ចាប់ខ្លួនជនជាតិវៀតណាម ម្នាក់ ករណីជួញដូរគ្រឿងញៀន តាមកញ្ចប់បញ្ញើប្រៃសណីយ៍ជាង ៥គីឡូក្រាម និងសារធាតុមិនច្បាស់ជាង ២គីឡូក្រាម

ភ្នំពេញ៖ កម្លាំងការិយាល័យរដ្ឋបាល សរុប(ក១) ដឹកនាំដោយឧត្តមសេនីយ៍ទោ អ៊ិន សុង នាយករងមន្ទីរ វរសេនីយ៍ឯក ម៉ាក់ សេរីវឌ្ឍនៈ នាយករងមន្ទីរ និងសម្របសម្រួលដោយ លោក ស៊ិត វណ្ណៈ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ សហការជាមួយគយប្រចាំនៅប្រៃសណីយ៍ភ្នំពេញ និងនាយកដ្ឋានសន្តិសុខផ្ទៃក្នុង នាថ្ងៃទី៣០ ឧសភា បានត្រួតពិនិត្យកញ្ចប់បញ្ញើសង្ស័យ ក៏ឈានទៅឃាត់ខ្លួនអ្នកមកទទួលកញ្ចប់បញ្ញើ នៅចំណុចបន្ទប់លេខ B1B ជាន់ទី១១ ខុនដូ BALI ផ្លូវ សង្កាត់ទន្លេបាសាក់ ខណ្ឌចំការមន ។

ជនសង្ស័យឈ្មោះ វ៉ូ ហ្វាងម៊ិញ (VU QUANG MINH) ភេទប្រុស ជនជាតិវៀតណាម កើតនៅថ្ងៃទី១៦ ខែសីហា ឆ្នាំ១៩៨៤ ។
ក្នុងប្រតិបត្តិការនោះចាប់យកគ្រឿងញៀនរួមមាន ៖
១-គ្រឿងញៀនប្រភេទកេតាមីន (KETAMINE) ទម្ងន់ ៤,២១២ក្រាម (បួនគីឡូក្រាម និងពីររយដប់ពីរក្រាម)
២-គ្រឿងញៀនប្រភេទអ៊ិចស្តាស៊ី (MDMA) ទម្ងន់ ១,០១៨ក្រាម (មួយគីឡូក្រាម និងដប់ប្រាំបីក្រាម)
៣-សារធាតុមិនច្បាស់ ទម្ងន់ ២,១៤៦ ក្រាម (ពីរគីឡូក្រាម និងមួយរយសែសិបប្រាំមួយក្រាម)។

បច្ចុប្បន្នជនសង្ស័យ និងវត្ថុតាងបានកសាងសំណុំរឿង បញ្ជូនទៅសាលាដំបូងចាត់ការតាមនីតិវិធីច្បាប់៕