បំផ្ទុះគ្រាប់បែក នៅខាងក្រៅព្រះវិហារកាតូលិក នៅប្រទេសឥណ្ឌូនេស៊ី ផ្នែកខ្លះនៃរាងកាយ មនុស្ស ត្រូវបានគេប្រទះ ឃើញនៅកន្លែងកើតហេតុ

បរទេស៖ នៅថ្ងៃអាទិត្យ ការផ្ទុះមួយបានកើតឡើងនៅខាងក្រៅព្រះវិហារកាតូលិក នៅក្នុងទីក្រុង Makassar ដែលមានទីតាំងស្ថិតនៅក្នុងខេត្ត Sulawesi ភាគខាងត្បូងប្រទេសឥណ្ឌូនេស៊ី។ ប៉ូលីសត្រូវបានគេរាយការណ៍ថាបានព័ទ្ធជុំវិញតំបន់ជុំវិញព្រះវិហារ។

យោងតាមសារព័ត៌មាន Sputnik ចេញផ្សាយនៅថ្ងៃទី២៨ ខែមីនា ឆ្នាំ២០២១ បានឱ្យដឹងថា រ៉យទ័របានរាយការណ៍ដោយដកស្រង់ប្រភពពីព័ត៌មានក្នុងស្រុកថា រថយន្តដែលចតនៅក្បែរនោះរងការខូចខាត។

យោងតាមប្រព័ន្ធផ្សព្វផ្សាយក្នុងស្រុកការផ្ទុះនេះបានកើតឡើងនៅម៉ោងប្រហែល ១០ និង ២៨ នាទីព្រឹកម៉ោងក្នុងស្រុកធ្វើឱ្យខូចខាតរបងព្រះវិហារ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា នៅពេលនៃការផ្ទុះនេះ មានមនុស្សនៅខាងក្នុងព្រះវិហារ។ ផ្នែកខ្លះនៃរាងកាយរបស់មនុស្ស ត្រូវបានគេរាយការណ៍ថា បានគេរកឃើញនៅកន្លែងនោះហើយអ្នករងរបួសជាច្រើនត្រូវបានបញ្ជូនទៅមន្ទីរពេទ្យ។ វីដេអូដែលបង្ហាញពីរូបភាពកាមេរ៉ា CCTV ដែលថតបាននៅពេលផ្ទុះត្រូវបានចែកចាយតាមប្រព័ន្ធអ៊ីនធឺណេតផងដែរ៕

ប្រែសម្រួលៈ ណៃ តុលា