តេអេរ៉ង់៖ បណ្តាញព័ត៌មាននិស្សិត (SNN) បានរាយការណ៍ថា សមាជិកសភាជាន់ខ្ពស់អ៊ីរ៉ង់ម្នាក់ បានឲ្យដឹងថា អ៊ីរ៉ង់បានធ្វើ “ការសម្រេចចិត្តផ្នែកនយោបាយ” របស់ខ្លួនលើកិច្ចព្រមព្រៀង ដែលអាចធ្វើទៅបាន ស្តីពីការរស់ឡើងវិញ នៃកិច្ចព្រមព្រៀងនុយក្លេអ៊ែរ ឆ្នាំ២០១៥ ដោយជំរុញឱ្យសហរដ្ឋអាមេរិក ធ្វើការសម្រេចចិត្ដ ដោយខ្លួនឯងមួយដែរ។
លោក Abbas Moqtadaee អនុប្រធានគណៈកម្មការសន្តិសុខជាតិ និងគោលនយោបាយការបរទេស របស់សភាអ៊ីរ៉ង់ ត្រូវបានដកស្រង់ដោយ SNN ថា “ការចរចាបានបញ្ចប់ ហើយដំណើរការកិច្ចព្រមព្រៀង កំពុងដំណើរការ។ ការសម្រេចចិត្តនយោបាយរបស់អ៊ីរ៉ង់ ត្រូវបានធ្វើឡើង ហើយអាមេរិក ត្រូវតែធ្វើការសម្រេចចិត្តនយោបាយ ដោយខ្លួនឯង”។
លោក Moqtadaee បានធ្វើការកត់សម្គាល់បន្ទាប់ពីកិច្ចប្រជុំបិទទ្វារ របស់សភាជាមួយរដ្ឋមន្ត្រីការបរទេសលោក Hossein Amir-Abdollahian លេខាធិការ នៃក្រុមប្រឹក្សាសន្តិសុខជាតិជាន់ខ្ពស់អ៊ីរ៉ង់ លោក Ali Shamkhani ប្រធានអ្នកចរចា នុយក្លេអ៊ែរអ៊ីរ៉ង់លោក Ali Bagheri Kani និងមន្ត្រីមកពីអង្គការ ថាមពលអាតូមិកអ៊ីរ៉ង់។
លោក Moqtadaee បានកត់សម្គាល់ថា សហរដ្ឋអាមេរិក គួរតែសម្រេចចិត្តថា តើខ្លួនមានបំណងគោរព “ផលប្រយោជន៍ពេញលេញ” របស់អ៊ីរ៉ង់ ឬ “រំលោភលើការសន្យា និងកិច្ចសន្យារបស់ពួកគេ ដូចកាលពីអតីតកាលដែរឬទេ” ។
លោក Vali Esmaili អនុប្រធានគណៈកម្មការសង្គម នៃសភាបានប្រាប់ IRNA ផ្លូវការថា “បច្ចុប្បន្នគ្រាប់បាល់ គឺស្ថិតនៅក្នុងដៃតុលាការ របស់សហរដ្ឋអាមេរិក និងលោកខាងលិច ហើយពួកគេគួរតែ ធ្វើការសម្រេចចិត្តត្រឹមត្រូវ ដើម្បីឆ្លើយតបនឹងអ៊ីរ៉ង់ ទាក់ទងនឹងកិច្ចព្រមព្រៀង” ។
លោក Esmaili បានលើកឡើងថា សភាបានផ្តល់សិទ្ធិអំណាចពេញលេញ ដល់ក្រុមចរចាអ៊ីរ៉ង់ ក្នុងកិច្ចចរចានុយក្លេអ៊ែរ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
កាលពីថ្ងៃចន្ទ ប្រទេសអ៊ីរ៉ង់ បានប្រកាសថា ខ្លួនបានបង្ហាញការឆ្លើយតប ជាលាយលក្ខណ៍អក្សររបស់ខ្លួន ចំពោះសេចក្តីព្រាងកិច្ចព្រមព្រៀង ដ៏មានសក្តានុពលរបស់សហភាពអឺរ៉ុប ដោយកត់សម្គាល់ថា ប្រសិនបើប្រតិកម្ម របស់សហរដ្ឋអាមេរិក មានលក្ខណៈជាក់ស្តែង និងភាពបត់បែន កិច្ចព្រមព្រៀងនុយក្លេអ៊ែរ នឹងសម្រេចបាន៕ ប្រែសម្រួល ឈូក បូរ៉ា
