ញូវយ៉ក៖ រដ្ឋមន្ត្រីការបរទេសជប៉ុនលោកស្រី Yoko Kamikawa បានឲ្យដឹងថា លោកស្រី បានជំរុញឱ្យប្រទេសចិន ចាត់វិធានការដើម្បីធានាសុវត្ថិភាពរបស់ពលរដ្ឋជប៉ុន ជាពិសេសកុមារក្នុងប្រទេសនេះ ក្នុងអំឡុងពេលពិភាក្សាជាមួយអ្នកការទូតកំពូលរបស់ខ្លួនលោក វ៉ាង យី នៅទីក្រុងញូវយ៉ក។
ជំនួបនេះបានធ្វើឡើងបន្ទាប់ពីមានការចាក់សម្លាប់សិស្សសាលាជប៉ុនម្នាក់កាលពីសប្តាហ៍មុននៅក្នុងទីក្រុង Shenzhen ប្រទេសចិន។ លោកស្រី Kamikawa ក៏បានប្រាប់អ្នកសារព័ត៌មានថា លោកស្រី បានស្នើឱ្យទីក្រុងប៉េកាំង ផ្តល់ព័ត៌មានស៊ីជម្រៅអំពីឧបទ្ទវហេតុដល់ទីក្រុងតូក្យូ និងបង្ក្រាបបណ្តាញទំនាក់ទំនងសង្គមប្រឆាំងនឹងជប៉ុន និងការបង្ហោះតាមអ៊ីនធឺណិតផ្សេងទៀតជាបន្ទាន់។
រដ្ឋមន្ត្រីជប៉ុន បានសង្កត់ធ្ងន់លើតម្រូវការសម្រាប់វិធានការប្រឆាំងនឹងការអត្ថាធិប្បាយតាមប្រព័ន្ធផ្សព្វផ្សាយសង្គមបែបនេះ ពីព្រោះពួកគេត្រូវបាន “ភ្ជាប់ដោយផ្ទាល់ទៅនឹងសុវត្ថិភាពរបស់កុមារ និង មិនអាចទទួលយកបានទាំងស្រុង” ។
លោកស្រីបានបន្ថែមថា ប្រទេសចិនគួរតែខិតខំប្រឹងប្រែងបន្ថែមទៀត ដើម្បីដកចេញនូវឧបសគ្គដែលរារាំងការផ្លាស់ប្តូរកាន់តែប្រសើរឡើងរវាងប្រទេសទាំងពីរ នេះបើយោងតាមក្រសួងការបរទេសជប៉ុន។
លោកស្រីបានដកស្រង់សម្តីលោក វ៉ាង យី ថាជាការឆ្លើយតបថាអ្វីដែលបានកើតឡើងនៅទីក្រុង Shenzhen “គឺជាករណីបុគ្គលដែលយើងមិនចង់ឃើញ ហើយអាជ្ញាធរចិននឹងដោះស្រាយវាស្របតាមច្បាប់”។
ក្រសួងការបរទេសចិនបានឲ្យដឹងថា លោក វ៉ាង យី បានប្រាប់លោកស្រី Kamikawa ថាប្រទេសចិន នឹងបន្តការពារពលរដ្ឋបរទេសទាំងអស់នៅក្នុងប្រទេសចិន ដែលរស់នៅទីនោះ ហើយបានជំរុញឱ្យទីក្រុងតូក្យូ ទទួលយក “វិធីសាស្រ្តស្ងប់ស្ងាត់ និងសមហេតុផល ចំពោះករណីនេះ ជំនួសឱ្យការធ្វើនយោបាយ និងពង្រីកវាឲ្យកាន់តែខ្លាំង”៕
ប្រែសម្រួល ឈូក បូរ៉ា
