អភិបាលខេត្តព្រះវិហារ ដឹកនាំកិច្ចប្រជុំគណៈអភិបាល ដើម្បីពង្រឹងប្រសិទ្ធភាពរដ្ឋបាល និងជំរុញការអភិវឌ្ឍមូលដ្ឋាន
ខេត្តព្រះវិហារ៖ នៅព្រឹកថ្ងៃទី២៧ ខែមេសា ឆ្នាំ២០២៦ នេះ លោក គីម រិទ្ធី អភិបាលនៃគណៈអភិបាលខេត្តព្រះវិហារ បានអញ្ជើញជាអធិបតីភាពដ៏ខ្ពង់ខ្ពស់ក្នុងកិច្ចប្រជុំគណៈអភិបាលខេត្ត ដើម្បីពិនិត្យ និងពិភាក្សាលើការងារសំខាន់ៗសំដៅលើកកម្ពស់គុណភាពសេវាសាធារណៈ និងដោះស្រាយបញ្ហាប្រឈមនានានៅក្នុងខេត្ត។
កិច្ចប្រជុំដែលបានប្រព្រឹត្តទៅនៅសាលប្រជុំសាលាខេត្តព្រះវិហារនេះ មានការអញ្ជើញចូលរួមពីសំណាក់លោក-លោកស្រីអភិបាលរងខេត្ត នាយករដ្ឋបាល កងកម្លាំងប្រដាប់អាវុធទាំងបីប្រភេទ និងថ្នាក់ដឹកនាំមន្ទីរ-អង្គភាពជុំវិញខេត្តជាច្រើនរូបទៀត។
ខ្លឹមសារសំខាន់ៗនៃកិច្ចប្រជុំរួមមាន៖
ការងារធនធានមនុស្ស និងតែងតាំងមន្ត្រីលោកអភិបាលខេត្ត បានដឹកនាំការពិភាក្សាលើការរៀបចំ និងតែងតាំងមន្ត្រីរាជការទៅតាមជំនាញ និងសមត្ថភាព ដើម្បីបំពេញរចនាសម្ព័ន្ធរដ្ឋបាលខេត្តឲ្យកាន់តែមានភាពរឹងមាំ និងឆ្លើយតបបានយ៉ាងឆាប់រហ័សទៅនឹងតម្រូវការរបស់ប្រជាពលរដ្ឋ។
ការតាមដានវឌ្ឍនភាពការងារ អង្គប្រជុំបានស្តាប់នូវរបាយការណ៍បូកសរុបលទ្ធផលការងារដែលសម្រេចបានក្នុងរយៈពេលកន្លងមក ជាពិសេសលើវិស័យសន្តិសុខសណ្តាប់ធ្នាប់ សេដ្ឋកិច្ច និងការអភិវឌ្ឍហេដ្ឋារចនាសម្ព័ន្ធក្នុងខេត្ត។
ការដោះស្រាយបញ្ហាប្រឈម ថ្នាក់ដឹកនាំខេត្តបានដាក់ចេញនូវវិធានការ និងយុទ្ធសាស្ត្រថ្មីៗ ដើម្បីដោះស្រាយបញ្ហាដែលនៅសេសសល់ ជាពិសេសការបង្កើនប្រសិទ្ធភាពនៃការផ្តល់សេវារដ្ឋបាលនៅថ្នាក់មូលដ្ឋាន ឲ្យស្របតាមគោលនយោបាយបញ្ចកោណរបស់រាជរដ្ឋាភិបាល។
ក្នុងឱកាសនោះដែរ លោក គីម រិទ្ធី បានផ្តល់អនុសាសន៍ណែនាំដល់មន្ត្រីពាក់ព័ន្ធទាំងអស់ ត្រូវបន្តខិតខំបំពេញភារកិច្ចដោយស្មារតីទទួលខុសត្រូវខ្ពស់ រក្សាសាមគ្គីភាពផ្ទៃក្នុង និងត្រូវយកចិត្តទុកដាក់ខ្ពស់លើការបម្រើសេវាជូនប្រជាពលរដ្ឋឲ្យបានល្អប្រសើរ ប្រកបដោយតម្លាភាព និងប្រសិទ្ធភាព។
កិច្ចប្រជុំនេះមិនត្រឹមតែជាការត្រួតពិនិត្យការងារបច្ចេកទេសប៉ុណ្ណោះទេ ប៉ុន្តែគឺជាការបង្ហាញពីការប្តេជ្ញាចិត្តរបស់រដ្ឋបាលខេត្តព្រះវិហារ ក្នុងការជំរុញអភិបាលកិច្ចល្អ និងការអភិវឌ្ឍប្រកបដោយចីរភាពសម្រាប់ខេត្តជាប់ព្រំដែនមួយនេះ៕
ដោយ៖សួន ពិសិតដើមអម្ពិល
