ភ្នំពេញ៖ សហជីពធំដែលជាតំណាងកម្មករកាត់ដេរ និងវាយនភណ្ឌនៅកម្ពុជាលើកឡើងថា ការដំឡើងពន្ធរបស់សហរដ្ឋអាមេរិក គឺជាឱកាសសម្រាប់កម្ពុជាធ្វើពិពិធកម្មទីផ្សារអន្តរជាតិរបស់ខ្លួនឱ្យទទួលបានជោគជ័យ ខណៈដែលទីផ្សារផ្សេងៗទៀតសុទ្ធតែជាទីផ្សារធំៗជាងសហរដ្ឋអាមេរិកសម្រាប់ទំនិញកម្ពុជា។
លោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជាបានថ្លែងថា៖«ពិតណាស់ថា ទំនិញកម្ពុជាបាននាំចូលទៅសហរដ្ឋអាមេរិកច្រើន ប៉ុន្ដែទីផ្សារនៅសហរដ្ឋអាមេរិកមិនមែនជាទីផ្សារធំសម្រាប់ទំនិញកម្ពុជាទាំងស្រុងនោះទេ។ កម្ពុជានឹងធ្វើពិពិធកម្មទីផ្សាររបស់ខ្លួនបន្ថែមទៀត គឺនៅមានទីផ្សារអ៊ឺរ៉ុប ជប៉ុន សាធារណរដ្ឋកូរ៉េ បារាំង អង់គ្លេសជាដើម»។
លោកបន្តថា ទំនិញកម្ពុជាដែលនាំចូលទីផ្សារអាមេរិកមានតែ ៣៨ភាគរយប៉ុណ្ណោះ ហើយក្រៅពីនេះ គឺសុទ្ធតែក្រៅពីអាមេរិកដែលជាទីផ្សារដែលកម្ពុជាកំពុងនាំចេញទៅបាន។ ទំនិញកម្ពុជា បាននាំទៅអាមេរិក អ៊ឺរ៉ុប ជប៉ុន និងអង់គ្លេស រីឯបង់ក្លាដែស និងវៀតណាម បាននាំទៅអ៊ឺរ៉ុបច្រើនជាទៅអាមេរិក ក្នុងន័យនេះ គឺកម្ពុជា គួរតែជំរុញនាំទៅអ៊ឺរ៉ុបឱ្យបានច្រើនជាងអាមេរិកដែរ។
លោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករបានថ្លែងថា៖«ការដំឡើងពន្ធរបស់សហរដ្ឋអាមេរិកមកលើកម្ពុជានាពេលនេះ ក៏ជាឱកាសថ្មីមួយទៀតសម្រាប់កម្ពុជាដែរ គឺឱកាសក្នុងការគិតពិចារណាលើការធ្វើពិពិធកម្មទីផ្សារអន្តរជាតិ យើងត្រូវតែស្វែងរកឱកាសទីផ្សារថ្មីផ្សេងៗ ក្រៅពីសហរដ្ឋអាមេរិកឱ្យបានឆាប់បំផុត ដើម្បីចៀសវាងបញ្ហានៅក្នុងវិស័យសេដ្ឋកិច្ចយើង»។
លោកបន្តថា ចំណែកឱកាសមួយទៀត គឺកម្ពុជាគួរតែគិតពិចារណាទៅលើវិស័យឧស្សាហកម្មឱ្យបានច្រើនថែមទៀតដូចជា ការផលិតឧបករណ៍អគ្គិសនី និងសំបកកងរថយន្ត ខណៈដែលបច្ចុប្បន្ននេះកម្ពុជាកំពុងខ្វះកម្លាំងពលកម្មឱ្យចូលបំពេញការងារនៅតាមតំបន់សេដ្ឋកិច្ចពិសេស និងរោងចក្រតាមបណ្ដាខេត្តមួយចំនួនទៀត។
លោកបន្ថែមថា កម្ពុជាត្រូវតែមានជំហររឹងមាំផ្ទាល់ខ្លួន និងមានមូលដ្ឋានជាក់លាក់ ដោយមិនអាចទោទន់ទៅតាមការនិយាយបកស្រាយពីក្រុមប្រឆាំងណាមួយនោះទេ ដើម្បីធានាបាននូវប្រភពចំណូលរបស់ប្រជាពលរដ្ឋ និងចំណូលពន្ធដាររបស់រដ្ឋផងដែរ។ កម្ពុជាត្រូវតែរក្សាស្ថិរភាព និងភាពចាស់ទុំ ដើម្បីទាក់ទាញអ្នកវិនិយោគបន្ថែមមកកម្ពុជា។
បើតាមលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានលើកឡើងអំពីអត្ថប្រយោជន៍នានាដែលនឹងទទួលបានពីយុទ្ធសាស្រ្តពង្រីក និងពិពិធកម្មទីផ្សារអង្ករកម្ពុជា ដោយបានគូសបញ្ជាក់ថា យុទ្ធសាស្ត្រនាំចេញអង្ករ និងពិពិធកម្មទីផ្សារឆ្នាំ ២០២៤-២០៣០ នឹងក្លាយជាឧបករណ៍ដ៏សំខាន់សម្រាប់រាជរដ្ឋាភិបាល ជាពិសេសក្រសួងពាណិជ្ជកម្មដែលជាសេនាធិការ ដើម្បីធ្វើពិពិធកម្មទីផ្សារ និងបង្កើនការនាំចេញតាមរយៈផលិតកម្មផ្អែកលើទីផ្សារ និងប្រព័ន្ធទីផ្សារទូទាំងពិភពលោក។
លោកស្រីបន្តថា យុទ្ធសាស្ត្រនេះគឺដើរស្របគ្នាទៅនឹងការងារជាអាទិភាពសំខាន់ៗដូចដែលបានឆ្លុះបញ្ចាំងនៅក្នុងយុទ្ធសាស្ត្របញ្ចកោណ ដំណាក់កាលទី១ ដែលជាផែនការយុទ្ធសាស្រ្តអភិវឌ្ឍន៍ជាតិ និងគោលនយោបាយជាតិផ្សេងទៀតរបស់រាជរដ្ឋាភិបាលកម្ពុជាព្រមទាំងគោលដៅអភិវឌ្ឍន៍ប្រកបដោយចីរភាពរបស់កម្ពុជា និងរបស់អង្គការសហប្រជាជាតិ ឆ្នាំ២០៣០ ផងដែរ៕
