ភ្នំពេញ៖ ក្នុងជំនួបជាមួយនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ នាថ្ងៃទី១៨ កញ្ញា លោក វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា បានថ្លែងបញ្ជាក់ពីតួនាទីដ៏សំខាន់របស់កងទ័ពប្រទេសទាំងពីរ (កម្ពុជា-ចិន) ដែលជាគ្រឹះដ៏រឹងមាំនៃទំនាក់ទំនងមិត្តភាពដែកថែប ដោយកន្លងមក កងទ័ពប្រទេសទាំងពីរតែងបានសហការគ្នាយ៉ាងជិតស្និទ្ធ និងតែងបានចាត់ទុកគ្នាជាមិត្តសំខាន់ជាងគេ ។
នាឱកាសនោះ នាយឧត្ដមសេនីយ៍ វង្ស ពិសេន បានលើកឡើងពីកិច្ចសហប្រតិបត្តិការរវាងប្រទេសទាំងពីរដែលមានការរីកចម្រើនឥតឈប់ឈរ និងត្រូវបានបន្តពង្រឹងពង្រីកកាន់តែស៊ីជម្រៅលើគ្រប់វិស័យរហូតឈានដល់ “កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ មិត្តភាពដែកថែប កិច្ចសហប្រតិបត្តិការត្បូងពេជ្រ និងកិច្ចសហប្រតិបត្តិការក្នុងក្របខណ្ឌខ្សែក្រវាត់និងផ្លូវ”។
លោកអគ្គមេបញ្ជាការបានថ្លែងអំណរគុណចំពោះបក្ស រដ្ឋាភិបាល ប្រជាជនចិន ដែលជានិច្ចកាលបានជួយឧបត្ថម្ភគាំទ្រទាំងស្មារតី សម្ភារៈ ថវិកា ដើម្បីអភិវឌ្ឍសេដ្ឋកិច្ចកម្ពុជា ក្នុងនោះវិស័យការពារជាតិចិនបានជួយបណ្តុះបណ្តាលធនធានមនុស្ស ជួយកសាងហេដ្ឋារចនាសម្ព័ន្ធ ការធ្វើទំនើបកម្មទីបញ្ជាការមូលដ្ឋានសមុទ្ររាម ការធ្វើទំនើបកម្មប្រព័ន្ធកាពារអាកាស ការធ្វើទំនើបកម្មប្រព័ន្ធកាំជ្រួចស្វ័យប្រវត្តិ និងការធ្វើទំនើបកម្មអាវុធធុនធ្ងន់គ្រប់ប្រភេទ។
លោកអគ្គមេបញ្ជាការ បានជឿជាក់ថា ក្នុងអាណត្តិបេសកកម្មការទូតរបស់លោក វ៉ាង វិនពីននៅកម្ពុជា នឹងជំរុញបន្ថែមទៀតការពង្រីកវិសាលភាពនៃការធ្វើសមយុទ្ធកាន់តែធំ ខ្លឹមសារកាន់តែស៊ីជម្រៅ និងចំនួនយោធិន យុទ្ធោបករណ៍ចូលរួមកាន់តែច្រើន និងទំនើបជាងឆ្នាំមុនៗ ដើម្បីឱ្យស្របទៅនឹងទំហំកិច្ចសហប្រតិបត្តិការរវាងកងទ័ពទាំងពីរ។
នាយឧត្ដមសេនីយ៍ វង្ស ពិសេន បានសំណូមពរដល់ឯកអគ្គរដ្ឋទូតបន្តជំរុញលើការផ្លាស់ប្តូរទស្សនកិច្ចគ្រប់កម្រិត ការបណ្តុះបណ្តាលធនធានមនុស្ស ជួយកសាងសាលាជំនាញកាំភ្លើងធំ និងជំនាញការពារអាកាសដល់កងទ័ពជើងគោកកម្ពុជា ព្រមទាំងការផ្លាស់ប្តូរព័ត៌មានចារកិច្ចទៅវិញទៅមកឱ្យកាន់តែធំទូលាយ និងទាន់ពេលវេលា។
ជាកិច្ចឆ្លើយតបលោកទូត វ៉ាង វិនពីន បានថ្លែងអំណរគុណចំពោះការលើកឡើងប្រកបដោយមនោសញ្ចេតនារបស់លោកអគ្គមេបញ្ជាការ សបញ្ជាក់ឲ្យឃើញពីទំនាក់ទំនងជិតស្និទ្ធរវាងប្រទេសទាំងពីរនាពេលកន្លងមក។
លោកបន្តថា ទំនាក់ទំនង ចិន កម្ពុជា គឺជាទំនាក់ទំនងឆ្លងកាត់រយៈកាលដ៏យូរអង្វែង និងបង្កើតបានជាគំរូមួយនៃទំនាក់ទំនងអន្តរជាតិមិនអាចបំបែកបាន ហើយទំនាក់ទំនងនេះថ្នាក់ថ្នមថែរក្សាដោយថ្នាក់ដឹកនាំជំនាន់មុន និងមានការគាំទ្រពីប្រជាជនប្រទេសទាំងពីរ រួមសុខរួមទុក្ខជាមួយគ្នានៅគ្រប់កាលៈទេសៈ និងមានភាពរឹងមាំជារៀងរហូតមក។
ឯកអគ្គរដ្ឋទូតចិន បញ្ជាក់ថា «ក្នុងនាមជាប្រទេសជិតខាង និងដៃគូដ៏ជិតស្និទ្ធ ចិន-កម្ពុជា បានបង្កើតនិងបីបាច់ថែរក្សាចំណងមិត្តភាព «ដែកថែប» ដែលមិនអាចបំបែកបាន ដោយឆ្លងកាត់ការសាកល្បង ការប្រែប្រួល និងការលំបាកជាប្រវត្តិសាស្ត្រជាច្រើន។ ដូច្នេះយើងត្រូវរួមសហការគ្នា អភិវឌ្ឍទំនាក់ទំនងនេះឲ្យកាន់តែស្អិតរមួតថែមទៀត»។
ក្នុងនាមឯកអគ្គរដ្ឋទូតថ្មី លោក វ៉ាង វិនពីន បានអះអាងពីការសហការជាមួយការិយាល័យអនុព័ន្ធយោធាចិនប្រចាំកម្ពុជា ដើម្បីចាប់ដៃជាមួយថ្នាក់ដឹកនាំកងយោធពលខេមរភូមិន្ទ ជំរុញឲ្យទំនាក់ទំនង កិច្ចសហប្រតិបត្តិការរវាងកងទ័ពប្រទេសទាំងពីរឈានឡើងដល់កម្រិតថ្មីមួយ៕
