ភ្នំពេញ ៖ ក្នុងជំនួបជាមួយលោក Joseph Scheuer អ្នកសម្របសម្រួលប្រព័ន្ធអង្គការសហប្រជាជាតិ ប្រចាំប្រទេសកម្ពុជា (United Nations Resident Coordinator to Cambodia-UNRC) នៅព្រឹកថ្ងៃ១០ វិច្ឆិកា លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានស្វាគមន៍ និងថ្លែងអំណរគុណដល់ UNRC ប្រចាំកម្ពុជា ដែលបានសហការគាំទ្រក្រសួងសុខាភិបាល ក្នុងការងារលើកកម្ពស់សុខុមាលភាពរបស់ប្រជាជនកម្ពុជា តាមរយៈទីភ្នាក់ងារអង្គការសហប្រជាជាតិនានាប្រចាំកម្ពុជា នាពេលកន្លងមក។
សាស្ត្រាចារ្យរដ្ឋមន្ត្រី ក៏បានស្នើទីភ្នាក់ងារអង្គការសហប្រជាជាតិទាំងអស់ប្រចាំនៅកម្ពុជា បន្តពង្រឹង និងពង្រីកកិច្ចសហប្រតិបត្តិការបន្ថែមទៀត គាំទ្រផែនការយុទ្ធសាស្ត្រថ្មីៗ របស់ក្រសួងសុខាភិបាល ក្នុងការលើកកម្ពស់សុខុមាលភាពរបស់ប្រជាជនកម្ពុជា ដើម្បីឈានទៅសម្រេចបាននូវការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧ក្រោមការដឹកនាំដ៏ឈ្លាសវៃ និងប៉ិនប្រសប់ប្រកបដោយគតិបណ្ឌិតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
សម្រាប់ លោក Joseph Scheuer អ្នកសម្របសម្រួលប្រព័ន្ធអង្គការសហប្រជាជាតិ ប្រចាំកម្ពុជា បានអបអរសាទរ និងជូនពរ ឯកឧត្តមសាស្ត្រាចារ្យ ក្នុងឱកាសទទួលបានការទុកចិត្តពីរាជរដ្ឋាភិបាលអាណត្តិទី៧ តែងតាំងជារដ្ឋមន្ត្រីក្រសួងសុខាភិបាល។ លោកបានជម្រាបរដ្ឋមន្រ្តី ថា UNRC បាននិងកំពុងយកចិត្តទុកដាក់ខ្ពស់លើការអនុវត្តគោលការណ៍ជាតិ និងអន្តរជាតិ ដើម្បីធានានូវការទទួលបានសេវាសុខភាពប្រកបដោយគុណភាព និងសមធម៌ សម្រាប់ ប្រជាពលរដ្ឋគ្រប់រូប សំដៅបង្កើតបរិយាកាសប្រកបដោយវឌ្ឍនភាព ផលិតភាព និងសុខភាពល្អ និងដើម្បីចូលរួមចំណែកក្នុងការ សម្រេចបានការគ្របដណ្តប់សេវាសុខភាពជាសកល។
គួរបញ្ជាក់ផងដែរថា ក្រោមកិច្ចសហប្រតិបត្តិការល្អ និងជិតស្និតពីទីភ្នាក់ងារអង្គការសហប្រជាជាតិនានាប្រចាំនៅកម្ពុជា ក្រសួងសុខាភិបាលបានអនុវត្តនូវផែនការយុទ្ធសាស្ត្រជាច្រើនដំណាក់កាលជាបន្តបន្ទាប់ ប្រកបដោយជោគជ័យគួរជាទីមោទក ជាពិសេសក្នុងបរិបទនៃការរាតត្បាតជាសកលនៃជំងឺកូវីដ-១៩ ភ្នាក់ងារអង្គការសហប្រជាជាតិ មួយចំនួនបានធ្វើការសហការយ៉ាងជិតស្និទ្ធបំផុត គាំទ្រក្រសួងសុខាភិបាលក្នុងការឆ្លើយតបទៅនឹងជំងឺកូវីដ-១៩ ដូចជា ៖ អង្គការសុខភាពពិភពលោក បានចូលរួមគាំទ្រផ្នែកបច្ចេកទេសដល់ក្រសួងសុខាភិបាល ដោយបានផ្តល់ការគាំទ្រ ផ្នែកហិរញ្ញវត្ថុ បច្ចេកទេស និងប្រតិបត្តិការក៏ដូចជាតាមរយៈការអភិវឌ្ឍ និងការអនុវត្តផែនការមេឆ្លើយតបទៅនឹងជំងឺរាតត្បាតជំងឺកូវីដ-១៩ របស់កម្ពុជា និងនាពេលអនាគត។
ការត្រៀមលក្ខណៈ៖ អង្គការសហប្រជាជាតិបានធ្វើការ យ៉ាងជិតស្និទ្ធជាមួយក្រសួងសុខាភិបាល ដើម្បីត្រៀមលក្ខណៈ ប្រព័ន្ធសុខាភិបាលមូលដ្ឋានពង្រឹងសមត្ថភាពបុគ្គលិកសុខាភិបាលជួរមុខ និងបុគ្គលិកសង្គមការទិញការផ្គត់ផ្គង់សុខភាព និងឧបករណ៍ការពារផ្ទាល់ខ្លួន ចែកចាយទំនាក់ទំនងហានិភ័យ និងអនុវត្តវិធានការសុខភាពសាធារណៈ។
ការចាក់ថ្នាំបង្ការ៖ អង្គការ WHO និងUNICEF បានគាំទ្ររាជរដ្ឋាភិបាលកម្ពុជាក្នុងការអភិវឌ្ឍន៍ និង អនុវត្តផែនការជាតិសម្រាប់ការចាក់វ៉ាក់សាំងជំងឺកូវីដ-១៩ ដោយការធ្វើផែនការ ការត្រួតពិនិត្យ ការគ្រប់គ្រងហានិភ័យ និងការចូលរួមសហគមន៍ ការគ្រប់គ្រងខ្សែសង្វាក់ផ្គត់ផ្គង់វ៉ាក់សាំង និងការពង្រឹងប្រព័ន្ធត្រជាក់ដែលអនុញ្ញាតឱ្យកម្ពុជាធ្វើពិពិធកម្ម ផលប័ត្រវ៉ាក់សាំងរបស់ខ្លួនបន្ថែមទៀត ជាមួយនឹងអត្រាខ្ជះខ្ជាយតិចជាង ១%។
វ៉ាក់សាំងកូវីដ-១៩៖ អង្គការសហប្រជាជាតិ បានសម្របសម្រួលក្នុងយន្តការ COVAX Facility និងការបរិច្ចាគ វ៉ាក់សាំងជំងឺកូវីដ-១៩ ដល់គោលដៅ។ គិតត្រឹមថ្ងៃទី២៥ ខែវិច្ឆិកា ឆ្នាំ២០២២ វ៉ាក់សាំងកូវីដ-១៩ សរុបចំនួន ៥៣.៧លានដូស (៥.៩លានដូស កម្ពុជាទទួលបានតាមរយៈ COVAX Facility) ៕
