លោក ឃួង ស្រេង ជំរុញឱ្យមន្ត្រីពាក់ព័ន្ធ យកចិត្តទុកដាក់ពង្រឹង ការផ្ដល់សេវាសាធារណៈ ជូនពលរដ្ឋ ជាពិសេសសេវាខាងសុរិយោដី
ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានជំរុញបន្ថែមឱ្យមន្ត្រីពាក់ព័ន្ធគ្រប់ផ្នែកទាំងអស់ ត្រូវយកចិត្តទុកដាក់ពង្រឹងការផ្ដល់សេវាសាធារណៈ ជូនប្រជាពលរដ្ឋ ជាពិសេសសេវាសុរិយោដី ឱមានប្រសិទ្ធភាពខ្ពស់ និងល្អប្រសើរជាងមុនថែមទៀត។
ការជំរុញញបែបនេះរបស់លោក ឃួង ស្រេង ធ្វើឡើងក្នុងកិច្ចប្រជុំនៅសាលារាជធានីភ្នំពេញ ស្តីពីការពិភាក្សាលើការជំរុញការផ្តល់សេវាសាធារណៈ ជាពិសេសសេវាសុរិយោដី ជូនប្រជាពលរដ្ឋក្នុងមូលដ្ឋានរាជធានីភ្នំពេញ ឱ្យកាន់តែល្អប្រសើរថែមទៀត កាលពីរសៀលថ្ងៃទី២៤ ខែមិថុនា ឆ្នាំ២០២៦នេះ ដែលមានការចូលរួមពីលោក គង់ វិបុល អគ្គនាយក នៃអគ្គនាយកដ្ឋានពន្ធដារ ។
យោងតាមលោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា បន្ទាប់ពីស្តាប់របាយការណ៍ របស់លោកប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ស្តីពីវឌ្ឍនភាពនៃការផ្តល់សេវាសុរិយោដីរួចមក លោក គង់ វិបុល បានបញ្ជាក់ថាកិច្ចប្រជុំថ្ងៃនេះគឺជារឿងល្អបំផុតធ្វើយ៉ាងណា ឱ្យមន្ត្រីជំនាញពាក់ព័ន្ធអាចបន្ស៊ីការងាររបស់ខ្លូន និងពិភាក្សារិះរកមធ្យោបាយ ដើម្បីជំរុញការផ្តល់សេវា ជូនប្រជាពលរដ្ឋបានកាន់តែល្អប្រសើរ។ ជាមួយគ្នានេះ ក៏មានការធ្វើបទបង្ហាញខ្លី ស្តីពីយន្តការនៃការផ្តល់សេវាបង់ពន្ធប្រថាប់ត្រា និងការបង់ពន្ធនានាដែលអគ្គនាយកដ្ឋានបាននឹងកំពុងអនុវត្តដោយប្រើប្រាស់ ប្រព័ន្ធបច្ចេកវិទ្យា ហើយផ្តល់លទ្ធភាពជូនមន្ត្រី និងប្រជាពលរដ្ឋអាចមើលឃើញ ពីលំហូរចរន្តការលិខិតស្នាមបានដោយងាយស្រួល។
កិច្ចប្រជុំនេះដែរ លោក ឃួង ស្រេង បានផ្តល់យោបល់ថា គួរមានយន្តការទំនាក់ទំនងផ្ទៃក្នុង រវាងមន្ត្រីផ្តល់សេវាទាំងភាគីអគ្គនាយកដ្ឋានពន្ធដារ ទាំងអង្គភាពច្រកចេញចូលតែមួយ និងមន្ទីររៀបចំដែនដី នគរូបនីយកម្ម សំណង់ និងសុរិយោដី ដើម្បីជំរុញនីតិវិធីផ្តល់សេវា ជូនប្រជាពលរដ្ឋកាន់តែល្អប្រសើរ ហើយការលើកឡើងនេះ ត្រូវបានទទួលការឯកភាពពីលោកម គង់ វិបុល ផងដែរ។
ជាមួយគ្នានេះដែរ លោក ឃួង ស្រេង ក៏បានណែនាំមន្ត្រីពាក់ព័ន្ធគ្រប់ផ្នែក ត្រូវពង្រឹងការផ្ដល់សេវាសាធារណៈ ក្នុងភូមិសាស្រ្តរាជធានីភ្នំពេញ ឱ្យកាន់តែល្អប្រសើរ ពិសេសការផ្ដល់សេវាសុរិយោដី និងជំរុញផ្សព្វផ្សាយបន្ថែម ពីផ្តល់សេវារដ្ឋបាលតាមប្រព័ន្ធអនឡាញ(Online) នៅអង្គភាពច្រកចេញចូលតែមួយ រាជធានីភ្នំពេញផងដែរ៕
