ភ្នំពេញ៖ លោក សយ សុភាព អគ្គនាយកមជ្ឈមណ្ឌលសារព័ត៌មានដើមអម្ពិល និងជាប្រធានសមាគមអ្នកសារព័ត៌មានកម្ពុជា-ចិន បានលើកឡើងថា អាមេរិកចាប់ផ្ដើមរករឿង នៅមជ្ឈឹមបូព៌ា បន្ទាប់ពីរករឿងប្រទេសខ្លះនៅអាស៊ី ក្នុងនោះមានប្រទេសកម្ពុជាផង ដែលអាមេរិកចោទនិងមួលបង្កាច់ ថាមានមូលដ្ឋានយោធារបស់ចិន។
លោក សយ សុភាព លើកឡើងបែបនេះ បន្ទាប់ពីមានការចុះផ្សាយថា រដ្ឋាបាលអាមេរិក លោក Joe Biden កំពុងព្យាយាមយ៉ាងសកម្មភាព ដើម្បីរារាំងការប៉ុនប៉ង របស់រដ្ឋាភិបាលប៉េកាំង នៅក្នុងការពង្រឹងវត្តមានយោធា របស់ខ្លួននៅក្នុង តំបន់មជ្ឈឹមបូពា៍។
តាមរយៈនេះរដ្ឋាភិបាល ក្រុងវ៉ាស៊ីនតោន ក៏បានចេញ ជាសេចក្តីថ្លែងការណ៍ ដើម្បីព្រមានប្រទេស នៅក្នុងតំបន់មជ្ឈឹមបូព៍ាទាំងអស់ផងដែរ មិនត្រូវពាក់ព័ន្ធឬអនុញ្ញាតិឲ្យមានមូលដ្ឋានទ័ពចិន នៅក្នុងប្រទេស របស់ពួកគេឡើយ បើ មិនដូច្នេះពួកគេនឹងប្រាកដ ជាមានបញ្ហាគ្រោះថ្នាក់ ជាមិនខានចំពោះទំនាក់ទំនងសន្តិសុខជាតិ ជាមួយនឹងអាមេរិក ។
មន្ត្រីជាន់ខ្ពស់ របស់ក្រសួងការបរទេស អាមេរិក Mira Resnick បាននិយាយបែបនេះថា មានបញ្ហាច្រើនប្រភេទ ដែលយើងបានកំណត់ចាត់ចូលថា ជាអ្វីដែលអាមេរិកមិនអាចទទួលយកបាន នៅពេលដែលប្រទេសណា មួយ មានទំនាក់ទំនងជាកិច្ចសហប្រតិបត្តិ ជាមួយនឹងរដ្ឋាភិបាលក្រុងប៉េកាំង ជាពិសេសគឺទៅនឹងវិស័យយោធា។
នៅលើគេហទំព័រហ្វេសប៊ុក នៅយប់ថ្ងៃទី១១ ខែសីហា ឆ្នាំ២០២១នេះ លោក សយ សុភាព បានលើកឡើងថា «នេះហើយអាមេរិក បន្ទាប់ពីរករឿងប្រទេសខ្លះនៅអាស៊ី ក្នុងនោះមានប្រទេសកម្ពុជាផង ដែលអាមេរិកចោទមួលបង្កាច់ ថាមានមូលដ្ឋានយោធារបស់ចិន ឥឡូវរាលដាលរករឿងប្រទេសខ្លះ នៅមជ្ឈិមបូព៌ាដោយចោទដូចគ្នា និងព្រមានគេឯងថែមទៀត»។
លោក សយ សុភាព បន្តថា «ចុះចំណែកអាមេរិកខ្លួនឯង ដើរកូពេញពិភពលោក និង មានមូលដ្ឋានយោធារាប់រយនៅក្រៅប្រទេស ម៉េចមិននិយាយផង? ថាអីតែគេ។ អាមេរិកពិតជាខូច និងអ្នកនាំភ្លើងដល់គេមែន»៕
