ភ្នំពេញ៖ លោក កាណូ តាគេហ៊ីរ៉ូ (KANO Takehiro) អគ្គនាយកនៃទីស្នាក់ការកិច្ចសហប្រតិបត្តិការ សន្តិភាពអន្តរជាតិ នៃគណៈរដ្ឋមន្រ្តីជប៉ុន បានថ្លែងថា កម្ពុជាបង្ហាញពីគំរូដ៏ល្អនៅក្នុងវិស័យសន្តិភាព និងសន្តិសុខអន្តរជាតិ ហើយត្រូវបានទទួលស្គាល់ថា ជាអ្នកផ្តល់សន្តិភាព ។
ការលើកឡើងរបស់លោក កាណូ តាគេហ៊ីរ៉ូ បែបនេះ ក្នុងឱកាសចូលជួបសម្តែងការគួរសម ជាមួយលោ កប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេសកម្ពុជា នៅថ្ងៃទី៧ ខែមីនា ឆ្នាំ២០២៣ ។
![](https://dap-news.com/wp-content/uploads/2023/03/MFAIC-PIC-6-1024x683.jpg)
ក្នុងជំនួបនោះភាគីទាំងពីរ មានការពេញចិត្តចំពោះ ទំនាក់ទំនងទ្វេភាគីដ៏រឹងមាំ ដែលត្រូវបានតម្លើងដល់កម្រិត “ដៃគូយុទ្ធសាស្រ្តគ្រប់ជ្រុងជ្រោយ” នៅក្នុងឆ្នាំនេះ។ ភាគីទាំងពីរ ក៏បានពិភាក្សាគ្នាផងដែរ អំពីភាពជាដៃគូក្នុងកិច្ចការរក្សាសន្តិភាព និងសកម្មភាពកំចាត់មីន នៅក្នុងក្របខ័ណ្ឌទ្វេភាគី ត្រីភាគី និងអង្គការសហប្រជាជាតិ។
លោកឧបនាយករដ្ឋមន្រ្តី បានរំលឹកឡើងវិញជាមួយ សេចក្តី អំណរគុណ ចំពោះការរួមចំណែកដ៏សំខាន់ របស់កងកម្លាំងស្វ័យការពារជប៉ុន នៅក្នុងដំណើរការរក្សាសន្តិភាព ក៏ដូចជាការគាំទ្ររបស់ជប៉ុនជាបន្តបន្ទាប់ សម្រាប់ការកសាងឡើងវិញ និងការអភិវឌ្ឍគ្រប់ជ្រុងជ្រោយរបស់កម្ពុជា។
![](https://dap-news.com/wp-content/uploads/2023/03/MFAIC-PIC-3-5-1024x683.jpg)
លោកអគ្គនាយកបានបញ្ជាក់ពី ការត្រៀមខ្លួនរបស់ជប៉ុន ធ្វើការជាមួយកម្ពុជា ដែលនឹងធ្វើជាប្រទេសម្ចាស់ផ្ទះរៀបចំ “កម្មវិធីភាពជាដៃគូត្រីភាគី របស់អង្គការសហ ប្រជាជាតិ” នៅឆ្នាំ២០២៤ ដើម្បីពង្រឹងសមត្ថភាពវិស្វកម្មក្នុងតំបន់ នៅក្នុងបេសកកម្មរក្សាសន្តិភាព។
ភាគីទាំងពីរ បានគូសបញ្ជាក់ជាថ្មី អំពីការប្តេជ្ញាចិត្ត ក្នុងការពង្រីកកិច្ចសហការបន្ថែមទៀត នៅក្នុងវិស័យសន្តិភាព និងសន្តិសុខអន្តរជាតិ តាមរយៈការបណ្តុះបណ្តាល និងការផ្តល់គ្រឿងបរិក្ខារ។
![](https://dap-news.com/wp-content/uploads/2023/03/MFAIC-PIC-8-3-1024x683.jpg)
ភាគីទាំងពីរ ក៏បានផ្លាស់ប្តូរទស្សនៈ លើបញ្ហាតំបន់មួយចំនួនផងដែរ។ លោកអគ្គនាយក បានសាទរចំពោះជោគជ័យរបស់កម្ពុជា ក្នុងនាមជាប្រធានអាស៊ាន និងតួនាទីដ៏លំបាករបស់ ប្រេសិតពិសេសរបស់ប្រធានអាស៊ាន ស្ដីពីមីយ៉ាន់ម៉ា កាលពីឆ្នាំមុន និងបានសង្កត់ធ្ងន់ថា កិច្ចខិតខំប្រឹងប្រែង ដ៏ធំធេងរបស់កម្ពុជា ត្រូវបានទទួលស្គាល់យ៉ាងច្បាស់ ដោយប្រទេសជប៉ុន និងសហគមន៍អន្តរជាតិ ៕
![](https://dap-news.com/wp-content/uploads/2020/08/1-1.png)