ពេលថ្មីៗកន្លងទៅនេះ ខណៈពេលផ្តល់បទសម្ភាសន៍ជាមួយអ្នកសារព័ត៌មានលោក Antony Blinken រដ្ឋមន្ត្រីការបរទេសអាមេរិកបានថ្លែងថា សហរដ្ឋអាមេរិកមានពាក្យសន្យាស្តីពីការធានាឱ្យតំបន់តៃវ៉ាន់មានសមត្ថភាពការពារខ្លួនឯង ព្រមទាំងបានថ្លែងទៀតថា មានប្រទេសជាច្រើនបានចាត់ទុកការបំផ្លាញសភាពការណ៍បច្ចុប្បន្នដោយប្រើកម្លាំងអាវុធជាឯកតោភាគី ជាការគំរាមកំហែងយ៉ាងខ្លាំងចំពោះសុខសន្តិភាព ។ ប៉ុន្តែ ប្រសាសន៍ផ្ទាល់ខ្លួនរបស់លោកក្នុងជំនួបពិភាក្សារវាងថ្នាក់ដឹកនាំជាន់ខ្ពស់ចិននិងអាមេរិកកាលពីចុងខែមុន បែរជាបានថ្លែងថា ភាគីអាមេរិកនឹងបន្តប្រកាន់ខ្ជាប់គោលនយោបាយប្រទេសចិនតែមួយជាបន្តបន្ទាប់ ។ លោកនិយាយក្រឡាស់ភ្លាមៗបែបនេះ សាកសមនឹងឋានៈរបស់លោកដែលជាប្រមុខការទូតរបស់សហរដ្ឋអាមេរិកទេ?
មួយរយៈពេលកន្លងទៅនេះ ស្ថានការណ៍ដ៏តានតឹងនៃតំបន់ច្រកសមុទ្រតៃវ៉ាន់បានឡើងកម្តៅជាបន្តបន្ទាប់ មូលហេតុគឺដោយមកពី មួយផ្នែក អាជ្ញាធរតៃវ៉ាន់ប៉ុនប៉ងវាយទម្លុះក្របខ័ណ្ឌនៃគោលការណ៍ចិនតែមួយជាច្រើនលើក ហើយប៉ុនប៉ងពង្រីកលំហធ្វើសកម្មភាពរបស់ពួកចង់ឱ្យតៃវ៉ាន់ឯករាជ្យ មួយផ្នែកទៀតគឺអ្នកនយោបាយអាមេរិកបានបណ្តែតបណ្តោយញុះញង់និងផ្តល់ការគាំទ្រដល់ពួកចង់ឱ្យតៃវ៉ាន់ឯករាជ្យ ។
សេចក្តីប្រកាសនៃកិច្ចប្រជុំពេញអង្គលើកទី៦នៃគណៈកម្មាធិការមជ្ឈិមបក្សកុម្មុយនិស្តចិនអាណត្តិទី១៩ដែលប្រកាសកាលពីថ្ងៃទី១១ខែវិចិ្ឆកាបានបង្ហាញយ៉ាងច្បាស់លាស់ថា ប្រទេសចិនប្រកាន់ខ្ជាប់គោលការណ៍ចិនតែមួយនិង “មតិឯកភាពគ្នានៃត្រើយទាំងសងខាងច្រកសមុទ្រតៃវ៉ាន់នៅឆ្នាំ១៩៩២” ប្រឆាំងទង្វើបំបែកបំបាក់នៃពួកចង់ឱ្យតំបន់តៃវ៉ាន់ឯករាជ្យយ៉ាងដាច់ខាត និងប្រឆាំងកម្លាំងខាងក្រៅធ្វើការជ្រៀតជ្រែកយ៉ាងដាច់ខាត ។ សេចក្តីប្រកាសនេះបានអធិប្បាយយ៉ាងច្បាស់លាស់នូវកាបេ្តជ្ញាចិត្តយ៉ាងមុតមាំនិងគោលជំហរយ៉ាងម៉ឺងម៉ាត់របស់ភាគីចិនក្នុងការគាំពារអធិបតេយ្យភាព សន្តិសុខនិងផលប្រយោជន៍អភិវឌ្ឍន៍របស់ប្រទេសជាតិ ។ អ្នកនយោបាយអាមេរិកមួយចំនួនប៉ុនប៉ងយកបញ្ហាតំបន់តៃវ៉ាន់ធ្វើជាលេសដើម្បីទប់ស្កាត់ការអភិវឌ្ឍរបស់ចិន នេះជាការវិនិច្ឆ័យដ៏ខុសឆ្គងយ៉ាងធ្ងន់ធ្ងរចំពោះស្ថានការណ៍ ។
សូមបញ្ជាក់ថា ភាគីចិនបានព្រមានម្តងហើយម្តងទៀតថា បញ្ហាតៃវ៉ាន់ជាបញ្ហាសំខាន់បំផុតនិងរសើបបំផុតក្នុងទំនាក់ទំនងរវាងចិននិងអាមេរិក ។ លក្ខខណ្ឌសសម្រាប់ឱ្យទំនាក់ទំនងរវាងចិននិងអាមេរិកវិលត្រឡប់ទៅរកផ្លូវអភិវឌ្ឍន៍ប្រកបដោយសិ្ថរភាពនិងនិរន្តរភាព គឺភាគីអាមេរិកចាំបាច់ត្រូវបញ្ឈប់ទំនាក់ទំនងផ្លូវការជាមួយអាជ្ញាធរតំបន់តៃវ៉ាន់ភ្លាមទោះតាមទម្រង់ណាក៏ដោយ មិនបញ្ចេញសញ្ញាខុសឆ្គងណាទៅកាន់ពួកបំបែកបំបាក់ដែលចង់ឱ្យតៃវ៉ាន់ឯករាជ្យ ព្រមទាំងបញ្ឈប់ឧបាយកលដែលនិយាយផ្សេងធ្វើផ្សឹង ។
បច្ចុប្បន្ននេះ មហាដីគោកចិនបានក្តាប់ជាប់សិទ្ធិណែនាំនិងសិទ្ធិម្ចាស់ការក្នុងទំនាក់ទំនងរវាងត្រើយទាំងសងខាងនៃច្រកសមុទ្រតៃវ៉ាន់រួចហើយ ការបង្រួបបង្រួមរបស់ប្រទេសចិនជាចរន្តប្រវត្តិសាស្ត្រដែលមិនអាចរារាំងបានទេ ។ សូមដាស់តឿនភាគីអាមេរិកកុំមើលស្រាលចំពោះការប្តេជ្ញាចិត្តដ៏មុតមាំ ឆន្ទៈដ៏មោះមុតនិងសមត្ថភាពដ៏ខ្លាំងក្លារបស់ប្រជាជនចិនក្នុងការគាំពារអធិបតេយ្យភាពជាតិនិងបូរណភាពទឹកដីនោះឡើយ ។ ទង្វើណាដែលចង់បង្ករឿងហេតុចំពោះគោលការណ៍ចិនតែមួយនិងប៉ុនប៉ងរារាំងនិន្នាការបង្រួបបង្រួមរបស់ប្រជាជាតិចិន មុខជានឹងទទួលបរាជ័យជាក់ជាមិនខាន!
