ប៉េកាំង ៖ ប្រទេសចិនអាចដើរតួនាទីយ៉ាងសំខាន់ ក្នុងការជំរុញកំណើន សេដ្ឋកិច្ចពិភពលោក នៅឆ្នាំ២០២៣ លោក Hamid Rashid សេដ្ឋវិទូនាំមុខគេរបស់អង្គការ សហប្រជាជាតិ បានប្រាប់ស៊ីនហួ ក្នុងបទសម្ភាសន៍មួយ បន្ទាប់ពីរបាយការណ៍ ដ៏លេចធ្លោមួយ គឺស្ថានភាពសេដ្ឋកិច្ចពិភពលោក និងទស្សនវិស័យ (WESP) ឆ្នាំ២០២៣ ត្រូវបានចេញផ្សាយ កាលពីថ្ងៃពុធ។
ឆ្នាំ២០២២ គឺជាឆ្នាំដ៏លំបាកមួយ ប៉ុន្តែនៅឆ្នាំ ២០២៣ ប្រទេសចិន “អាចដើរតួនាទីយ៉ាងសំខាន់ ក្នុងការជំរុញកំណើន ពិភពលោក” លោក Rashid ប្រធានផ្នែកត្រួតពិនិត្យសេដ្ឋកិច្ចសកល ផ្នែកវិភាគសេដ្ឋកិច្ច និងគោលនយោបាយ នាយកដ្ឋានកិច្ចការសេដ្ឋកិច្ច និងសង្គមរបស់អង្គការ សហប្រជាជាតិ បានលើកឡើងថា ឆ្នាំ 2022 គឺជាឆ្នាំដ៏លំបាកមួយ ខណៈដែលការអត្ថាធិប្បាយ លើទស្សនវិស័យ សេដ្ឋកិច្ចរបស់ប្រទេសចិន ។
លោក Rashid ដែលជាអ្នកនិពន្ធនាំមុខគេ នៃរបាយការណ៍ដ៏ល្បីបានលើកឡើងថា “ខ្ញុំគិតថាធាតុផ្សំទាំងអស់ សម្រាប់ការស្តារឡើងវិញគឺនៅទីនោះ។ យើងមានសុទិដ្ឋិនិយមយ៉ាងខ្លាំង ចំពោះការងើបឡើងវិញ នៅក្នុងប្រទេសចិន” ។
លោកបានបង្ហាញទំនុកចិត្តថា សេដ្ឋកិច្ចរបស់ប្រទេសចិននឹងជួបប្រទះ “ការងើបឡើងវិញដ៏រឹងមាំ” នៅឆ្នាំ២០២៣ ដោយសារគោលនយោបាយ របស់ខ្លួនត្រូវបានតម្រឹមយ៉ាងត្រឹមត្រូវ មានន័យថា គោលនយោបាយសារពើពន្ធ និងគោលនយោបាយរូបិយវត្ថុ “ស្ថិតក្នុងទិសដៅត្រឹមត្រូវ”។
លោកបានបន្ដថា មិនមានការរឹតបន្តឹងគោល នយោបាយរូបិយវត្ថុ (នៅក្នុងប្រទេសចិន) ដែលជាការធានាឡើងវិញនោះទេ ព្រោះវាប្រហែលជាអាចរារាំង កំណើនសេដ្ឋកិច្ច នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Rashid បានបន្ថែមថា សេដ្ឋកិច្ចរបស់ប្រទេសចិន មានលក្ខខណ្ឌអំណោយផលក្នុងកំណើន ដោយសារអត្រាអតិផរណារបស់ខ្លួនមានកម្រិតទាប ទោះបីជាអតិផរណាខ្ពស់ នៅកន្លែងផ្សេងទៀតក៏ដោយ ។ បើប្រៀបធៀបជាមួយប្រទេសដទៃទៀត ប្រទេសចិននៅតែមាន “អត្រាអតិផរណាទាបបំផុត” ដែលជាអត្ថប្រយោជន៍ពិសេស ៕
ប្រែសម្រួល ឈូក បូរ៉ា
