តៃប៉ិ៖ ក្រសួងការពារជាតិកោះតៃវ៉ាន់ ដែលគ្រប់គ្រងដោយខ្លួនឯង បានឲ្យដឹងថា យន្តហោះចម្បាំង របស់ចិនចំនួន ២៥ គ្រឿង បានរំលោភចូលទៅក្នុងតំបន់ កំណត់អត្តសញ្ញាណ ការពារដែនអាកាស របស់កោះតៃវ៉ាន់ កាលពីថ្ងៃច័ន្ទ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន ក្យូដូជប៉ុន។
សកម្មភាពរបស់ចិន ទំនងជាការឆ្លើយតបទៅនឹង ទំនាក់ទំនង កាន់តែជិតស្និទ្ធ រវាងសហរដ្ឋអាមេរិក និងកោះតៃវ៉ាន់។ សហរដ្ឋអាមេរិក បានឲ្យដឹងនៅថ្ងៃសុក្រ សប្ដាហ៍មុននេះថា ខ្លួនបានចេញនូវគោលការណ៍ ណែនាំថ្មី ដើម្បីលើកទឹកចិត្តដល់ការចូលរួម របស់រដ្ឋាភិបាល សហរដ្ឋអាមេរិក ជាមួយកោះតៃវ៉ាន់ ដែលប្រទេសនេះមិនមានទំនាក់ទំនងការទូត។
យន្ដហោះចម្បាំងដែលចូលរួមក្នុងការឈ្លានពានរួមមានយន្ដហោះចម្បាំង J-16 ចំនួន ១៤ គ្រឿងនិងយន្តហោះទម្លាក់គ្រាប់បែក H-6K ចំនួន ៤ គ្រឿងនេះបើយោងតាមក្រសួងតៃវ៉ាន់។ ប្រទេសចិន បានបញ្ជូនយន្តហោះចំនួន ១៥ គ្រឿងចូលទៅក្នុងតំបន់កំណត់អត្តសញ្ញាណការពារដែនអាកាសរបស់កោះតៃវ៉ាន់ នៅថ្ងៃពុធ និង ១១ គ្រឿងទៀតនៅថ្ងៃសុក្រ។
សម្ពាធកាន់តែខ្លាំងឡើងរបស់ចិន លើកោះប្រជាធិបតេយ្យមួយនេះ ដែលក្រុងប៉េកាំងចាត់ទុកជាខេត្ត ដែលមិនចេះរីងស្ងួត កំពុងរង់ចាំការបង្រួបបង្រួមដោយកងកម្លាំងបើចាំបាច់ គឺជាប្រភពនៃការព្រួយបារម្ភរបស់សហរដ្ឋអាមេរិក។
កាលពីថ្ងៃសុក្រអ្នកនាំពាក្យក្រសួងការបរទេសសហរដ្ឋអាមេរិកលោក Ned Price បានលើកឡើងថា នាយកដ្ឋានបានចេញគោលការណ៍ណែនាំថ្មី សម្រាប់អន្តរកម្មរវាងរដ្ឋាភិបាលសហរដ្ឋអាមេរិក ជាមួយសមភាគីតៃវ៉ាន់ ដោយបន្ថែមថាការចូលរួមដែលបានប្រមើលមើលនឹងឆ្លុះបញ្ចាំងពី“ ទំនាក់ទំនងក្រៅផ្លូវការរបស់យើងកាន់តែស៊ីជម្រៅ”៕
ដោយ ឈូក បូរ៉ា
