ភ្នំពេញ ៖ លោក វ៉ាង វិនធៀន ឯកអគ្គរដ្ឋទូតចិន ប្រចាំកម្ពុជា បានថ្លែងឱ្យដឹងថា ចិន នៅតែជួយដល់កម្ពុជា ជាបន្តបន្ទាប់ទៀត ទៅលើការអភិវឌ្ឍហេដ្ឋារចនាសម្ព័ន្ធ និងវិស័យនានានៅកម្ពុជា ។
នាឱកាសអញ្ជើញ បើកការដ្ឋានសាងសង់ពង្រីក និងលើកម្រិតគុណភាពកំណត់ផ្លូវជាតិលេខ៧ រួមជាមួយ សម្ដេចតេជោ ហ៊ុន សែន នាយករដ្ឋមន្រ្តីកម្ពុជា នាថ្ងៃទី៩ ខែមករា ឆ្នាំ២០២៣ លោក វ៉ាង វិនធៀន បានអបអរសាទរ ចំពោះប្រជាពលរដ្ឋនៅខេត្តកំពង់ចាម ក៏ដូចជាអបអរសាទរ ចំពោះកម្ពុជា ដែលទទួលបានសមិទ្ធផល ហេដ្ឋារចនាសម្ព័ន្ធថ្មីៗជាបន្តបន្ទាប់ ។
លោកទូត បញ្ជាក់ថា «ចិននៅតែបន្តជួយដល់កម្ពុជា ជាបន្តបន្ទាប់ទៀតទៅលើការអភិវឌ្ឍហេដ្ឋារចនាសម្ព័ន្ធនៅកម្ពុជា និងវិស័យផ្សេងៗ ជាច្រើនទៀតទៅតាមលទ្ធភាព ដែលអាចជួយទៅបាន តាមរយៈកិច្ចសហប្រតិបត្តិការដ៏ល្អ រវាងប្រទេសទាំងពីរ ហើយតាមរយៈសមិទ្ធផល កំណាត់ផ្លូវជាតិលេខ៧នៅថ្ងៃនេះ នឹងរួមចំណែកធ្វើឱ្យការធ្វើដំណើរ របស់ប្រជាពលរដ្ឋកាន់តែមាន ភាពល្អប្រសើរងាយស្រួល ព្រោះផ្លូវនេះត្រូវបានពង្រីកឱ្យធំទូលាយជាមុន» ។
ជាការឆ្លើយតប សម្ដេចនាយករដ្ឋមន្ដ្រី បានថ្លែងអំណរគុណចំពោះរដ្ឋាភិបាល និងប្រជាជនចិន ដែលបានចូលរួមចំណែកយ៉ាងសំខាន់ ក្នុងការអភិវឌ្ឍកម្ពុជា។ សម្តេច ពិតជារីករាយចំពោះការក្លាយជាដៃគូយុទ្ធសាស្ត្រ គ្រប់ជ្រុងជ្រោយជាមួយចិន ដែលនាំឱ្យកម្ពុជាទទួលបាន នូវប្រយោជន៍យ៉ាងច្រើន៕
