ហ្សាកាតា៖ រដ្ឋមន្ត្រីការបរទេស នៃសមាគមប្រជាជាតិ អាស៊ីអាគ្នេយ៍ នឹងជួបប្រជុំគ្នា នៅប្រទេសឥណ្ឌូនេស៊ី នៅថ្ងៃអង្គារនេះ ដោយវិបត្តិនយោបាយជាប់គាំង របស់មីយ៉ាន់ម៉ា ត្រូវបានគេរំពឹងថា នឹងគ្របដណ្តប់លើការពិភាក្សា។ នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
ប្រទេសឥណ្ឌូនេស៊ី ដែលជាប្រធានបង្វិលក្រុមនៅឆ្នាំនេះ បានឲ្យដឹងថា ខ្លួនបានទទួលជោគជ័យក្នុងការចូលរួមជាមួយភាគីពាក់ព័ន្ធទាំងអស់ក្នុងប្រទេសមីយ៉ាន់ម៉ា ជាកន្លែងដែលយោធាបានដណ្តើមអំណាច ដោយការទម្លាក់រដ្ឋាភិបាល ដែលជាប់ឆ្នោតតាមបែបប្រជាធិបតេយ្យនៅក្នុងរដ្ឋប្រហារខែកុម្ភៈ ឆ្នាំ២០២១។
ប៉ុន្តែគេមិនដឹងថា តើទីក្រុងហ្សាកាតា នឹងលម្អិតដល់រដ្ឋសមាជិកអាស៊ានចំនួនប្រាំបួន ៩ផ្សេងទៀតអំពីអ្វីដែលខ្លួនសម្រេចបាន ឬថាតើខ្លួននឹងពិភាក្សាអំពីវិធានការជាក់ស្តែង ដើម្បីទម្លុះភាពជាប់គាំងចំពេលដែលរបបយោធាមីយ៉ាន់ម៉ា កំពុងបន្តយុទ្ធនាការហិង្សាប្រឆាំងនឹងកងកម្លាំងគាំទ្រលទ្ធិប្រជាធិបតេយ្យដែរឬយ៉ាងណានោះទេ។
ជម្លោះដែនដីនៅសមុទ្រចិនខាងត្បូង ស្ថិតក្នុងចំណោមប្រធានបទផ្សេងទៀត ដែលត្រូវលើកយកមកពិភាក្សាក្នុងកិច្ចប្រជុំរយៈពេល២ថ្ងៃនេះ។ កិច្ចពិភាក្សាថ្នាក់រដ្ឋមន្ត្រីការបរទេស ជាស៊េរីរបស់អាស៊ាន ជាមួយប្រទេសជាដៃគូ នឹងប្រព្រឹត្តទៅនៅទីក្រុងហ្សាកាតា នៅចុងសប្តាហ៍នេះ
មីយ៉ាន់ម៉ា នឹងមិនចូលរួមក្នុងកិច្ចប្រជុំនេះទេ ដោយសារប្រទេសឥណ្ឌូនេស៊ី បានគោរពតាមគោលជំហរអាស៊ាន ដែលអនុញ្ញាតឱ្យរបបយោធា បញ្ជូនតែអ្នកតំណាងមិនមែននយោបាយមកចូលរួមតែប៉ុណ្ណោះ។
ទោះជាយ៉ាងណាក៏ដោយ ប្រទេសមីយ៉ាន់ម៉ា បានចូលរួមក្នុងវេទិកា សម្រាប់ប្រទេសសមាជិកអាស៊ាន ដែលធ្វើជាម្ចាស់ផ្ទះដោយប្រទេសថៃ កាលពីខែមុន ខណៈដែលទីក្រុងបាងកក បានអញ្ជើញរដ្ឋមន្ត្រីការបរទេសរបស់របបយោធា ដោយបង្ហាញពីការបែកបាក់រវាងប្រទេសអាស៊ាន ដែលទទួលយកការគ្រប់គ្រងដោយយោធាក្នុងកម្រិតមួយចំនួន ។
កាលពីពេលកន្លងមកឥណ្ឌូណេស៊ី ម៉ាឡេស៊ី និងសិង្ហបុរី មិនបានចូលរួមវេទិកានេះនៅក្នុងប្រទេសថៃនោះទេ ដោយសារមានការចូលរួមពីប្រទេសមីយ៉ាន់ម៉ា។ រដ្ឋមន្ត្រីការបរទេសឥណ្ឌូនេស៊ី លោក Retno Marsudi បានប្រាប់អ្នកយកព័ត៌មានកាលពីថ្ងៃសុក្រថា ប្រទេសនេះបានជួបពិភាក្សាជាមួយភាគីពាក់ព័ន្ធទាំងអស់នៅក្នុងប្រទេសមីយ៉ាន់ម៉ារួចរាល់ហើយ៕
