ប៉េកាំង៖ អ្នកនាំពាក្យ ក្រសួងការពារជាតិចិន បានជំរុញឱ្យសហរដ្ឋអាមេរិក បញ្ឈប់ការធ្វើសមយុទ្ធយោធាជើងទឹក និងទ័ពអាកាសជាអរិភាព ប្រឆាំងនឹងប្រទេសចិន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Tan Kefei អ្នកនាំពាក្យក្រសួងការពារជាតិ របស់ប្រទេសចិន បានធ្វើការកត់សម្គាល់ ក្នុងការឆ្លើយតបទៅនឹង ការស៊ើបអង្កេតរបស់ប្រព័ន្ធផ្សព្វផ្សាយ ទាក់ទងនឹងកិច្ចប្រជុំតាមវីដេអូ ដែលធ្វើឡើងដោយយោធាចិន និងអាមេរិក នាពេលថ្មីៗនេះ ក្រោមយន្តការនៃកិច្ចព្រមព្រៀង ពិគ្រោះយោបល់យោធា ដែនសមុទ្ររបស់ពួកគេ។
លោក Tan បានលើកឡើងថា ក្នុងការរក្សាសុវត្ថិភាពយោធា ផ្លូវអាកាស និងដែនសមុទ្ររបស់ចិន និងសហរដ្ឋអាមេរិក គឺជាដំណោះស្រាយជាមូលដ្ឋានបំផុត គឺភាគីអាមេរិក ដកខ្លួនចេញពីការធ្វើសមយុទ្ធជាអរិភាព។
កងទ័ពជើងទឹក និងទ័ពអាកាសអាមេរិក ធ្វើប្រតិបត្តិការឈ្លបយកការណ៍ អង្កេត និងសមយុទ្ធដែលមានគោលដៅខ្ពស់ និងហ្វឹកហ្វឺន សម្រាប់រយៈពេលដ៏យូរនៅជិតប្រទេសចិន ហើយជាញឹកញាប់ធ្វើសមយុទ្ធរំលោភបំពាន និងបង្កហេតុ។ លោកបានបញ្ជាក់ទៀតថា នេះ ជា ដើមចម នៃ បញ្ហា សុវត្ថិភាព ផ្លូវអាកាស និង ដែនសមុទ្រ យោធា រវាង ចិន និង អាមេរិក៕
ដោយ ឈូក បូរ៉ា
