វ៉ាស៊ីនតោន៖ ទីភ្នាក់ងារព័ត៌មាន ចិនស៊ិនហួ បានចុះផ្សាយនៅថ្ងៃទី៣០ ខែមេសា ឆ្នាំ២០២១នេះថា សេតវិមាន បានឲ្យដឹងកាលពី ថ្ងៃព្រហស្បតិ៍ថា យោធាសហរដ្ឋអាមេរិក នឹងត្រូវបញ្ជូនបន្ថែមទៀត នូវកងកម្លាំង ដល់អាហ្វហ្គានីស្ថាន ដើម្បីការពារសហរដ្ឋអាមេរិក និងកងកម្លាំងចម្រុះ ក្នុងអំឡុងពេល ដកកងទ័ពមកវិញ ។
លោកស្រី Karine Jean-Pierre អនុប្រធានលេខាធិការព័ត៌មាន ប្រចាំនៅសេតវិមាន បានប្រាប់ដល់អ្នកសារព័ត៌មាន នៅលើយន្តហោះ Air Force One ថា “ការដកថយកងទ័ពកំពុងដំណើរការ” ដោយនិយាយថា យោធាសហរដ្ឋអាមេរិក នឹងដាក់ពង្រាយទ្រព្យសម្បត្តិយោធា បន្ថែមទៅកាន់អាហ្វហ្គានីស្ថាន និងក្នុងតំបន់ដើម្បីគ្របដណ្តប់ការដកទ័ពនេះ ។
លោកស្រីបានកត់សម្គាល់ថា “ធាតុផ្សំនៃក្រុមការងារពិសេស របស់កងទ័ព Ranger នឹងត្រូវដាក់ពង្រាយ ជាបណ្តោះអាសន្ន ទៅកាន់ប្រទេសអាហ្វហ្គានីស្ថាន ដើម្បីជួយដល់ការការពារ កម្លាំងរបស់កងកម្លាំង នៅលើដីនៅពេលដែលយើង ចាប់ផ្តើមប្រតិបត្តិការ ដកទ័ពចេញ” ។
លោកស្រី Karine Jean-Pierre បានលើកឡើងទៀតថា រដ្ឋមន្ត្រីការពារជាតិលោក Lloyd Austin បានដឹកនាំក្រុមវាយប្រហារ ដោយនាវាដឹកយន្តហោះ នឹងផ្តល់នូវសមត្ថភាព ការពារកម្លាំងបន្ថែម នៅក្នុងតំបន់នេះ ទាំងស្រុងក្នុងការដកទ័ពចេញ ។
លោកស្រីបានបន្ថែមថា “ខណៈដែលសកម្មភាពទាំងនេះ ដំបូងនឹងបណ្តាលឱ្យ មានការកើនឡើង នូវកម្រិតកងកម្លាំង យើងនៅតែប្តេជ្ញាចិត្ត ឱ្យមានបុគ្គលិក យោធាសហរដ្ឋអាមេរិក ទាំងអស់ចេញ ពីប្រទេសអាហ្វហ្គានីស្ថាន ត្រឹមថ្ងៃទី១១ ខែកញ្ញាឆ្នាំ ២០២១” ។
មន្ទីរបញ្ចកោណ កាលពីសប្តាហ៍មុនបានឲ្យដឹងថា យន្តហោះទម្លាក់គ្រាប់បែក B-52 និងនាវាផ្ទុកយន្តហោះ USS Dwight D. Eisenhower នឹងដាក់ពង្រាយទៅកាន់តំបន់នេះដើម្បីការពារសហរដ្ឋអាមេរិក និងកងកម្លាំងចម្រុះ នៅពេលពួកគេ ចាកចេញពីប្រទេស អាហ្វហ្គានីស្ថាន ៕
ដោយ៖ ម៉ៅ បុប្ផាមករា
