រយៈពេល៦ខែ ស៊ីម៉ាក់ រកឃើញនិងកម្ទេចចោល គ្រាប់យុទ្ធភណ្ឌសង្គ្រាមសៀមឈ្លានពាន ជាង៨ពាន់គ្រាប់
ភ្នំពេញ៖ លោក ហេង រតនា អគ្គនាយកស៊ីម៉ាក់ បានឱ្យដឹងថា ក្នុងរយៈពែល៦ខែ ក្រុមការងារស៊ីម៉ាក់ បានរុករកឃើញ និងកម្ទេចចោលគ្រាប់យុទ្ធភណ្ឌគ្រប់ប្រភេទ ចំនួនជាង៨.៤០០គ្រាប់ ដែលក្នុងចំនួននេះមានគ្រាប់បែកចង្កោម ចំនួន៤.៤៣៦គ្រាប់។
បើតាមលោក ហេង រតនា បានប៉ាន់ស្មានថា ទាហានសៀមអាច បាញ់គ្រាប់បែកចង្កោម ប្រភេទគ្រាប់១៥៥មម ចំនួនប្រមាណ១២០.០០០ទៅ១៣០.០០០គ្រាប់ និងមានកូនគ្រាប់បែកចង្កោម ប្រភេទM42,M46 និងM85 ប្រមាណ៦លានទៅ៧លានគ្រាប់ ហើយអាចមានកម្រិតមិនផ្ទុះ (failure rate)ប្រមាណ២៥%ទៅ៣០% ។
នៅលើគណនីហ្វេសប៊ុក នៅព្រលប់ថ្ងៃទី២៥ ខែកក្កដា ឆ្នាំ២០២៦នេះ លោក ហេង រតនា បានបង្ហោះរូបភាពជាច្រើនសន្លឹក ដោយភ្ជាប់នូវខ្លឹមសារទាំងស្រុងថា៖
ការដោះស្រាយវិបត្តិសំណល់ គ្រាប់យុទ្ធភណ្ឌសង្គ្រាមសៀមឈ្លានពាន ក្នុងរយៈពេល៦ខែ (មករា-មិថុនា ឆ្នាំ២០២៦) នេះអង្គភាពCMAC បានសម្រេចលទ្ធផលគួរឱ្យកត់សំគាល់ដូចខាងក្រោម៖
១. ការងារផ្សព្វផ្សាយអប់រំយល់ដឹង ពីគ្រោះថ្នាក់ដោយសារគ្រាប់មិនទាន់ផ្ទុះ តាមក្រុមគោលដៅ បានចំនួន ១៤.៤៧៧លើក មានប្រជាពលរដ្ឋចូលរួម សរុបចំនួន១.៣៧៤.៨៨៧៧នាក់។
២. ការងារស្រាវជ្រាវ ព័ត៌មាន សំណល់យុទ្ធភណ្ឌសង្គ្រាមសៀមឈ្លានពាន៖ អង្គភាពCMAC បានដំណើរការស្រាវជ្រាវព័ត៌មាន តំបន់រងផលប៉ះពាល់ ដោយសារសង្គ្រាមសៀមឈ្លានពាន នៅតាមបណ្តាខេត្តទាំង៧ រួមមាន ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ សៀមរាប និងកោះកុង ក្នុង២២ស្រុក ស្មេីនឹង៦០ឃុំ/សង្កាត់ ស្មេីនឹង៣៣៥ភូមិ ដោយកំណត់ត្រាលទ្ធផលដូចខាងក្រោម៖
* ទីតាំងទម្លាក់គ្រាប់បែកចំនួន ២៦៥ ពហុកោណ ស្មើនឹងផ្ទៃដីរងផលប៉ះពាល់ចំនួន ៤.៨២៩ហិកតា
* ទីតាំងគ្រាប់បែកចង្កោមចំនួន៣.៨៥៨ ពហុកោណ ស្មើនឹងផ្ទៃដីរងផលប៉ះពាល់ ចំនួន ២៦២.៥០៦ហិកតា តាមការប៉ាន់ស្មានអាច ទាហានសៀម បាញ់គ្រាប់បែកចង្កោម ប្រភេទគ្រាប់១៥៥មម ចំនួនប្រមាណ១២០.០០០ទៅ១៣០.០០០គ្រាប់ និងមានកូនគ្រាប់បែកចង្កោម ប្រភេទM42,M46 និងM85 ប្រមាណ៦លានទៅ៧លានគ្រាប់ ហើយអាចមានកម្រិតមិនផ្ទុះ (failure rate)ប្រមាណ២៥%ទៅ៣០% ។
* ទីតាំងគ្រាប់មិនទាន់ផ្ទុះ ប្រភេទផ្សេងៗទៀតមានចំនួន១.៤០១ ពហុកោណ មានផ្ទៃដីរងផលប៉ះពាល់ចំនួន១១៩.៨៧០ហិកតា
សរុបរួម៖ មានចំនួន៥.៣៤៨ ទីតាំង(ពហុកោណ) ស្មើនឹង៣៨៧.២០៦ហិកតា (ឬ៣.៨៧២គីឡូម៉ែត្រការេ) ជាមួយកំណត់រកឃើញ ភស្តុតាងជាក់ស្តែង ជាង ១៨.៥០០ ភស្តុតាង។
សំគាល់៖ ភូមិសាស្ត្រមិនទាន់អាចស្រាវជ្រាវព័ត៌មាន វាយតម្លៃតំបន់ផ្ទៃដីរងផលប៉ះពាល់ បានមានចំនួន១៤ភូមិ និងតំបន់សមរភូមិជួរមុខ តាមខ្សែបន្ទាត់ព្រំដែន ទាំងស្រុង។
៣. ការបោសម្អាត រំដោះផ្ទៃដី អាទិភាពសម្រាប់គាំទ្រជនភៀសសឹក វិលត្រឡប់ទៅលំនៅដ្ឋានវិញ បានចំនួន៥.៩១១ខ្នងផ្ទះ ស្មើនឹងផ្ទៃដីប្រមាណជិត១.៤៥៥ហិកតា តំបន់ផ្ទៃដីសាលារៀនចំនួន៨៧ខ្នង មណ្ឌលសុខភាពស្មើនឹងផ្ទៃដី១៥៤ហិកតា តំបន់មណ្ឌលសុខភាពចំនួន២០ទីតាំង វត្តអារាមមានចំនួន៦វត្ត និងហេដ្ឋានរចនាសម្ព័ន្ធផ្សេងៗ ចំនួន១១៤ទីតាំង។
* បានរុករកឃើញ និងកម្ទេចចោលគ្រាប់យុទ្ធភណ្ឌគ្រប់ប្រភេទ ចំនួនជាង៨.៤០០គ្រាប់ ដែលក្នុងចំនួននេះមានគ្រាប់បែកចង្កោម ចំនួន៤.៤៣៦គ្រាប់ ។
