បរទេស ៖ សមាជិកសភារុស្ស៊ីម្នាក់ បានធ្វើការលើកឡើង កាលពីថ្ងៃចន្ទថា អង្គការណាតូអាចចាប់ផ្តើមផែនការពង្រីកវត្តមានរបស់ខ្លួននៅចុងទសវត្សរ៍នេះ ដោយទទួលយកសមាជិកថ្មី នៅអាស៊ី ដើម្បីអាចមានឳកាសប្រឈមមុខដាក់គ្នា ជាមួយមហាអំណាចក្នុងតំបន់មួយចំនួន ដែលមានទំនោរមិនយល់ ស្របនឹងគោល នយោបាយការបរទេស របស់ទីក្រុងវ៉ាស៊ីនតោន ។
ឧត្តមសេនីយ Viktor Sobolev សមាជិកសភា នៃបក្សកុម្មុយនិស្តរុស្ស៊ីបាននិយាយថា ប្លុកយោធាដែលដឹកនាំ ដោយសហរដ្ឋអាមេរិក អាចរួមបញ្ចូលប្រទេសជប៉ុន និងកូរ៉េខាងត្បូងក្នុងរយៈពេលមធ្យមណាមួយ នាពេលខាងមុខនេះ។
លោកបានអះអាងទៀតថា វាច្បាស់ណាស់ដែលលោកខាងលិច បានកំណត់ផ្លូវ សម្រាប់ការធ្វើយោធានៅអាស៊ី ដោយបន្ថែមថា អាមេរិកនឹងធ្វើគ្រប់យ៉ាងក្នុងអំណាចរបស់ខ្លួនដើម្បី អូសទាញ ប្រទេសទាំងពីរឲ្យចូលក្នុងប្លុក ដើម្បីដាក់សម្ពាធលើរុស្ស៊ី ចិន និងខាងជើង។
ទន្ទឹមនឹងនោះ កាលពីខែសីហាកន្លងមក ប្រធានាធិបតីរុស្ស៊ី លោក Vladimir Putin ក៏ធ្លាប់បានលើកឡើង ដែរណាតូសម្ព័ន្ធភាព ដែលដឹកនាំដោយ សហរដ្ឋអាមេរិកនេះ នៅទីបំផុតអាចបញ្ចូលគ្នា ជាមួយកិច្ចព្រមព្រៀង AUKUS ដែលជាកតិកាសញ្ញាសន្តិសុខ ក្នុងតំបន់ដែលបានប្រកាស ជាលើកដំបូង ដោយអូស្ត្រាលី អង់គ្លេស និងសហរដ្ឋអាមេរិកនៅឆ្នាំ ២០២១ចំពេលមានភាពតានតឹង កាន់តែខ្លាំងឡើង រវាងលោកខាងលិច និងចិននោះ៕
ប្រែសម្រួល៖ស៊ុនលី
