ថ្ងៃទី៤ខែមករា ក្នុងសន្និសីទកាសែតជាប្រចាំនៃក្រសួងការបរទេសចិន អ្នកសារព័ត៌មានបានសួរថា៖ ភាគីយោធាចិនបានលើកឡើងថា បានធ្វើសកម្មភាពយាមល្បាតនៅសមុទ្រចិនខាងត្បូងកាលពីម្សិលមិញនិងថ្ងៃនេះ។ ព្រមពេលជាមួយគ្នានេះ អាមេរិកនិងហ្វីលីពីនកំពុងរួមគ្នាធ្វើសមយុទ្ធកងទ័ពជើងទឹក។ តើលោកអាចណែនាំពីសភាពការណ៍កាន់តែច្រើនអំពីសកម្មភាពយាមល្បាតរបស់ភាគីចិនបានទេ?
លោកWang Wenbinបានថ្លែងថា យុទ្ធភូមិភាគខាងត្បូង នៃកងទ័ពរំដោះប្រជាជនចិនបានចេញផ្សាយព័ត៌មានពាក់ព័ន្ធ។ អ្វីដែលយើងចង់បកស្រាយនោះគឺថា ហ្វីលីពីននិងអាមេរិកបានធ្វើសកម្មភាពយោធាបង្ករឿងហេតុនៅសមុទ្រចិនខាងត្បូងក្នុងគោលបំណងបង្ហាញពីកម្លាំងរបស់ខ្លួន វាគ្មានអំណោយផលដល់ការគ្រប់គ្រងស្ថានការណ៍ដែនសមុទ្រនិងវិវាទដែនសមុទ្រទេ។ យើងដាស់តឿនឱ្យប្រទេសពាក់ព័ន្ធបញ្ឈប់ប្រព្រឹត្តិទង្វើមិនទទួលខុសត្រូវ និងគោរពយ៉ាងប្រាកដប្រជានូវកិច្ចខិតខំប្រឹងប្រែងរបស់ប្រទេសក្នុងតំបន់ ដើម្បីគាំពារសន្តិភាពនិងស្ថិរភាពនៅសមុទ្រចិនខាងត្បូង។ ភាគីចិននឹងបន្តគាំពារយ៉ាងមុតមាំនូវបូរណភាពទឹកដីក៏ដូចជាសិទ្ធិនិងផលប្រយោជន៍ដែនសមុទ្ររបស់ខ្លួន ព្រមទាំងគាំពារយ៉ាងសកម្មនូវសន្តិភាពនិងសុខសាន្តត្រាណក្នុងតំបន់៕ អត្ថបទ និងរូបភាពដោយវិទ្យុមិត្តភាពកម្ពុជាចិន
