នាថ្ងៃទី៣០ ខែធ្នូ ឆ្នាំ២០២២ សម្ដេចតេជោ ហ៊ុន សែន បានណែនាំដល់អាជ្ញាធរ ត្រូវមានការប្រុងប្រយ័ត្នខ្ពស់ ចំពោះការរុករកសាកសព ក្នុងករណីឆេះអាគារនេះ។
![](https://dap-news.com/wp-content/uploads/2022/12/photo_2022-12-30_10-01-54.jpg)
សម្ដេចតេជោ បានបញ្ជាក់ថា «ខ្ញុំ សូមយកឱកាសនេះ សូមចូលរួមរមណទុក្ខជាមួយនិងឧបទ្ទវហេតុភ្លើងឆេះកាស៊ីណូ នៅប៉ោយប៉ែត ដែលមានមនុស្សស្លាប់ជាង ១០នាក់ និងរបួសរាប់សិបនាក់»។
![](https://dap-news.com/wp-content/uploads/2022/12/photo_2022-12-30_10-01-51.jpg)
សម្ដេចតេជោ បន្ដថា ចំពោះឧបទ្ទវហេតុឆេះកាស៊ីណូនេះ អាជ្ញាធរពាក់ព័ន្ធបានគ្រប់គ្រងបានគិតត្រឹមយប់មិញនេះ ដោយមានការយករថយន្ដពន្លតអគ្គីភ័យរបស់ក្រសួងមហាផ្ទៃ ទៅជួយអន្ដរាគមន៍ផងដែរ។ សម្ដេច ថា ព្រឹកនេះ អាជ្ញាធរ ក៏បន្ដរកសាកសពបន្ថែមទៀត។
![](https://dap-news.com/wp-content/uploads/2022/12/photo_2022-12-30_10-01-48.jpg)
សម្ដេចតេជោ បញ្ជាក់ទៀតថា «តាមការប៉ានស្មានអាចនឹងមានមនុស្សអាចស្លាប់រហូតដល់ ១៦នាក់ ប៉ុន្ដែយើងរកឃើញ ១២នាក់ មនុស្សនៅទីនោះមានជាង ១ពាន់នាក់ និងបុគ្គលិកជាង ៥០០នាក់។ ហើយរបួស ៧៣នាក់ ទាំងខ្មែរ និងបរទេស ស្លាប់តាមការប៉ានស្មាន ១៦នាក់ ហើយរកឃើញ ១២នាក់ ឥឡូវយើងបន្ដរកទៀត នេះគឺជារឿងសោកនាកម្មមួយដែលបានកើត នៅក្នុងចុងឆ្នាំនេះ ដែលជារឿងអាក្រក់មួយ»។
![](https://dap-news.com/wp-content/uploads/2022/12/photo_2022-12-30_10-01-44.jpg)
សម្ដេចតេជោ ក៏បានថ្លែងអំណរគុណចំពោះភាគីថៃ ដែលបានចូលរួមពន្លត់អគ្គីភ័យ ក្នុងឧបទ្ទវហេតុ ភ្លើងឆេះកាស៊ីណូ នៅប៉ោយប៉ែត។
លើសពីនេះ សម្ដេចតេជោ ហ៊ុន សែន ក៏បានថ្លែងអំណរគុណ សម្ដេចក្រឡាហោម ស ខេង បានចុះធ្វើការណែនាំដោយផ្ទាល់ និងថ្លែងអំណរគុណ លោក កែ គឹមយ៉ាន ព្រមទាំងលោក អុំ រាត្រី ក៏ដូចជា កម្លាំងមានសមត្ថកិច្ចទាំងអស់ ដែលបានចូលរួមក្នុងការដោះស្រាយ ឧបទ្ទវហេតុនេះ»។
![](https://dap-news.com/wp-content/uploads/2022/12/photo_2022-12-30_10-01-41.jpg)
លើសពីនេះ សម្ដេចតេជោ ក៏បានស្នើអាជ្ញាធរពាក់ព័ន្ធ ត្រូវរៀបចំសណ្ដាប់ធ្នាប់ភ្លាមៗ នៅច្រកព្រំដែនប៉ោយប៉ែត នេះឡើងវិញ ដើម្បីសម្រួលដល់ចេញ-ចូល នៅច្រកពំ្រដែន។
![](https://dap-news.com/wp-content/uploads/2022/12/photo_2022-12-30_10-01-38-1024x768.jpg)
សូមបញ្ជាក់ថា អគ្គិភ័យនេះ បានកើតឡើងនា យប់ថ្ងៃទី២៨ ខែធ្នូ ឆ្នាំ២០២២ ខណៈមូលហេតុ ត្រូវបានគេរាយការណ៍ជំហ៊ានដំបូងថា ឆ្លងចរន្ដអគ្គិសនីនៅទីតាំងហ្គេមជាន់ក្រោម ហើយបានរីករាលដាលតែម្ដង។ ទីតាំងដែលឆេះនេះមានពីរអគារ ដោយក្នុងនោះឆេះផ្ដើមដំបូងចេញពីអគារហ្គេនដាយមិន និងរីករាលដាលទៅកាន់អគារប៉ោយប៉ែត រីសត៕
![](https://dap-news.com/wp-content/uploads/2020/08/1-1.png)