បរទេស ៖ យោធាអ៊ីស្រាអែល បានប្រកាសថា ខ្លួនបានវាយលុកគោលដៅហិរញ្ញវត្ថុ របស់ក្រុមហេសបូឡាជាង ២០ កន្លែង រួមទាំងឃ្លាំងមួយ ដែលមានសាច់ប្រាក់ និងមាសរាប់សិបលានដុល្លារ ។
យោងតាមសារព័ត៌មាន VN EXPRESS ចេញផ្សាយនៅថ្ងៃទី២២ ខែតុលា ឆ្នាំ២០២៤ បានឱ្យដឹងថា អ្នកនាំពាក្យកងកម្លាំងការពារអ៊ីស្រាអែល (IDF) លោក Daniel Hagari បានប្រកាសកាលពីថ្ងៃទី២១ ខែតុលាថា “កងកម្លាំងអាកាសអ៊ីស្រាអែល បានបើកការវាយប្រហារយ៉ាងជាក់លាក់មួយ ទៅលើទីតាំងរឹងមាំផ្នែកហិរញ្ញវត្ថុរបស់ក្រុមហេសបូឡា” ។ “គោលដៅសំខាន់មួយកាលពីយប់មិញគឺឃ្លាំងក្រោមដីដែលផ្ទុកប្រាក់រាប់សិបលានដុល្លារ។ ប្រាក់ និងមាស ប្រាក់នេះត្រូវបានប្រើ ដើម្បីផ្តល់ហិរញ្ញប្បទានដល់ការ វាយប្រហាររបស់ក្រុម ហេសបូឡា លើអ៊ីស្រាអែល»។
លោក Hagari មិនបានបញ្ជាក់ពីទីតាំង នៃឃ្លាំងនៅក្រោមដី ឬថាតើលុយត្រូវបានបំផ្លាញនោះទេ។
ក្រោយមកអ្នកនាំពាក្យ IDF បានលើកឡើងពីឃ្លាំងក្រោមដីមួយទៀតដែលពោរពេញទៅដោយសាច់ប្រាក់ និងមាសនៅក្រោមមន្ទីរពេទ្យ Sahel ក្នុងតំបន់ Daniyeh ជាយក្រុងភាគខាងត្បូងនៃទីក្រុង បេរ៉ូត ។ លោក Hagari បាននិយាយទៀតថា “យើងប៉ាន់ប្រមាណថា ឃ្លាំងនេះមានសាច់ប្រាក់ និងមាសយ៉ាងហោចណាស់កន្លះពាន់លានដុល្លារ។ ប្រាក់នេះអាចប្រើប្រាស់ក្នុងការកសាងប្រទេសលីបង់ឡើងវិញ”។ លោក Hagari បាននិយាយដោយបន្ថែមថា IDF កំពុងធ្វើសង្រ្គាមជាមួយក្រុមហេសបូឡា មិនមែនប្រជាជនលីបង់ ហើយនឹងមិនវាយប្រហារមន្ទីរពេទ្យនោះដែរ។ កងកម្លាំងអាកាសអ៊ីស្រាអែលកំពុងតាមដានគោលដៅ។
លោក Fadi Alameh នាយកមន្ទីរពេទ្យ Sahel បានបដិសេធការចោទប្រកាន់នេះ។ លោកបានបន្តថា បុគ្គលិកពេទ្យនៅផ្នែកសង្គ្រោះបន្ទាន់ដែលជាផ្នែកមានមុខងារ តែមួយគត់ នៃមន្ទីរពេទ្យកំពុងត្រូវបានជម្លៀសចេញ។ លោក Alameh ក៏បាននិយាយផងដែរថា លោកបានត្រៀមខ្លួន រួចជាស្រេច សម្រាប់កងទ័ពលីបង់ “ឬអ្នកសង្កេតការណ៍ផ្សេងទៀត” ដើម្បីទៅមើលមន្ទីរពេទ្យ ដើម្បីបញ្ជាក់ថាព័ត៌មានរបស់ទីក្រុង Tel Aviv គឺមិនពិត ៕
