បេរូត៖ រដ្ឋមន្ត្រីសុខាភិបាលលីបង់ លោក Firas Abiad បានឲ្យដឹងថា ចំនួនអ្នកស្លាប់ដោយសារការវាយប្រហារតាមផ្លូវអាកាសដ៏ខ្លាំងក្លារបស់អ៊ីស្រាអែល ទៅលើភាគខាងត្បូង និងភាគខាងកើតប្រទេសលីបង់ ចាប់តាំងពីថ្ងៃច័ន្ទ បានកើនឡើងដល់ ៥៥៨នាក់ ក្នុងនោះមានកុមារចំនួន ៥០នាក់ និងស្ត្រី ៩៤នាក់ ជាមួយនឹងការរងរបួសកើនឡើងដល់ ១,៨៣៥នាក់។
លោកបានលើកឡើងថា ការវាយប្រហារតាមអាកាសបានកំណត់គោលដៅរថយន្តសង្គ្រោះបន្ទាន់ចំនួន ១៤គ្រឿង ដោយបានសម្លាប់គ្រូពេទ្យចំនួន ៤នាក់ និង ១៦នាក់ផ្សេងទៀតរងរបួស។
លោកបានថ្កោលទោសកងកម្លាំងអ៊ីស្រាអែលដែលបានកំណត់គោលដៅលើជនស៊ីវិល ក្រុមពេទ្យ និងមន្ទីរពេទ្យ Bint Jbeil នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានបន្ដថា “ការអះអាងរបស់សត្រូវរបស់អ៊ីស្រាអែល ដែលផ្តោតលើតែសមាជិកក្រុមហេសបូឡា គឺមិនពិត។ តួលេខដែលយើងបានលើកឡើងបង្ហាញថា សត្រូវកំពុងផ្តោតលើជនស៊ីវិលស្លូតត្រង់ និងបុគ្គលិកពេទ្យ”។
គួរបញ្ជាក់ថា កងទ័ពអ៊ីស្រាអែល បានបើកការវាយប្រហារតាមអាកាសយ៉ាងខ្លាំងក្លាទៅលើភូមិ និងទីប្រជុំជននៅភាគខាងត្បូង និងភាគខាងកើតប្រទេសលីបង់ ចាប់តាំងពីថ្ងៃច័ន្ទ ដោយបានជម្លៀសប្រជាជនរាប់ពាន់គ្រួសារទៅកាន់តំបន់សុវត្ថិភាព៕
ប្រែសម្រួល ឈូក បូរ៉ា
