សិក្ខាសាលាផ្សព្វផ្សាយអំពីបេសកកម្មអាជ្ញាធរជាតិ ដោះស្រាយវិវាទក្រៅប្រព័ន្ធតុលាការ និងពិធីចុះហត្ថលេខា MoU នៅខេត្តព្រះវិហារ
ខេត្តព្រះវិហារ ៖ នៅថ្ងៃទី០៣ ខែមេសា ឆ្នាំ២០២៦ នៅសាលប្រជុំសាលាខេត្តព្រះវិហារ បានរៀបចំសិក្ខាសាលាផ្សព្វផ្សាយស្តីពីបេសកកម្ម និងតួនាទីរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ជ.ក.) ព្រមទាំងពិធីចុះហត្ថលេខាលើអនុស្សរណៈនៃការយោគយល់គ្នា (MoU) រវាងអាជ្ញាធរនេះ និងរដ្ឋបាលខេត្តព្រះវិហារ ដើម្បីពង្រឹងកិច្ចសហប្រតិបត្តិការក្នុងការដោះស្រាយវិវាទដោយសន្តិវិធី និងមានប្រសិទ្ធភាព។
ពិធីនេះបានប្រព្រឹត្តទៅក្រោមអធិបតីភាព លោកបណ្ឌិត ជិន ម៉ាលីន រដ្ឋលេខាធិការ ប្រចាំការក្រសួងយុត្តិធម៌ និងជាអនុប្រធានប្រចាំការ នៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ និងលោក គីម រិទ្ធី អភិបាលខេត្តព្រះវិហារ ដោយមានការចូលរួមពីមន្ត្រីរាជការ អាជ្ញាធរមូលដ្ឋាន អង្គការពាក់ព័ន្ធ និងភាគីជាច្រើនផ្សេងទៀត។
ក្នុងឱកាសនោះ លោកបណ្ឌិត ជិន ម៉ាលីន បានលើកឡើងថា អាជ្ញាធរជាតិដោះស្រាយវិវាទក្រៅប្រព័ន្ធតុលាការ មានបេសកកម្មសំខាន់ក្នុងការផ្តល់ជម្រើសដោះស្រាយវិវាទដោយមិនចាំបាច់ចូលដល់ប្រព័ន្ធតុលាការ ដោយផ្អែកលើគោលការណ៍ស្ម័គ្រចិត្ត សមធម៌ និងការយល់ព្រមរបស់ភាគីទាំងអស់។ វាជាមធ្យោបាយសំខាន់មួយក្នុងការកាត់បន្ថយភារកិច្ចលើតុលាការ និងលើកកម្ពស់សន្តិភាពសង្គម។
ខណៈដែល លោក គីម រិទ្ធី បានបញ្ជាក់ថា ការចុះហត្ថលេខាលើអនុស្សរណៈនៃការយោគយល់គ្នានេះ ជាជំហានសំខាន់ក្នុងការរឹតបន្តឹងកិច្ចសហការរវាងអាជ្ញាធរជាតិ និងរដ្ឋបាលខេត្ត ដើម្បីធានាថាការដោះស្រាយវិវាទនៅមូលដ្ឋាន អាចប្រព្រឹត្តទៅបានយ៉ាងឆាប់រហ័ស ត្រឹមត្រូវ និងមានប្រសិទ្ធភាពខ្ពស់។
អនុស្សរណៈនេះក៏ផ្តោតលើការចែករំលែកចំណេះដឹង បណ្តុះបណ្តាលមន្ត្រីពាក់ព័ន្ធ និងការផ្សព្វផ្សាយអំពីវិធីសាស្ត្រដោះស្រាយវិវាទក្រៅប្រព័ន្ធតុលាការ ដល់ប្រជាពលរដ្ឋ ឲ្យមានការយល់ដឹង និងទទួលយកយ៉ាងទូលំទូលាយ។
សិក្ខាសាលានេះត្រូវបានចាត់ទុកថា ជាជំហានមួយដ៏សំខាន់ក្នុងការលើកកម្ពស់ប្រព័ន្ធយុត្តិធម៌បែបជម្រើសនៅកម្ពុជា ស្របតាមនិន្នាការអន្តរជាតិ ដែលលើកទឹកចិត្តឲ្យប្រើប្រាស់វិធីសាស្ត្រដោះស្រាយវិវាទក្រៅប្រព័ន្ធតុលាការ ដើម្បីបង្កើនប្រសិទ្ធភាព ប្រកបដោយភាពបត់បែន និងការចូលរួមពីសហគមន៍។
ព្រឹត្តិការណ៍នេះក៏បង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការកែលម្អប្រព័ន្ធយុត្តិធម៌ និងលើកកម្ពស់ការអភិវឌ្ឍសង្គមប្រកបដោយសន្តិភាព និងចីរភាព៕
ដោយ៖ លោក សួន ពិសិត|ដើមអម្ពិល
