តូក្យូ៖ នាយករដ្ឋមន្ត្រីជប៉ុន លោក ហ្វូមីអូ គីស៊ីដា បានផ្តល់យោបល់ថា ការរំលាយសភាតំណាងរាស្រ្ត និងការបោះឆ្នោតទូទៅអាចនឹងត្រូវធ្វើឡើង មុនពេលអាណត្តិរបស់លោក ជាមេដឹកនាំគណបក្សកាន់អំណាចបញ្ចប់នៅខែកញ្ញា ឆ្នាំ២០២៤។
ថ្លែងនៅក្នុងកម្មវិធីទូរទស្សន៍មួយ ដែលបានចាក់ផ្សាយកាលពីថ្ងៃអាទិត្យ លោក គីស៊ីដា បានសម្តែងការគាំទ្រចំពោះទស្សនៈដែលថា លោកគួរតែចាប់ផ្តើមអាណត្តិទីពីររបស់លោក បន្ទាប់ពីទទួលបានទំនុកចិត្តជាសាធារណៈនៅក្នុងការបោះឆ្នោតសភាជាន់ទាប សម្រាប់គោលនយោបាយរបស់លោក រួមទាំងការអនុវត្តការដំឡើងពន្ធ ដើម្បីផ្តល់មូលនិធិដល់ការចំណាយលើវិស័យការពារជាតិខ្ពស់។
លោក គីស៊ីដា ដែលបានឈ្នះការបោះឆ្នោតប្រធានាធិបតីនៃគណបក្សសេរីប្រជាធិបតេយ្យនៅឆ្នាំ២០២១ បានលើកឡើងថា “សំណួរគឺថាតើយើងនឹងធ្វើអ្វីឱ្យប្រាកដ ដើម្បីសម្រេចបាននោះ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន ។
នៅក្នុងបទសម្ភាសន៍ជាមួយ Kyodo News និងប្រព័ន្ធផ្សព្វផ្សាយផ្សេងទៀតកាលពីខែមុន លោក គីស៊ីដា បានលើកឡើងថា ការបោះឆ្នោតសភាជាន់ទាបគឺ “អាចធ្វើទៅបាន” មុនពេលរដ្ឋាភិបាលអនុវត្តការដំឡើងពន្ធ ដែលបានគ្រោងទុកដើម្បីគ្របដណ្តប់ការរំពឹងទុកនៃការចំណាយលើវិស័យការពារជាតិរបស់ប្រទេសជប៉ុននៅឆ្នាំ២០២៤ ឬក្រោយនេះ។
Koichi Hagiuda ដែលជាប្រធានគោលនយោបាយ LDP របស់លោក ហ្វូមីអូ គីស៊ីដា បានគាំទ្រផែនការរៀបចំការបោះឆ្នោតទូទៅមួយ មុនពេលអនុវត្តការដំឡើងពន្ធ។
នាយករដ្ឋមន្ត្រីមានប្រសាសន៍ចុងក្រោយ ស្តីពីការរំលាយសភាតំណាងរាស្រ្តរបស់ប្រទេសជប៉ុនក្រោមរដ្ឋធម្មនុញ្ញ។ លក្ខខណ្ឌបច្ចុប្បន្នរយៈពេល ៤ឆ្នាំសម្រាប់សមាជិកសភាជាន់ទាបនឹងផុតកំណត់នៅខែតុលា ឆ្នាំ២០២៥ លុះត្រាតែលោក គីស៊ីដា រំលាយសភា៕
ប្រែសម្រួល ឈូក បូរ៉ា
