អ៊ីស្រាអែល គំរាមវាយប្រហារក្នុងទ្រង់ទ្រាយកាន់តែធំ ប្រឆាំងនឹងអ៊ីរ៉ង់ និងក្រុមហេសបូឡា
យេរូសាឡឹម៖ អ៊ីស្រាអែល កំពុងរៀបចំបង្កើនការវាយប្រហាររបស់ខ្លួនលើអ៊ីរ៉ង់ ប្រសិនបើការចរចាដោយប្រយោលរវាងសហរដ្ឋអាមេរិក និងអ៊ីរ៉ង់ បរាជ័យ នេះបើយោងតាមការចុះផ្សាយរបស់ទូរទស្សន៍រដ្ឋអ៊ីស្រាអែល Kan TV។
អ៊ីស្រាអែល ជឿជាក់ថា ប្រធានាធិបតីអាមេរិកលោក ដូណាល់ ត្រាំ នឹងផ្តល់ភ្លើងខៀវ ដើម្បីកំណត់គោលដៅរោងចក្រថាមពល និងហេដ្ឋារចនាសម្ព័ន្ធជាតិនៅក្នុងប្រទេសអ៊ីរ៉ង់ ហើយកំពុងរង់ចាំការយល់ព្រមចុងក្រោយ នេះបើយោងតាមការចុះផ្សាយរបស់ Kan TV ដោយដកស្រង់សម្តីមន្ត្រីអ៊ីស្រាអែល។
នៅថ្ងៃអាទិត្យផងដែរ មេបញ្ជាការយោធាអ៊ីស្រាអែល លោក Eyal Zamir បានទៅទស្សនាភាគខាងត្បូងប្រទេសលីបង់ ហើយបានឧ្យដឹងថា អ៊ីស្រាអែល មានគម្រោងបង្កើនការវាយប្រហាររបស់ខ្លួនប្រឆាំងនឹងក្រុមហេសបូឡា។
លោកបានលេីកឡេីងថា ពួកសកម្មប្រយុទ្ធហេសបូឡាជាង ១០០០នាក់ត្រូវបានសម្លាប់ចាប់តាំងពីជម្លោះទ្រង់ទ្រាយធំបានបន្តឡើងវិញ។ លោកបានបន្ដថា “ចំនួននោះនឹងបន្តកើនឡើង។ ការខូចខាតដល់ក្រុមហេសបូឡានឹងកាន់តែខ្លាំងឡើង”។
ការវិវឌ្ឍទាំងនេះកើតឡើងចំពេលមានភាពតានតឹងក្នុងតំបន់កាន់តែខ្លាំងឡើង បន្ទាប់ពីការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែលលើអ៊ីរ៉ង់ ដែលចាប់ផ្តើមនៅថ្ងៃទី ២៨ ខែកុម្ភៈ ដែលអ៊ីរ៉ង់ និងសម្ព័ន្ធមិត្តក្នុងតំបន់របស់ខ្លួនបានឆ្លើយតបដោយការវាយប្រហារលើផលប្រយោជន៍អ៊ីស្រាអែល និងសហរដ្ឋអាមេរិកនៅទូទាំងមជ្ឈិមបូព៌ា៕
ប្រែសម្រួល ឈូក បូរ៉ា
