ភ្នំពេញ៖ លោក សយ សុភាព អគ្គនាយកព័ត៌មាន ដើមអម្ពិល និងជាប្រធានសមាគម អ្នកកាសែតកម្ពុជា-ចិន បានលើកឡើងចោទជាសំនួរថា តើអង្គការខុមហ្រ្វែល (COMFREL) និងបក្ខពួក នៅតែចិញ្ចឹមចិត្ត ធ្វើបដិវត្តន៍ពណ៌ លើទឹកដីកម្ពុជា ឬយ៉ាងណា?
ការលើកឡើងរបស់លោក សយ សុភាព បែបនេះ បន្ទាប់ពីនាយកប្រតិបត្តិអង្គការខុមហ្រ្វែល (COMFREL) គឺលោក គល់ បញ្ញា បានផ្ដល់បទសម្ភាន៍មួយ ក្នុងវេទិកាសារព័ត៌មាន The Cambodia Daily Khmer ដោយបានលើកយកប្រធានបទ «បដិវត្ត» មកវែកញែកដោយផ្សាភ្ជាប់បញ្ហានេះ ទៅនឹងការដឹកនាំ របស់រាជរដ្ឋាភិបាល។
នៅក្នុងបទសម្ភាសន៍ លោក គល់ បញ្ញា បានលើកឡើងថា «បើខ្លាចពលរដ្ឋធ្វើបដិវត្ត ហេតុអ្វីរដ្ឋាភិបាលមិនព្រមដឹកនាំប្រទេសឲ្យមានសេរីភាព មាននីតិរដ្ឋ និងមានប្រជាធិបតេយ្យទៅ?»។
ឆ្លើយតបទៅនឹងការលើកឡើងរបស់ នាយកប្រតិបត្តិអង្គការខុមហ្វ្រែល រូបនេះ លោក សយ សុភាព នៅព្រឹកថ្ងៃទី១៨ ខែវិច្ឆិកា ឆ្នាំ២០២២នេះ បានចោទជាសំនួរថា «បើអញ្ចឹងបានសេចក្តីថា ក្រុមអស់លោកនៅតែចិញ្ចឹមចិត្ត ធ្វើបដិវត្តន៍ពណ៌មែនទេ?»។
លោក សយ សុភាព បន្ថែមថា ឥឡូវការបង្ករហេតុ បានចាប់ផ្តើមទៀតហើយ ពីក្រុមពួកចង្រៃ៣ជំនាន់នេះ (បក្ខពួក សម រង្ស៊ី និងអង្គការសង្គមស៊ីវិល ចាយលុយអាមេរិកនិងអឺរ៉ុបមួយចំនួន) ។
ជុំវិញនៃសញ្ញាបង្ករហេតុនេះ លោក សយ សុភាព បានបង្ហាញនូវអារម្មណ៍ អាណិតដល់សកម្មជន(ប្រឆាំង) នៅខាងក្នុង ដែលនឹងត្រូវអាចរងគ្រោះជំនួសក្រុមនេះ (ត្រៀមរត់ចោលស្រុកនិងដេកគុក) ចំណែកឯក្រុមអ្នកផ្ដើមបង្ករហេតុ បែរជាដេកលើគំនរទុក្ខ របស់ពួគគេទៅវិញ។
ឆ្លៀតក្នុងឱកាសនេះ លោក សយ សុភាព ក៏បានផ្ដាំទៅសូមសកម្មជនបក្សប្រឆាំង កុំឱ្យចាញ់បោកហើយ ចាញ់បោកទៀត គិតពីសុវត្ថភាព និង ក្រុមគ្រួសារ ខំកសាងជីវភាពប្រសើរបំផុត។
លោកថា តែបើអ្នកណាជឿងុបងុល អ្នកនោះនឹងដើរខុសគន្លងច្បាប់ មិនអនុគ្រោះទេ៕
