ប៉េកាំង៖ ប្រធានាធិបតីចិន លោក ស៊ី ជីនពីង បានឲ្យដឹងថា នៅពេលដែលពិភពលោកឆ្លងកាត់ការផ្លាស់ប្តូរ និងភាពចលាចល ដែលមិនបានឃើញក្នុងរយៈពេលមួយសតវត្ស ប្រទេសចិន និងបារាំងគួរតែរក្សាឯករាជ្យភាព និងរួមគ្នាទប់ស្កាត់ “សង្រ្គាមត្រជាក់ថ្មី” ឬការប្រឈមមុខគ្នានៅក្នុងប្លុក។
លោក ស៊ី បានធ្វើការកត់សម្គាល់ក្នុងអំឡុងពេល ពិភាក្សាជាមួយសមភាគីបារាំងលោក អេម៉នុយអែល ម៉ាក្រុង នៅវិមាន Elysee នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
ប្រធានាធិបតីចិនបានសម្តែង ការរីករាយក្នុងការធ្វើដំណើរទស្សនកិច្ចផ្លូវរដ្ឋជាលើកទី៣ នៅប្រទេសបារាំងតាមការអញ្ជើញ ក្នុងឱកាសខួបលើកទី៦០ នៃទំនាក់ទំនងរវាងប្រទេសចិន-បារាំង។
លោក ស៊ី បានលើកឡើងថា ភាគីទាំងពីរគួរតែរក្សាការប្តេជ្ញាចិត្ត ចំពោះស្មារតីដែលដឹកនាំការបង្កើត ទំនាក់ទំនងការទូតរបស់ពួកគេ ពោលគឺឯករាជ្យភាព ការយោគយល់គ្នាទៅវិញទៅមក ចក្ខុវិស័យរយៈពេលវែង និងផលប្រយោជន៍ទៅវិញទៅមក ហើយពង្រឹងវាជាមួយនឹង លក្ខណៈពិសេសថ្មីនៃយុគសម័យថ្មី។
លោកបានបន្តថា ពួកគេគួរតែបន្តយោគយល់គ្នាទៅវិញទៅមក ហើយរួមគ្នាលើកកម្ពស់ការរួមរស់ ដោយសុខដុមរមនាក្នុងពិភពចម្រុះពណ៌ ពួកគេគួរតែគិតគូរឲ្យបានវែងឆ្ងាយ ហើយធ្វើការជាមួយគ្នាដើម្បីពិភពលោកពហុប៉ូលដែលស្មើភាព និងមានរបៀបរៀបរយ។
លោកបានបន្ថែមថា ពួកគេគួរតែបន្តកិច្ចសហប្រតិបត្តិការឈ្នះ-ឈ្នះ ហើយរួមគ្នាប្រឆាំងនឹងការបំបែក កាត់ខ្សែសង្វាក់ផ្គត់ផ្គង់ ឬការដំឡើងជញ្ជាំង និងរបាំងផងដែរ ៕
ប្រែសម្រួល ឈូក បូរ៉ា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
