ភ្នំពេញ ៖ សម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពិនិត្យឃើញថា គណបក្សនយោបាយដែលចូលរួមការបោះឆ្នោត ជ្រើសរើសតាំងតំណាងរាស្ដ្រ នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ ខាងមុខនេះ សុទ្ធតែគណបក្សប្រកួតប្រជែង មិនមែនអត់មានឡើយ ។
សម្ដេច ស ខេង ឆ្លើយតបបែបនេះក្រោយមានមន្ដ្រីគណបក្សភ្លើងទៀន បានលើកឡើងថា ការបោះឆ្នោត នីតិកាលទី៧នេះ មិនមានគណបក្សប្រឆាំងចូលរួមបោះឆ្នោត។
នាឱកាសអញ្ជើញសម្ពោធដាក់ឲ្យប្រើប្រាស់ជាផ្លូវការ អគារសិក្សាថ្មី១ខ្នង នៃអនុវិទ្យាល័យព្រែកនរិន្ទ ស្ថិតនៅស្រុកឯកភ្នំ ខេត្តបាត់ដំបង នៅថ្ងៃទី១៣ ខែកក្កដា ឆ្នាំ២០២៣ សម្ដេច ស ខេង បានថ្លែងថា រាជរដ្ឋាភិបាល បានប្ដេជ្ញាឲ្យដំណើរការបោះឆ្នោតនេះ ដោយសេរី ត្រឹមត្រូវ យុត្តិធម៌ និងគ្មានអំពើហិង្សា។ សម្ដេចថា ដំណើរការបោះឆ្នោតលើកនេះ មានគណបក្សនយោបាយចូលរួមចំនួន១៨គណបក្ស។
សម្ដេច គូសបញ្ជាក់ថា «មានការលើកឡើងថា ការបោះឆ្នោតនេះ មិនមានបក្សប្រឆាំងចូលរួមការបោះឆ្នោត ប៉ុន្ដែយើងពិនិត្យជារួមឃើញថា គណបក្សដែលបានចូលរួមបោះឆ្នោតសុទ្ធតែគណបក្សប្រកួតប្រជែង មិនមែនអត់មានទេ ព្រោះមិនដែរថា ចូលរួមប្រកួតប្រជែងហើយ ទៅគាំទ្រគណបក្សនយោបាយរបស់គេទេ ត្រូវគាំទ្រគណបក្សរបស់ខ្លួន ដូច្នេះវាមានប្រឆាំង វាមានប្រកួតប្រជែង ជាមួយគណបក្សមួយទៀត រាប់ទាំងគណបក្សកាន់អំណាចផង»។
លើសពីនេះ សម្ដេច ស ខេង ក៏បានពន្យល់ថា គណបក្សភ្លើងមិនបានចុះឈ្មោះឆ្នោតនោះ ដោយសារកំហុសខ្លួនឯងទេ ក្នុងឋានៈជារដ្ឋាភិបាល បានបំពេញតាមសំណូមពររបស់គណបក្សភ្លើងទៀន ហើយអ្វីដែលក្រសួងមហាផ្ទៃ បានឆ្លើយនោះ ដោយមិនធ្វើការប៉ានស្មានឡើយ។
សម្ដេចគូសបញ្ជាក់ទៀតថា «គណបក្សដែលមិនបានចុះឈ្មោះឆ្នោតនោះ (បក្សភ្លើងទៀន) ដោយសារគាត់បានធ្វើកំហុសដោយខ្លួនឯងទេ ក្នុងឋានៈជារដ្ឋាភិបាល បានបំពេញតាមសំណូមពររបស់គាត់ អ្វីដែលក្រសួងមហាផ្ទៃ បានឆ្លើយទៅគាត់ មិនធ្វើការប៉ានស្មានទេ។ បើមានការតិះទៀនរិះគន់មកខ្ញុំ ថាខ្ញុំ ធ្វើខុស ក៏អត់បានដែរ ព្រោះធ្វើសំណើររបស់គាត់»។
សម្ដេច ស ខេង ក៏បានរំលឹកទៀតថា មុនពេលមិនអនុញ្ញាតឲ្យបក្សភ្លើងទៀនចូលរួមបោះឆ្នោតនោះ សម្តេចក៏បានអនុញ្ញាតឲ្យលោក ប៊ុន ហ៊ុន រដ្ឋលេខាធិការក្រសួងមហាផ្ទៃ ជួបពិភាក្សាជាមួយគណបក្សភ្លើងចំនួន៣លើក ដើម្បីរកវិធីដោះស្រាយ ក្រោយគណបក្សនេះបានធ្វើសំណើរសុំជួបសម្ដេច ។ សម្ដេច ថា ដូច្នេះដំណើរការបោះឆ្នោតលើកនេះ នឹងប្រកបដោយលក្ខណៈត្រឹមត្រូវ និងស្របតាមច្បាប់ជាធរមាន ៕
