ភ្នំពេញ៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា ធនធានមនុស្ស ដើរតួនាទីសំខាន់ក្នុងការចូលរួម អភិវឌ្ឍជាតិឱ្យចំទិសដៅ និងឈានទៅកាន់ភាពជោគជ័យ។
នាឱកាសអញ្ជើញបើកពិព័រណ៍ការងារ ក្នុងវិស័យអប់រំកសិកម្មស្តីពី ការបណ្តុះបណ្តាលធនធានមនុស្សក្នុងវិស័យកសិកម្ម រុក្ខាប្រមាញ់ និងនេសាទ និងការស្វែងរកការងារក្រោយបញ្ចប់ការសិក្សា នៅសាកលវិទ្យាភូមិន្ទកសិកម្ម នាថ្ងៃទី៨ ធ្នូ លោករដ្ឋមន្ដ្រី ឌិត ទីណា បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំ ប្រឹងប្រែងរបស់សាកលវិទ្យាល័យ និងសម្រេចបានលទ្ធផលជាផ្លែផ្កា។
លោករដ្ឋមន្ត្រី បានផ្តល់នូវអនុសាសន៍គន្លឹះក្នុងការផ្សារភ្ជាប់ ធនធានមនុស្សរវាងសាកលវិទ្យាល័យ និងក្រុមហ៊ុនឯកជន ដើម្បីរៀបចំកម្មវិធីសិក្សាស្រប ទៅតាមតម្រូវការទីផ្សារការងារ។ កម្មវិធីសិក្សាគោលដែលមានស្រាប់ គឺជាអាទិភាព ប៉ុន្តែនិស្សិតត្រូវទទួលបាន ការអប់រំអំពីចំណេះដឹងទូទៅ ភាសាអង់គ្លេស និងកុំព្យុទ័រ ដែលចាំបាច់សម្រាប់ការស្រាវជ្រាវ និងបង្កើនប្រសិទ្ធភាពនៃការអនុវត្តការងារ។
លោករដ្ឋមន្ត្រី បានគូសបញ្ជាក់ថា «ធនធានមនុស្ស គឺជាកត្តាចម្បងសម្រាប់ក្រុមហ៊ុននីមួយៗ ហើយធនធានមនុស្សដើរតួនាទីសំខាន់ ក្នុងការចូលរួមអភិវឌ្ឍជាតិ ឱ្យចំទិសដៅ និងឈានទៅកាន់ភាពជោគជ័យ។ លើសពីនេះទៀត កសិកម្មត្រូវផ្សារភ្ជាប់នឹងឧស្សាហកម្ម ពាណិជ្ជកម្ម និងហិរញ្ញវត្ថុ ដែលតម្រូវឱ្យមានការសិក្សាពីគ្នាឱ្យបានច្បាស់លាស់ ដោយក្នុងនោះក្រុមហ៊ុនត្រូវបង្ហាញពីសក្តានុពល ទស្សនវិស័យ និងលក្ខខណ្ឌតម្រូវនានា ដើម្បីឱ្យនិស្សិតត្រៀមលក្ខណៈប្រកបដោយភាពជឿជាក់ និងឆន្ទៈក្នុងចូលរួមជួយ ក្រុមហ៊ុនឱ្យមានការរីកចម្រើន»។
ឆ្លៀតក្នុងឱកាសនេះដែរ លោករដ្ឋមន្ត្រី ក៏បានលើកឡើងអំពីគោលនយោយបាយ កសិកម្មអាណត្តិថ្មីទី៧នេះ ក្នុងការជំរុញសហគមន៍កសិកម្មទំនើប ដែលមានសមត្ថភាពផលិតក្នុងទ្រង់ទ្រាយធំ ព្រមទាំងការដាក់ពង្រាយមន្ត្រីផ្សព្វផ្សាយកសិកម្មតាមភូមិឃុំ ដើម្បីជួយដល់កសិករ ទាំងបច្ចេកទេស ការកាត់បន្ថយថ្លៃដើម ទីផ្សារ និងបញ្ហាប្រឈមផ្សេងៗឱ្យបានឆាប់រហ័ស និងមានប្រសិទ្ធភាព៕
