ប៉េកាំង៖ ប្រទេសចិន បានសម្តែងការប្រឆាំងយ៉ាងម៉ឺងម៉ាត់ ចំពោះពាក្យសំដីថ្មី របស់ប្រធានាធិបតីអាមេរិកលោក ចូ បៃដិន ចំពោះប្រធានាធិបតីចិនលោក ស៊ី ជីនពីង ថាជាមេដឹកនាំផ្តាច់ការភ្លាមៗបន្ទាប់ពីកិច្ចប្រជុំកំពូលរបស់ពួកគេនៅជិតទីក្រុងសាន់ហ្វ្រាន់ស៊ីស្កូ ដោយនិយាយថា ការលើកឡើងរបស់លោក គឺ “ខុសខ្លាំង និងឧបាយកលនយោបាយមិនទទួលខុសត្រូវ” ។
ដោយមិនបញ្ចេញឈ្មោះលោក បៃដិន អ្នកនាំពាក្យក្រសួងការបរទេសចិន លោកស្រីម៉ៅ នីង បានឲ្យដឹងនៅក្នុងសន្និសីទសារព័ត៌មាននៅទីក្រុងប៉េកាំងថា តែងតែមានមនុស្សមួយចំនួនដែលមាន “ចេតនាទុច្ចរិត” ដែលព្យាយាមបង្អាក់ទំនាក់ទំនងចិន-អាមេរិក ប៉ុន្តែកិច្ចខិតខំប្រឹងប្រែងបែបនេះនឹងមិនទទួលបានជោគជ័យឡើយ។
នៅក្នុងសន្និសីទសារព័ត៌មានមួយបន្ទាប់ពីកិច្ចពិភាក្សារបស់លោកជាមួយលោក ស៊ី លោក បៃដិន បានចាត់ទុកមេដឹកនាំចិនថា ជាមេដឹកនាំផ្តាច់ការក្នុងន័យថា លោក “គ្រប់គ្រងប្រទេស ដែលជាប្រទេសកុម្មុយនិស្តផ្អែកលើទម្រង់រដ្ឋាភិបាលខុសពីប្រទេសរបស់យើងទាំងស្រុង” ។
លោក បៃដិន បានធ្វើការកត់សម្គាល់បន្ទាប់ពីបានសរសើរពីវឌ្ឍនភាព ដែលធ្វើឡើងក្នុងការបញ្ចុះសីតុណ្ហភាពរវាងទីក្រុងវ៉ាស៊ីនតោន និងទីក្រុងប៉េកាំង។ កាលពីខែមិថុនា ប្រធានាធិបតីអាមេរិកបានពណ៌នាលោក ស៊ី ថាជាជនផ្តាច់ការនៅក្នុងព្រឹត្តិការណ៍រៃអង្គាសប្រាក់ក្នុងរដ្ឋកាលីហ្វ័រញ៉ា ដែលបានបង្កឲ្យមានប្រតិកម្មយ៉ាងខ្លាំងពីប្រទេសចិន។
ប្រធានាធិបតីអាមេរិក បានលើកឡើងនៅពេលនោះថា លោក ស៊ី មានការខកចិត្ត ចំពោះភាពតានតឹងជុំវិញការសង្ស័យថា បារឡុងចារកម្មចិន ដែលត្រូវបានបាញ់ទម្លាក់ដោយយន្តហោះចម្បាំងរបស់សហរដ្ឋអាមេរិកកាលពីខែកុម្ភៈ។ លោក បៃដិន បានលើកឡើងថា “នោះជាការអាម៉ាស់យ៉ាងខ្លាំង សម្រាប់ជនផ្តាច់ការ។ នៅពេលពួកគេមិនដឹងថាមានអ្វីកើតឡើងនោះទេ”៕ ប្រែសម្រួល ឈូក បូរ៉ា
