ប្រមុខយូអិន ថ្កោលទោសការវាយប្រហារ លើព្រះវិហារមួយកន្លែង នៅប៊ូគីណាហ្វាសូ សម្លាប់មនុស្ស ២៤នាក់

យូអិន៖ អ្នកនាំពាក្យរបស់លោក បានលើកឡើងថា អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសការវាយប្រហារទៅលើវិហារនៅ ប៊ូគីណាហ្វាសូ Burkina Faso ដែលត្រូវបានគេរាយការណ៍ថា បានសម្លាប់មនុស្សចំនួន ២៤ នាក់កាលពីថ្ងៃអាទិត្យ។

អ្នកនាំពាក្យលោកអគ្គលេខាធិការលោក Eri Kaneko បានលេីកឡេីងថា“ អគ្គលេខាធិការបានថ្កោលទោសយ៉ាងខ្លាំង ចំពោះការវាយប្រហារ ដែលបានរាយការណ៍ថា បានតម្រង់គោលដៅ ទៅលើព្រះវិហារនៅ Pansi ក្នុងតំបន់ Sahel នៅក្នុងប្រទេសប៊ូគីណាហ្វាសូ កាលពីថ្ងៃទី១៦ ខែកុម្ភៈ” ។

លោកអគ្គលេខាធិការ បានសម្តែងការអាណិតអាសូរ និងចូលរួមរំលែកទុក្ខយ៉ាងជ្រាលជ្រៅ ដល់ក្រុមគ្រួសារនៃអ្នកដែលបានស្លាប់ ហើយលោកសូមជូនពរ ឱ្យមានការឆាប់ជាសះស្បើយ ដល់អ្នករងរបួស និងទទួលបានយុត្តិធម៌” ៕ ដោយ៖ ឈូក បូរ៉ា