អាជ្ញាធរក្រុងព្រះវិហារ ជំរុញសុវត្ថិភាពចរាចរណ៍ តាមរយៈការផ្សព្វផ្សាយច្បាប់ និងបំពាក់ស្ទីកគ័រចំណាំងផ្លាតលើគោយន្តកន្ត្រៃ ១០០គ្រឿង
ព្រះវិហារ៖ អាជ្ញាធរក្រុងព្រះវិហារ បានបន្តពង្រឹងវិធានការសុវត្ថិភាពចរាចរណ៍តាមដងផ្លូវ ដោយរៀបចំកិច្ចប្រជុំផ្សព្វផ្សាយច្បាប់ចរាចរណ៍ផ្លូវគោក និងអនុវត្តកម្មវិធីបំពាក់ស្ទីកគ័រចំណាំងផ្លាតលើគោយន្តកន្ត្រៃចំនួន ១០០គ្រឿង ជូនប្រជាពលរដ្ឋក្នុងសង្កាត់ទាំងពីរ នៃក្រុងព្រះវិហារ។
កម្មវិធីនេះត្រូវបានរៀបចំធ្វើឡើងនៅព្រឹកថ្ងៃទី០១ ខែមេសា ឆ្នាំ២០២៦ នៅបរិវេណសាលាក្រុងព្រះវិហារ ដោយមានការសហការរវាងរដ្ឋបាលក្រុង នគរបាលចរាចរណ៍ និងមន្ទីរសាធារណការ និងដឹកជញ្ជូនខេត្ត ក្រោមអធិបតីភាព លោក ប៉ុក ងួន អភិបាលក្រុងព្រះវិហារ និងមានការចូលរួមពីមន្ត្រីពាក់ព័ន្ធ ប្រជាពលរដ្ឋ និងអ្នកបើកបរគោយន្តកន្ត្រៃជាច្រើន។
ក្នុងឱកាសនោះ លោកអភិបាលក្រុង បានបញ្ជាក់ថា ការយល់ដឹងអំពីច្បាប់ចរាចរណ៍គឺជាកត្តាសំខាន់បំផុតក្នុងការកាត់បន្ថយគ្រោះថ្នាក់ និងការបាត់បង់ជីវិតលើដងផ្លូវ។ លោកបានអំពាវនាវឲ្យប្រជាពលរដ្ឋទាំងអស់គោរពច្បាប់ចរាចរណ៍ ដូចជា ការបើកបរដោយប្រុងប្រយ័ត្ន មិនលើសល្បឿន កុំបើកបរពេលស្រវឹង និងត្រូវមានឧបករណ៍សុវត្ថិភាពគ្រប់គ្រាន់។
ជាពិសេស កម្មវិធីបំពាក់ស្ទីកគ័រចំណាំងផ្លាតលើគោយន្តកន្ត្រៃ ត្រូវបានចាត់ទុកថា ជាវិធានការសំខាន់មួយក្នុងការកាត់បន្ថយគ្រោះថ្នាក់នៅពេលយប់ ដោយសារគោយន្តកន្ត្រៃជាមធ្យោបាយដឹកជញ្ជូនដែលប្រើប្រាស់យ៉ាងទូលំទូលាយនៅតំបន់ជនបទ ប៉ុន្តែមិនសូវមានសញ្ញាច្បាស់លាស់សម្រាប់អ្នកបើកបរផ្សេងៗឃើញពីចម្ងាយ។
តំណាងនគរបាលចរាចរណ៍បានបន្ថែមថា គ្រោះថ្នាក់ចរាចរណ៍ជាច្រើនកើតឡើងដោយសារខ្វះការយល់ដឹង និងការមិនគោរពច្បាប់ ដូច្នេះការផ្សព្វផ្សាយ និងការអប់រំសាធារណៈគឺជាចំណុចស្នូលក្នុងការកែលម្អស្ថានភាពនេះ។
កម្មវិធីនេះក៏ទទួលបានការស្វាគមន៍យ៉ាងកក់ក្តៅពីប្រជាពលរដ្ឋ ដែលបានសម្ដែងការពេញចិត្តចំពោះការយកចិត្តទុកដាក់របស់អាជ្ញាធរ ក្នុងការពារជីវិត និងទ្រព្យសម្បត្តិរបស់ពួកគេ។
សកម្មភាពខាងលើ ស្របតាមយុទ្ធសាស្ត្រជាតិរបស់រាជរដ្ឋាភិបាលកម្ពុជា ក្នុងការកាត់បន្ថយអត្រាគ្រោះថ្នាក់ចរាចរណ៍ និងលើកកម្ពស់សុវត្ថិភាពដល់អ្នកប្រើប្រាស់ផ្លូវទាំងអស់ ជាពិសេសនៅតំបន់ជនបទ ដែលការប្រើប្រាស់យានយន្តប្រភេទគោយន្តកន្ត្រៃនៅតែមានសារៈសំខាន់ក្នុងជីវភាពប្រចាំថ្ងៃ។
អ្នកវិភាគសង្គមបានចាត់ទុកថា ការចូលរួមរបស់អាជ្ញាធរ និងស្ថាប័នពាក់ព័ន្ធក្នុងសកម្មភាពបែបនេះ គឺជាជំហានវិជ្ជមានមួយក្នុងការបង្កើតវប្បធម៌ចរាចរណ៍ប្រកបដោយការទទួលខុសត្រូវ និងមានសុវត្ថិភាពសម្រាប់សង្គមទាំងមូល៕
ដោយ៖ សួន ពិសិត|ដើមអម្ពិល
