បរទេស ៖ រដ្ឋមន្ត្រីការបរទេសប៉ូឡូញ លោក Radoslaw Sikorski បាននិយាយថា ប្រទេសប៉ូឡូញ នឹងមិនទាមទារឱ្យប្រទេសអាល្លឺម៉ង់ ផ្តល់សំណង សម្រាប់ឧក្រិដ្ឋកម្ម ដែលប្រព្រឹត្តដោយពួកណាស៊ី ក្នុងអំឡុងសង្គ្រាមលោកលើកទី២ទៀតទេ ។ អ្នកការទូតបាននិយាយថា រដ្ឋាភិបាលទីក្រុង វ៉ារស្សាវ៉ា និង រដ្ឋាភិបាលទីក្រុង ប៊ែរឡាំង ឥឡូវនេះជាសម្ព័ន្ធមិត្ត ជាពិសេសនៅពេលនិយាយ អំពីការទប់ស្កាត់ការគំរាមកំហែង ដែលពួកគេមើលឃើញថា បង្កឡើងដោយរុស្ស៊ី ។
យោងតាមសារព័ត៌មាន RT ចេញផ្សាយនៅថ្ងៃទី២៣ ខែតុលា ឆ្នាំ២០២៤ បានឱ្យដឹងថា នៅក្រោមរដ្ឋាភិបាលស្តាំនិយម មុនដែលដឹកនាំដោយគណបក្ស អភិរក្សច្បាប់ និងយុត្តិធម៌ (PiS) គឺប្រទេសប៉ូឡូញបានលើកឡើងម្តងហើយម្តងទៀត អំពីបញ្ហាសំណងសង្គ្រាម ជាមួយអាល្លឺម៉ង់។ នៅឆ្នាំ២០២២ ទីក្រុង វ៉ារស្សាវ៉ា បានប៉ាន់ប្រមាណថា ទីក្រុងប៊ែកឡាំងនឹងត្រូវចំណាយ ៦,២ ពាន់ពាន់លាន PLN ស្មើនឹងប្រហែល ១,៥ ពាន់ពាន់លានដុល្លារ ជាសំណង សម្រាប់ការខូចខាតដែលបង្កឡើង ដោយការកាន់កាប់របស់ពួកណាស៊ី ។
ដោយបង្ហាញខ្លួននៅលើប៉ុស្តិ៍ TVP Info របស់ប្រទេសប៉ូឡូញកាលពីថ្ងៃអង្គារ លោក Sikorski បាននិយាយថា “យើងមិននិយាយអំពីសំណងទៀតទេ ប៉ុន្តែជាកាយវិការមួយដែលបង្ហាញថា ជនជាតិអាល្លឺម៉ង់មានអារម្មណ៍ថាពួកគេទទួលខុសត្រូវខាងសីលធម៌ចំពោះអ្វីដែលពួកគេបានធ្វើចំពោះយើង” ។
យោងតាមរដ្ឋមន្ត្រី “បាល់ឥឡូវនេះស្ថិតនៅក្នុងតុលាការ របស់ប្រទេសអាឡឺម៉ង់” ដោយមានទំនួលខុសត្រូវលើពួកគេ “ផ្តល់ជូននូវការសម្រេចចិត្ត ប្រកបដោយភាពច្នៃប្រឌិត” ។ លោកបានស្នើឱ្យប្រទេស ជិតខាងអាល្លឺម៉ង់ អាចថែរក្សា អ្នករស់រានមានជីវិត ដែលនៅសល់ពីការកាន់កាប់ របស់ណាស៊ី នៃប្រទេសប៉ូឡូញ និងសាងសង់វិមានអនុស្សាវរីយ៍ នៅទីក្រុងប៊ែរឡាំង ដើម្បីរំលឹកដល់ព្រឹត្តិការណ៍ សោកនាដកម្មនេះ៕
ប្រែសម្រួលៈ ណៃ តុលា
