ម៉ូស្គូ៖ អ្នកនាំពាក្យវិមានក្រឹមឡាំង លោក Dmitry Peskov បានឲ្យដឹងថា ប្រទេសរុស្ស៊ី នៅតែបើកចំហ ចំពោះការសន្ទនាជាមួយសហរដ្ឋអាមេរិក ស្តីពីការគ្រប់គ្រងអាវុធ ព្រោះវាមានសារៈសំខាន់ខ្លាំងណាស់ ប៉ុន្តែទីក្រុងម៉ូស្គូ កំពុងរង់ចាំសំណើជាក់លាក់ពីទីក្រុងវ៉ាស៊ីនតោន។
ក្នុងអំឡុងសន្និសីទសារព័ត៌មានប្រចាំថ្ងៃ លោក Peskov បានហៅវាថា “សំខាន់ និងវិជ្ជមាន” សេចក្តីថ្លែងការណ៍នាពេលថ្មីៗនេះ ដោយទីប្រឹក្សាសន្តិសុខជាតិអាមេរិកលោក Jake Sullivan ថាសហរដ្ឋអាមេរិក បានត្រៀមខ្លួនរួចជាស្រេច សម្រាប់កិច្ចចរចានុយក្លេអ៊ែរជាមួយរុស្ស៊ី ដោយគ្មានលក្ខខណ្ឌជាមុន។
លោកបានប្រាប់អ្នកយកព័ត៌មានថា “យើងសង្ឃឹមថា វានឹងត្រូវបានគាំទ្រដោយជំហានជាក់ស្តែងតាមរយៈបណ្តាញការទូត ហើយបន្ទាប់មកវានឹងអាចពិចារណាលើទម្រង់នៃការសន្ទនា ដែលបានស្នើឡើង” ។
លោកបានលើកឡើងថា “វាពិតជាលំបាកណាស់ក្នុងការពឹងផ្អែកលើសេចក្តីថ្លែងការណ៍ទៅកាន់សារព័ត៌មានលើបញ្ហាសំខាន់ និងរសើបបែបនេះ ជាពិសេសនៅពេលដែលយើង កំពុងជួបប្រទះនឹងការខ្វះខាតយ៉ាងខ្លាំងនៃការជឿទុកចិត្តគ្នាទៅវិញទៅមក នៅក្នុងទំនាក់ទំនងទ្វេភាគីរបស់យើង” ។
នៅក្នុងខែកុម្ភៈ ឆ្នាំ២០២៣ រុស្ស៊ី បានផ្អាកជាផ្លូវការនូវការចូលរួមរបស់ខ្លួននៅក្នុងសន្ធិសញ្ញាកាត់បន្ថយអាវុធយុទ្ធសាស្ត្រថ្មី ជាមួយសហរដ្ឋអាមេរិក ដែលជាកិច្ចព្រមព្រៀងគ្រប់គ្រងអាវុធនុយក្លេអ៊ែរ ចុងក្រោយរវាងមហាអំណាចនុយក្លេអ៊ែរទាំងពីរ។
ទីក្រុងមូស្គូ បានចង្អុលបង្ហាញពីសក្ដានុពលនៃការវាយប្រហាររួមគ្នារបស់អង្គការណាតូ ខណៈដែលចក្រភពអង់គ្លេស និងបារាំងក៏មានឃ្លាំងអាវុធនុយក្លេអ៊ែរ ដែលបង្កការគំរាមកំហែងដល់ប្រទេសរុស្ស៊ីផងដែរ៕
ប្រែសម្រួល ឈូក បូរ៉ា
![](https://dap-news.com/wp-content/uploads/2020/08/1-1.png)