ភ្នំពេញ ៖ លោកតាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិបត្តិការ អន្តរជាតិ បានមានប្រសាសន៍ថា អ្វីដែលប្រមុខរាជរដ្ឋាភិបាលកម្ពុជាប្រាថ្នា ចង់បានពីរដ្ឋបាលសហរដ្ឋអាមេរិក របស់ប្រធានាធិបតីលោក ដូណាល់ ត្រាំ គឺជាការបន្តពង្រឹងទំនាក់ទំនងសេដ្ឋកិច្ច ជាពិសេសទៅលើ វិស័យពាណិជ្ជកម្មតែម្តង ។
លោក តាន់ ហ្សង់ហ្វ្រង់ស័រ បានលើកឡើងក្នុងវេទិកាសារព័ត៌មានលើកទី៦ ស្តីពី “រាជរដ្ឋាភិបាល នីតីកាលទី៧ នៃរដ្ឋសភា ជាក្តីសង្ឃឹមរបស់ពលរដ្ឋខ្មែរ” នាថ្ងៃទី២៧ ខែកុម្ភៈ ឆ្នាំ២០២៥ថា បន្ទាប់ពីលោក ដូណាល់ ត្រាំឡើងកាន់តំណែងជា ប្រធានាធិបតីអាមេរិកជាលើកទី២នេះ គឺលោកបានផ្តោតលើប្រជាពលរដ្ឋ សេដ្ឋកិច្ចនិងពាណិជ្ជកម្មរបស់អាមេរិកជាចម្បង អ្វីដែលជាការគិតគូរបស់លោកត្រាំនេះ ក៏មិនខុសពីសម្តេចបវរមហាធិបតីហ៊ុន ម៉ាណែតនាយករដ្ឋមន្រ្តីកម្ពុជាដែរ គឺសុខទុក្ខពលរដ្ឋនិងប្រទេសជាតិជាកត្តាសំខាន់បំផុតរបស់សម្តេច។
លោកបន្តថា ដូច្នេះរាជរដ្ឋាភិបាល កម្ពុជាបានយល់ អំពីជម្រៅទឹកចិត្តរបស់លោកត្រាំ ដែលជាប្រធានាធិបតី អាមេរិកលើកទី៤៧ របស់អាមេរិក ចំពោះភក្តីស្នេហាជាតិ របស់ប្រធានាធិបតីអាមេរិករូបនេះ ។
រដ្ឋមន្ត្រីប្រតិភូអមនាយករដ្ឋមន្ត្រី ក៏បានទាញភ្ជាប់ពីករណីរបស់សម្តេចធិបតីហ៊ុន ម៉ាណែត ជាមួយរដ្ឋបាលលោកដូណាល់ ត្រាំថា “រាជរដ្ឋាភិបាលកម្ពុជា អត់មានអ្វីរំពឹងធំដុំទេ អ្វីដែលកម្ពុជាប្រាថ្នាចង់បាន គឺការបន្តពង្រឹងទំនាក់ទំនង សេដ្ឋកិច្ចគឺចង់ឲ្យសហរដ្ឋអាមេរិកយោគយល់កម្ពុជាខ្លាំងជាងមុន ជាពិសេសលើវិស័យពាណិជ្ជកម្ម”។
លោកតាន់ ហ្សង់ហ្វ្រង់ស័របន្ថែមថា ជាមួយគ្នានេះ សម្តេចធិបតី តែងតែប្រកាសទាំងនៅលើឆាកអន្តរជាតិនិងជាតិថា ពុំបានចាត់ទុកប្រទេសណាមួយជាសត្រូវនោះទេ គឺជាមិត្តទាំងអស់គ្នា ដោយចង់បានសន្តិភាព ដើម្បីបន្តអភិវឌ្ឍន៍ប្រទេសឲ្យ សេដ្ឋកិច្ចជាតិរឹងមាំ ក្នុងគោលដៅផ្តល់សេចក្តីសុខ និងផល ប្រយោជន៍ដល់ពលរដ្ឋឲ្យ រស់នៅក្នុងជីវភាពសមរម្យសម្បូរណ៍ សប្បាយមានលុយចាយវាយគ្រប់គ្រាន់ ៕
