បរទេស៖ លោក វ៉ាង យី ដែលជារដ្ឋមន្ត្រីការបរទេស និងជាទីប្រឹក្សារដ្ឋរបស់ប្រទេសចិន នៅថ្ងៃព្រហស្បតិ៍ម្សិលមិញនេះ បាននិយាយប្រាប់ ប្រធានាធិបតីកូរ៉េខាងត្បូង លោក មូន ជេអ៊ីន ថា ប្រទេសទាំងពីរត្រូវតែបន្ត ធ្វើមិនចុះចាញ់ក្នុងកិច្ចព្យាយាម ដោះស្រាយបញ្ហាឧបទ្វីបកូរ៉េ តាមរយៈកិច្ចពិភាក្សាគ្នា។
នៅក្នុងអំឡុងដំណើរទស្សនកិច្ច ក្នុងទីក្រុងសេអ៊ូលនោះ លោករដ្ឋមន្ត្រីការបរទេសចិនរូបនេះ បានមានប្រសាសន៍ថា ភាគីទាំងពីរ គួរតែសម្របទៅតាមគោលដៅ លុបបំបាត់អាវុធនុយក្លេអ៊ែលើឧបទ្វីបកូរ៉េ ដោយពោលសំដៅដល់ មហិច្ឆិតានុយក្លេអ៊ែកូរ៉េខាងជើង។
យោងតាមសេចក្តីថ្លែងការណ៍ មួយពីក្រសួងកិច្ចការបរទេស របស់ប្រទេសចិន បានឲ្យដឹងថា លោក វ៉ាង យី បានបន្ថែមទៀតថា ទីក្រុងប៉េកាំងមានឆន្ទៈ ចង់ធ្វើឲ្យកាន់តែស៊ីជម្រៅឡើង ក្នុងកិច្ចសហប្រតិបត្តិការគ្នា ជាមួយប្រទេសកូរ៉េខាងត្បូង លើការទប់ស្កាត់និងគ្រប់គ្រងការ រាតត្បាតឆ្លងនៃមេរោគកូវីដ១៩ ៕
ប្រែសម្រួល៖ ប៉ាង កុង
