ភ្នំពេញ ៖ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានលើកទឹកចិត្តដល់កង កម្លាំងនគរបាល ទាំងអស់ បន្តកិច្ចខិតខំប្រឹងប្រែងបំពេញភារកិច្ច ដើម្បីបុព្វហេតុជាតិ សាសនា ព្រះមហាក្សត្រ ប្តេជ្ញាការពាររាជរដ្ឋាភិបាល ស្របច្បាប់ និងបម្រើប្រជាពលរដ្ឋដោយភាពអត់ធ្មត់ ព្រមទាំងប្រកាន់ខ្ជាប់នូវវិន័យផងដែរ។
យោងតាមលិខិតជូនពររបស់អគ្គស្នងការនគរបាលជាតិ នាឱកាសខួបអនុស្សាវរីយ៍ លើកទី៧៨ ថ្ងៃកំណើតនគរបាលជាតិ នាយឧត្តមសេនីយ៍ នេត សាវឿន បានឲ្យដឹងថា ឆ្នាំ២០២៣នេះ ក្រៅពីការបន្តទទួលរងវិបត្តិសុខភាពសាធារណៈ ដោយ សារជំងឺកូវីដ-១៩ សកលលោកទាំងមូល ក៏កំពុងរងការគំរាមកំហែងប្រកបដោយភាពស្មុគស្មាញ និងពុំមានភាពច្បាស់ លាស់ ពីការប្រកួតប្រជែងដណ្ដើមឧត្តមភាពភូមិសាស្ត្រនយោបាយ សង្គ្រាមឈ្លានពាន វិបត្តិសេដ្ឋកិច្ច និងស្បៀងអាហារ ព្រមទាំងបញ្ហាជាច្រើនទៀត ។
នាយឧត្តមសេនីយ៍បន្ដថា ស្ថានភាពទាំងនេះនឹងជះឥទ្ធិពលដោយផ្ទាល់ ឬដោយប្រយោល ដល់ព្រះរាជាណាចក្រកម្ពុជា ទាំងវិស័យសេដ្ឋកិច្ច នយោបាយ និងបរិយាកាសនៃសន្តិសុខផ្ទៃក្នុង ស្របពេល ដែលប្រទេសកម្ពុជា ត្រូវរៀបចំព្រឹត្តិការណ៍ ប្រកួតកីឡាអាស៊ីអាគ្នេយ៍លើកទី៣២ អាស៊ានប៉ារ៉ាហ្គេមលើកទី១២ ការបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលព្រឹត្តិការណ៍សំខាន់ៗទាំងនេះសុទ្ធសឹងតែជាភារកិច្ច និងជាបន្ទុកទទួលខុសត្រូវរបស់កងកម្លាំង នគរបាលជាតិគ្រប់ ជាន់ថ្នាក់ និងទាមទារឲ្យមានការចាត់វិធានការ ដោយភាពម៉ឺងម៉ាត់ ប្រកបដោយស្មារតីប្រុងប្រយ័ត្នខ្ពស់ ដើម្បីធ្វើឲ្យ បរិយាកាសសង្គមកាន់តែមានភាពកក់ក្តៅ គាំទ្រដល់កិច្ចដំណើរការនៃព្រឹត្តិការណ៍ជាប្រវត្តិសាស្ត្រទាំងអស់នោះ រួមចំណែកលើកតម្កើងកិត្តិយស សក្តានុពល និងកិត្យានុភាពជាតិ។
អគ្គស្នងការនគរបាលជាតិបញ្ជាក់ថា «ក្នុងនាមថ្នាក់ដឹកនាំកងកម្លាំងនគរបាលជាតិ ខ្ញុំសូមវាយតម្លៃខ្ពស់ និងសូមគាំទ្រ លើកទឹកចិត្ត ដល់បងប្អូនកងកម្លាំងនគរបាលជាតិទាំងអស់ ឲ្យបន្តកិច្ចខិតខំប្រឹងប្រែងបំពេញភារកិច្ចដើម្បីបុព្វហេតុជាតិ សាសនា ព្រះមហាក្សត្រ ប្តេជ្ញាការពាររាជរដ្ឋាភិបាលស្របច្បាប់ និងបម្រើប្រជាពលរដ្ឋដោយភាពអត់ធ្មត់ ប្រកាន់ខ្ជាប់នូវវិន័យ សីលធម៌ អាកប្បកិរិយាថ្លៃថ្នូរ និងមានមនសិការវិជ្ជាជីវៈខ្ពស់»។
ទន្ទឹមនេះ នាយឧត្តមសេនីយ៍ ក៏ណែនាំដល់កងកម្លាំងនគរបាលជាតិទាំងអស់ បន្តធ្វើគំរូល្អដល់ប្រជាពលរដ្ឋ ក្នុងការលើក កម្ពស់ស្មារតីអនុវត្តច្បាប់ និងបង្កើនការប្រុង ប្រយ័ត្នថែទាំសុខភាពបុគ្គល-គ្រួសារ ដោយត្រូវអនុវត្តឲ្យបានខ្ជាប់ ខ្ជួននូវវិធានសុខាភិបាល និងវិធានការ «៣ការពារ-៣កុំ»៕
