បរទេស៖ ខណៈពេលដែលបញ្ជាក់ថា ប្រទេសចិននឹងក្រោកឈរឡើង ដើម្បីផលប្រយោជន៍សេដ្ឋកិច្ចស្របច្បាប់របស់ខ្លួន នៅចំពោះមុខទណ្ឌកម្មរបស់ លោកខាងលិចនោះ រដ្ឋមន្ត្រីការបរទេសរបស់ប្រទេសនេះ លោក Wang Yi បានបដិសេធចំពោះគំនិតដែលថា រដ្ឋាភិបាលទីក្រុងប៉េកាំងកំពុងឈរ នៅខាងភាគីរុស្ស៊ី នៅក្នុងជម្លោះអ៊ុយក្រែន។
យោងតាមសារព័ត៌មាន RT ចេញផ្សាយកាលពីថ្ងៃទី១៥ ខែមីនា ឆ្នាំ២០២២ បានឱ្យដឹងដោយផ្អែកតាម ការលើកឡើងរបស់លោក Wang Yi ក្នុងអំឡុងពេលសន្ទនាតាមទូរស័ព្ទ ជាមួយសមភាគីអេស្ប៉ាញលោក José Manuel Albares Bueno ថា “ចិនមិនមែនជាភាគីនៃវិបត្តិ [អ៊ុយក្រែន] ហើយក៏មិនចង់ឱ្យទណ្ឌកម្ម ប៉ះពាល់ដល់ប្រទេសចិនដែរ។ ប្រទេសចិនមានសិទ្ធិការពារសិទ្ធិ និងផលប្រយោជន៍ស្របច្បាប់របស់ខ្លួន” ។
រដ្ឋមន្ត្រីការបរទេសចិនរូបនេះ ក៏បានអំពាវនាវឱ្យរដ្ឋាភិបាលទីក្រុងមូស្គូ និង រដ្ឋាភិបាលទីក្រុង គៀវ ចូលរួមកិច្ចសន្ទនា ដើម្បីទប់ស្កាត់ការកើនឡើង ភាពតានតឹងបន្ថែមទៀត ដោយនិយាយថា មានតែការទូតប៉ុណ្ណោះដែលអាច “បើកទ្វារទៅរកសន្តិភាព” ៕
ប្រែសម្រួលៈ ណៃ តុលា
